ЭРЯФОЦ—НАУКАСА

Мокшэрзянь учёнайти, лингвистти Д.В.Цыганкинонди—95!
Филологическяй наукань докторть, мокшэрзянь кялень кафедрань профессорть Дмитрий Васильевич Цыганкинонь лемоц содаф аф аньцек сонь учениконзонды и работас коре ялганзонды. Дмитрий Васильевич сувси ведущай финно-угроветтнень лувксс, сон цебярь специалист мокшэрзянь кяльхнень коряс.
Дмитрий Васильевич сятнень ёткста, кит аралазь Родинать фашистскяй захватчикнень эзда. 1943 кизонь мартста сон эсь мяльс коре тусь врагть каршес тюрема, тяка кизонь ноябрьста прважафоль Западнай фронту, меле—1944 кизонь февральста—3-це Белорусскяй фронту, коса 9-це запаснай разведывательнай полконь звукометрическяй батареять лувксса пачкодсь Кёнигсбергу. 1946 кизоста сявомок 1948 кизоти молемс Д.В.Цыганкин служась Белорусскяй военнай округонь (Поставы ошсь) войсковой частьса, меле 1950 кизоть самс Галле ошса (Германия).
Д.В.Цыганкин казьф Отечественнай войнань II степенень орденца, «За отвагу», «За взятие Кёнигсберга», «За победу над Германией в Великой    Отечественной войне 1941-1945 гг.» медальса.
1950 кизонь июньцта мрдась Советскяй Армияста и поступась тонафнема А.И.Полежаевонь лемса Мордовскяй педагогическяй институтонь (тяни Мордовскяй госуниверситет) историко-филологическяй факультету.
1954 кизонь октябрьста Д.В.Цыганкин прважафоль СССР-нь наукань Академиянь Языкознаниянь институтонь аспирантурав. Филологическяй наукань докторть, профессорть К.Е.Майтинскаять руководстванц ала сёрмадсь «Шигуровский диалект Большеберезниковского района Мордовской АССР» лем ала диссертация, конань лац аралазе 1958 кизоня. Аспирантурать аделамда меле, 1957 кизоня Д.В.Цыганкин прважафоль работама А.И.Полежаевонь лемса Мордовскяй пединституту мокшэрзянь кялень кафедрань ассистентокс. 1962 кизоть самс Дмитрий Васильевич покодсь Н.П.Огарёвонь лемса МГУ-са старшай преподавателькс, меле—мокшэрзянь кялень кафедрань доцентонь должностьса.
1962 кизонь августста Д.В.Цыганкин занязе М.Е.Евсевьевонь лемса МГПИ-нь учебнай и научнай работать коряс проректоронь вастть. Тяка пингть, Дмитрий  Васильевич кармась пяшкотькшнемост мокшэрзянь кялень кафедрань вятиень тефнень. Ня кизотнень Д.В.Цыганкин ушедсь вятемост        аспиранттнень и сяда тов поладозе научнай работанц.
1972 кизоста сявомок 1991 кизоти молемс Дмитрий Васильевич вятезе мокшэрзянь кялень кафедрать Н.П.Огарёвонь лемса Мордовскяй госуниверситетса. 1974-1975 кизотнень Д.В.Цыганкин работась «Морфология имен существительных (словоизменение и словообразование) в эрзянских диалектах» лем ала диссертациянц лангса. 1978 кизоня филологическяй наукань докторть, Тартускяй государственнай университетонь профессорть Пауль Алврень (Эстонскяй СССР-сь) руководстванц ала лац сонь аралазе. 1979 кизоня теенза максф филологическяй наукань докторонь ученай степень, а 1979 кизонь 7 декабрьста ВАК-ть решениянц мархта—профессоронь ученай звания.
1980 кизоня Дмитрий Васильевич Цыганкин ушедсь вятемонза Н.П.Огаревонь лемса МГУ-нь филологическяй факультетть. Деканонь вастть занцезе сисем кизот.
1985 кизоня Мордовскяй АССР-нь Верховнай Советонь президиумть Указонц коряс, научно-педагогическяй тевса сатфонкса Д.В.Цыганкинонди максфоль «Мордовскяй АССР-нь наукань Заслуженнай деятель» почетнай лем, а 1997 кизонь 19 июльста РФ-нь Президентть Указонц коряс—«Российскяй Федерациянь Наукань Заслуженнай деятель» почетнай лем. Мордовия Республикань государственнай премиянь Лауреат (2000 кизось), Мордовия Республикань Оцюнять премиянц Лауреатоц (2005 кизось), Н.П.Огаревонь лемса премиянь Лауреат (1980 кизось).
Д.В.Цыганкин путсь оцю путкс финно-угорскяй и мокшэрзянь языкознаниянь прябалатнень тонафнемаснонды. Сон сёрмадсь 300 научнай, научно-методическяй работа, конатнень ёткста ламоцне арасть теоретическяй и методологическяй юркс мокшэрзянь кяльхнень вузса и школатнень эса тонафнемаса, кода Мордовияса, стане и эздонза ширеса. «Тенденции развития литературных языков восточных финно-угорских народов», «О типах этимологических словообразовательных связей в финно-угорских языках», «О соотношении исконных и иноязычных элементов в системе эрзянского словообразования», «Русско-мордовские языковые контакты на лексическом уровне» и кой-кона лия работанзонды максф оцю научнай оценка международнай финно-угорскяй уровеньца.
Д.В.Цыганкин нолдась вусненди и национальнай школатненди аф кржа учебник и учебнай пособия, конатнень коряс мокшэрзянь кяльхнень тонафнесазь Мордовияса и эздонза ширеса школань и вузонь несколька поколения.
Тонафнемок ареальнай диалектологиянь прябалатнень, сон васенцекс мокшэрзянь языкознанияса явозень эрзянь диалекттнень, кирдемок мяльса фонетико-морфологическяй признакнень и каннемок эрь диалектть тя или тона территорияти. Д.В.Цыганкинонь лемонц мархта сотф морфологиять, кода мокшэрзянь языкознанияса башка разделонь, эвондамац.
Профессорть  Д.Цыганкинонь, можна мярьгомс, пуроптовсь лия нароттнень кяльснон ёткста мокшэрзянь кяльхнень тонафнемаснон коряс эсь научнай школац. Сонь руководстванц ала аралаф 20-да лама кандидатскяй диссертация.
Кода оцю учёнай—финно-угровед, Д.В.Цыганкин кочкаф Хельсинкиса Финляндиянь финно-угорскяй обществань член-корреспондентокс, сон международнай и отечественнай финно-угорскяй конгрессонь, симпозиумонь и научнай конференциянь активнай участник. Лама киза Цыганкин ульсь МР-нь Правительствать видеса НИИГН-нь ученай советонь членкс и сувсесь Удмуртскяй университетонь кандидатскяй диссертациятнень араламаснон коряс специализированнай советти.
Тяниень пингть Дмитрий Васильевич вятьсы «Языки народов России: эрзянский язык» направленияс коре магистранттнень научно-исследовательскяй работаснон. Тячивок примси участия кафедрать научно-исследовательскяй тевсонза. Сонь статьянза лисендихть изданиятнень эса, конат сувсихть SKOPUS и WoS даннаень реферативнай базатненди.
Тячи Д.В.Цыганкин васьфтезе эсь оцю юбилеенц—теенза топодсь 95 киза. Аф ваномок эряфкшушинц лангс, Дмитрий Васильевичень тянивок оржа ёнец, оцю работамшкац. Сон университетонь профессор, од специалисттнень научнай руководительсна, научнай конгрессонь, конференциянь, эрь кодама совещаниянь участник, афкуксонь лингвист-исследователь. А нинге сон пара вайме и простой ломань, мезенкса мархтонза корхнемась уленди аф аньцек полезнайкс, но и мялень петикс.
Шачема шицень мархта, Дмитрий Васильевич! Кеме шумбраши тейть, паваз и нинге лама киза эрямс!
И.РЯБОВ,
Н.П.Огарёвонь лемса
МГУ-нь филологическяй факультетонь мокшэрзянь кялень кафедрань вяти.