Инь оцю задачась—ванфтомс кяльть, ванфтомс культурать

Пензаса ётафтф Мордовскяй (мокшень и эрзянь) народть Межрегиональнай
общественнай организациянц Исполкомонц президиумонц заседанияц
2 октябрьста Пензаса ётась Мордовскяй (мокшень и эрзянь) народть Межрегиональнай общественнай организациянц Исполкомонц президиумонц келептьф заседанияц.
Васенда Мордовияста саф делегацияти ётафтфоль экскурсия Пенза ошть эзга: ванфтольхть сонь ульцянза, И.Н. Ульяновонь музеец, историческяй и мазы, мялень салай лия вастонза, кульфоль историянц колга.
Сяда тов заседаниянь участникне тусть М.Ю.Лермонтовонь лемса Пензенскяй областной библиотекав, коса ётась «Историческая память как основа сохранения этнокультурной идентичности мордвы Пензенской области» темас коре «круглай шра».
Мокшэрзянь масторста саф инжихнень библиотекав сувамста кшиса-салса, мокшень и эрзянь мороса, пара валса васьфтезь Шемышейскяй райононь Сире Яксарка велень «Яксарочка» народнай этнографическяй ансамбльсь, Бессоновскяй райононь Пазелки велень «Чевгелина» фольклорнай коллективсь.
Заседаниянь участникне оцю мяльса кулхцондозь Пензенскяй областень мокшэрзянь народть Гимнанц, ванозь «Долина древней мордвы» фильмать.
Мордовскяй (мокшень и эрзянь) народть Межрегиональнай общественнай организациянц председателец Ю.А.Мишанин азозе, кле, тя пуромксса кеподевихть тячиень шинь эрявикс кизефкст, тянкса и ётафтови Межрегиональнай общественнай организациять Исполкомонц президиумонц заседанияц  Сей пуромкшнесть и тястонь региональнай национально-культурнай автономиять активистонза.
Лувиеньконди лятфтасаськ, што тяни тя автономияти председателькс кочкаф Елена Григорьевна Первушкина, кона сембе виензон макссесыне тевонцты.
Пензенскяй областень Правительствать лемста приветственнай валхт азсь Правительствать Председателенц заместителенц аф лама пингс тевонзон тиендисна В.И.Трохин.
Кода эряй, кодама тефт тиенди Пензенскяй областень мокшэрзянь региональнай национально-культурнай автономиясь? Тянь колга «РМНКА Пензенской области: вчера, сегодня, завтра» темас коре мялень салай   доклад тись тя автономиять председателец Е.Г.Первушкина. Экранца няфневи слайттнень вельде няевсь, што тяса целайнек мольфтеви оцю работа. Пензань мокшетне и эрзятне семботь тиендьсазь, штоба ванфтомс историяснон, культураснон, койснон-обуцяснон.
Тядде Победать 75 кизонь топодемац. Автономиять Од ломанень отделениянц председателец А.С.Гурина тись выступления, конань пингста няфтезе «Вклад мордовского народа в победу над фашизмом» проектонц.
Бессоновскяй райононь Кижеватово велень средняй школать музеенц директороц П.Г.Самушкин пачфтсь, кодама васта занци Кижеватово велень музейсь од поколениять воспитандамаса. Пётр Геннадьевич тердезень сембонь велезост, коса шачсь Советскяй Союзонь Геройсь, Брестскяй крепостть аралаец А.М.Кижеватов. Тейне, ня валрисьмотнень тяштиснонды, несколька кизода инголе удалась улемс Кижеватова велень школаса, тостонь музейса. Няине, што содаф землякснонды А.М.Кижеватовонди шарфневи оцю мяль.
Заседанияса ульсь тиф презентация Кулясово велень школать колга.
Мордовия Республикань наукань Заслуженнай деятельсь, РМНКА-ть Правлениянц председателец, ПГУ-нь профессорсь В.И.Первушкин няфтезе «Культурные ландшафты в традициях народов Среднего Поволжья (Пензенская область и Республика Мордовия»)» проектонц.
Мордовскяй (мокшень и эрзянь) народть Межрегиональнай общественнай организациянц председателец Ю.А.Мишанин казезень активист-тнень.
М.Е.Евсевьевонь лемса Мордовскяй государственнай педагогическяй институтть (аф кунара арась университетокс) родной кялень и литературань кафедрать заведующаец О.И.Налдеева (мокшавась сонць шачемас коре Пензенскяй областень) тись «Интернет-школа мордовских языков: возможности и решаемые задачи» темас коре выступления. Тя школать панжеманц, сяда тов мольфтеманц колга «Мокшень правдаса» пачфнеме тунда. Эрти ули кода интернетть вельде сувамс мокшень и эрзянь кялень тя школати и получамс питнефтома урокт, эрявикс лия информация.
Пензаса ётафтф заседанияса примась участия Ульяновскяй областной мокшэрзянь национально-культурнай автономиять председателец В.И. Софонов. Владимир Анатольевич азондсь кода тя автономиясь кирди соткст государственнай властень оргаттнень мархта регионть кялень-культурнай идентичностть ванфтоманц мархта сотф тевса.
Меколи корхтась Мордовскяй (мокшень и эрзянь) народть Межрегиональнай общественнай организациянц Исполкомонц председателец А.С.Лузгин.
Тянь мархта заседаниясь шумордазе работанц. Пара казнекс арась «Яксарочка» ансамбльть и «Чевгелина» коллективть выступлениясна.
                                                                                                                                         Т.АЛЬШИНА.