Алексей Кузнецов: «Шачема уженязень колга аф юкснян»

Эрь ломанть сонцень эряфонь киц. Кинь вадяв, а кинь пефтома стака-сталма мархта. Кие «синневи» ня сталмотнень ала, а кинь тянкса, мярьгат, од виенза эвондакшнихть. Аф кунара тейне удалась содафтомс тяфтама ломань мархта. Тя российскяй содаф спортсменць, 2012 кизонь Паралимпийскяй налхкомань сиянь призерсь, миронь чемпионатонь ламонь-крдань чемпионць и призерсь, миронь рекордсменць, Россиянь спортонь Заслуженнай мастерсь Алексей Алексеевич Кузнецов. Шачемас коре сон Мордовиянне, но лама киза ни эряй Московскяй областень Воскресенск ошса. Тяфта лиссь, што стакаста токавомда меле теенза савсь озамс инвалидонь креслати. Но, аф ваномок тянь лангс, Алексей пяшксе эрьгада, эряфти кельгомада, музе вастонц спортса и сатни пяк оцю сатфкст. Аф стак Россиянь Президентсь В.В.Путин казезе сонь «За заслуги перед Отечеством» II степенень орденонь медальса.

—Алексей, азонтт нюрьхкяняста эсь колгат, коса шачеть-касоть, кит тядятне-алятне?
—Шачень мон Саранск ошса 1981 кизоня. Алязе (меля сон, ужяленди, тусь эряфста) спортсменоль, занцесь пря боксса. Тядязе ульсь культработник, сон пяк лац морась аккордеонца, рояльса, фортепияноса. 1984 кизоня семьянек ётаме эряма Московскяй областень Воскресенск ошу. Тоса шачсь ёмла сазорнязе. Тячивок эрян Воскресенскяйса. Вете кизотольхть тейне, мзярда мархтон лиссь зиян—прань ветеце этажста и синдине карязбакарезень. Медицинась ся пингти тонадсь ни полаткшнемс сязьф нервнай ткаттнень, но тяфтама операциятне тиендевсть аньцек омба масторса. А монь родительне—ломаттне аф козят… Вов и лядонь мадозь ащема. Школьнай учительхне сашендсть тонафнемон кудозонк. Мон синь лемнесайне зрнянь ломанькс, спасибакшнян теест тячемс. Васенце колясказень получайне 10 кизоса. Сон пяк стакаль—45 килограмма. Куд пирьфи валхнелемань алязе и тоса мон налхксекшнень цёрашабатнень мархта эрь кодама налхксемаса, вийс коре, конешна. Кой-коста монь нльне арафнемазь футбольнай ортатненди. Аньцек 16 кизоса реабилитационнай центраса тейне макссть тёждя коляска.
1998 кизоня аноклань поступамс Российскяй государственнай социальнай университету, коса тифтольхть условият инвалиттненди. Арьсень кочкамс «омба масторонь кяльхне» специальностть. Тянкса мянь пяле киза занцень пря репетитор мархта. Но кие-бди оцюфнень эзда кошардомань максомс документонень экономическяй факультету, тоса, кле, тонафнемась сяда тёждя. Кулхцондыне. А экзаметтнень пингста ашезь удала кочкамс эрявикс баллхт математикать коряс, конанди ашень анокла. Тяфта получань цебярь урок: решениятне эрявихть примсемс эстееть.
Кизода меле поступань тонафнема юристонди. Сашендовсь эняльтькшнемс сокурсниконенди, конатнень ульсь автомобильсна, штоба пачфнелемазь институту и куцьфнелемазь ветеце этажу, сяс мес тоса ашель аф лифт, аф пандуст. Тяни монь ули нинге филологическяй образованиязе.
—Кода сать спортти?
—Спортсь фалу салсезе мялезень, сон, мярьгат, версон. Ули тяфтама мярьгома: «Олимпиадань итть». Вов тя, улема, монь колган. Кда лувомс, мон эвондань тядязень пекса вчек 1980 кизонь Олимпиадать пингста, кона ульсь Москуса      (рахай). Травмань получамс мялезель арамс хоккеистокс, но… Инвалиднай коляскас озамда меле мон фкя шиска ашень явонда спортть мархта, кельгине гантелень кепсемазень. Тя лездсь ламода кемокстамс кяднень. Тянь приметазь тренерхне, тердемазь налхкома коляска лангса баскетболса Москуву.  А аф лама пингта меле ни команданьке сяськсь Россиянь чемпионатса. Тя ульсь монь васенце медалезе.
Баскетболть мархта савсь явомс, сяс мес стакаль эрь мезня пачкотькшнемс Воскресенскяйста Москуву. Тяда меле занянь пря армреслингса. Кафкса кизот максонь спортонь тя видти. Ламоксть арсень миронь чемпионкс, кафксть сяськонь Европань чемпионатса. Но армреслингсь аф тяни, аф эста ашезь сувсе паралимпийскяй   налхкоматненди, а мон пяк мялезель варжамс вийнень спортонь тя инь оцю пялькстоматнень эса. Тяфта, 2007 кизоня,  сань копиянь ёрямати. Тонафтыкс тейне арась тренерсь А.К.Калин. 2008 кизоня примань участия Паралимпиадаса Пекинца. Сяськихнень ёткс лисемс ашезь удала, шять, сяс мес ёмлаль опытозе, заняйне котоце вастть. Тяда меле, 2009 и 2011 кизотнень лисендень сяськикс миронь чемпионатса, а 2012 кизоня тага удалась няфтемс прязень Паралимпиадаса. Лондонца мон сатыне омбоце вастть.
Лама вийда и пингта максонь 2016 и 2020 кизотнень Паралимпиадатненди анокламанкса, но синь, содаф туфталонкса, апак ётафтфтольхть. Тячи мон тренировандан сяда тов. Аф ваномок сянь лангс, што тейне топодсь ни 39 киза, улихть нинге эрьгяне тюремс медаленкса 2024 кизонь Паралимпиадаса Парижса.
—Арьсетяма тейть сатомс арьсефть!
—Спасиба!
—Алексей, спортта башка ули кодамовок кельгома тевце?
—Тянь коряс шнафтомс пря аш мезьса, сембе тевне сотфт спортть мархта. Воскресенск ошса мон вятьса инвалидонди «Лидер» спортивнай клубть. Работай ялганень мархта тяряфнетяма водендамс тяза ширесонк эряй сембе инвалиттнень, штоба спортть вельде синь мулезь эсь вастснон эряфса.
—Мордовияса сидеста улендят?
—Пяк сидеста аф лисенди, но шачема уженязень колга старандан аф юкснемс. Мекольцеда улень Саранскяйса меля. Мордовияса калмафт атязе и бабазе, а меля—алязевок. Хуш кизоти весть эряви улендемс синь калма марняснон лангса.
—Азонтт нинге эсь сямьяцень колга, шабадот лама?
—Рьвязень лемоц Даша. Минь кафта цёраньке: Кузьманди 11 киза, Федянди—8 кизот. Сембе семьясонк кой-конашкада сотфт спортть мархта. Рьвязе, кепотьксонди, школаса тонафнемста занцесь пря лёгкай атлетикаса. Кузьманьке кельгсы уендеманц, Федор пара мяльса налхкси футболса. Но профессиональнай спортти усковома эсост мзярс аф няян. А мон аф эряскодан кошярямс синь тянди, спортти вихца аф водендакшнихть, теенза кельгомась молеза седиста.
—Спасиба, Алексей! Сатфкст тейть спортса и эряфса!
О.ЕВДОКИМОВА.