Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Тема дня

«ОД КИТНЕНДИ ЭРЯВИ УЛЕМС ЦЕБЯРЬ КАЧЕСТВАНЬ И ЛАМА ПИНГОНДИ ТИФОКС»

16 октябрьста Республикань Кудса ётафтовсь торжественнай собрания, кона лемтьфоль Дорожнай хозяйствань работниконь шити. Торжественнай собранияс пуромфнень поздравляндазень МР-нь Оцюнясь Владимир Волков. Республикань Оцюнясь отмечазе, што китнень строямаснон башка рольсна промышленностть виияфтомаса, бизнесть лац вятемаса, инфраструктурнай проекттнень эряфс ётафтомаса, и конешна, ломаттнень эряфснон качестванц цебярьгофтомаса.
Отраслять виияфтомаса инголи толхмадикс пандемиянь условияса арась «Безопасные и качественные автомобильные дороги» национальнай проектсь. Аньцек тядде кинь строямати Мордовияса водендаф 7,5 миллиард цалковай (тяконь лувксса 4 миллиартт цалковайда лама нацпроектть коряс).
«Минь тихтяма-петтяма сяда лама ки, ётай кизоть коряс—80 участкаса 167 вайгяльбень кувалмоса ки,—мярьгсь Владимир Волков.—Тя арась возможнайкс федеральнай центрать ширень кирдеманц вельде».
«Минь сявондьсаськ мяльс ломаттнень эняльдемаснон, пеняцямаснон и старандатама петемс инь прябала мархта китнень,—азозе Владимир Волков.—И тя работась кармай мольфтевома сяда товга. Лама кинь участкатнень лангса нинге работама. Башка мяль шарфтома ся объекттнень лангс, конат сотнесазь населеннай пункттнень социальнай объекттнень, школатнень, больницятнень, поликлиникатнень мархта. Нят избирательхнень наказсна и тейнек эряви синь пяшкотькшнемс!»
Региональнай Дорожнай фондть субсидиянзон вельде аделави 24 вайгяльбень кувалмоса кинь участкат республикань 14 районца. Стане жа республиканскяй средстватнень вельде петьфт китне Ковылкинскяй райононь Рыбкино и Борки велетненди, 3 вайгяльбеда лама ки Лямбирскяй райононь Татарская Тавла велеса.
Марнек национальнай проектть республикаса 2 кизоста эряфс ётафтомстонза петьф региональнай, межмуниципальнай и местнай значениянь 300 вайгяльбень кувалмоса кинь участкат. И сяда товга ня объемтне кармайхть касфневома. Тяфта, сай кизоня республикаса петевихть ни 265 вайгяльбень кувалмоса кинь участкат. А марнек нацпроектть коряс 2024 кизоти кинь строяманди и ремонтонди Мордовияса нолдави 24 миллиард цалковай, 90 процентсь эздост максови федеральнай бюджетста.
Мордовиянь Оцюнясь стане жа отмечазе, што нацпроектсь веши ёфсикс лия качествань кит. Корхтамась мольфтеви инь цебярь технологиятнень и материалхнень, цебярь характеристика мархта и оцю прочностень асфальтобетононь тевс нолямаснон колга. Башка вешфкссь битумти, щебняти, китнень крайснон кемокстамаснонды. Тяда башка, ётафневи китнень загруженностьснон валхтомаснон и аварийнай пелькс участкатнень кирьфтамаснон коряс лама мероприятия.
«Тяни минь дорожнай организацияньконь работасна лац няеви,—мярьгсь Владимир Волков.—Мордовиянь эряйхне отмечазь од асфальтть качестванц и сянь, кода кирдевихть трассатне. Од китненди эряви улемс цебярь качествань и лама пингонди тифокс. Нят главнай задачатне, конатнень инголенк путнесыне Россиянь Президентсь и вешсазь минь республиканьконь эряенза».
Владимир Волков торжественнай собраниянь участникненди макссь казнет дорожнай строительстваса заслугатнень  инкса и лама киза седикс-ваймокс работаманкса.

22.10.2020 №41
 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин