СКАЗИТЕЛЬНИЦА, ПАРА ВАЙМЕ МОКШАВА

П.Е.Родькинать 95 кизонь топодеманцты
—Мокшэрзянь масторть мораец, фкя инь смузю, пара вайме авац…
—Машты кядь, пиди-пани мокшава…
—Кельгома тядя, кона маштсь аф тёждя пинкнень путомс пильге лангс ниле итть, колма цёрат и стирь. Лама лезнесь уноконь касфтомаса…
Тяфтама, седиста моли лямбе валса азондсть-лятфнесть мокшень сказительницать П.Е.Родькинать колга пуромксса, кона ётась А.И.Полежаевонь лемса музейса. Мероприятиясь лемтьфоль Полина Егоровнать шачема шистонза 95 кизонь юбилеенцты. Музеи кочксевсть писательхть, культурань и искусствань работникт, сказительницать раднянза, содаф ломаненза.
Полина Егоровна Родькинась путневи ряцок тяфтама содаф мокшэрзянь масторть мораензон ваксс, кода Е.П. Кривошеева, Ф.И.Беззубова, С.М.Люлякина. Сонь стихонза, моронза сувафневихть тонафнемань учебникненди, кайгихть культурань куттнень эса, учёнайхне-критикне сёрматкшнихть колгаст статьят. Шачсь П.Е.Родькинась Торбеевскяй райононь Сире Пичуры велеса 7 октябрьста 1925 кизоня. Семьясост ульсть вейхкса итть. Аляц, Егор Тимофеевич, ульсь грамотнай ломаттнень эзда, лама лувондсь книгада. Аф стак велеряйхне кочксезь сонь велень старостакс. Тядяц, Александра Гавриловна, лама покодсь велень тевса, касфтсь итть, ётка пингть сёрмадсь сюреса, кельгозе мораманц. Сембось тя поладовсь, ётась иттнендивок. Кой-конат аделасть музыкальнай училищат, Пётр Егорович, кепотьксонди, ётай веконь 40-60 кизотнень, нльне морсесь операт Мордовскяй музыкально-драматическяй театраса.  Брадонзон лангс ванозь сяда лама пинге шарфнесь музыкати и Полина Егоровна. Сон ульсь вейхксоцесь семьяса, а мекольце идсь, кода содаф, инь кельговись, ули кинди араламс сонь, кинди лездомс теенза. Праздникста или стак шиня синь марса морсесть мокшень морот, сиде моронят. 1963 кизоня Родькиттнень семьясна ётась эряма Саранск ошу. Тяса Полина Егоровна васьфтсь содаф писательхнень И.М.Девинонь и П.И.Левчаевонь мархта, конат азозь эсь мяльснон, макссть оценкат мокшавать сёрматфонцты. Тяфта, пингонь ётазь, Полина Родькинать творчестванц колга кармасть содама «Мокша» журналонь и «Мокшень правда» газетань лувихне, коса лисендсть сонь азксонза, ёфксонза, стихонза. Тяда меле синь печатлафтольхть «Эрясть-ащесть атят-бабат» марстонь сборникса. 1995-1998 кизотнень лиссть эсь кяльса сёрмадыть П.Родькинать «Кшить питнец» и «Толгафтома атякш» сонцень азксонь книганянза. Фкя  азксса лувись содафты Стёпа цёранять мархта, кона пяк урмаськодсь. Сон мярьгсь тядянцты: «Тядяй, кда мон сиволень аф оцю кши пакшкя, улема, пчкялень…» Но кудса ашель кшинь сускомнявок. Мзярда пара вайме ломаттне кандсть сяряди цёраняти кши, ульсь ни поздна…
Полина Родькинать лама стихонь произведениядонза. Синь лангозост сёрмадсть музыка Мордовиянь содаф композиторхне. Кой-конатнень морсесыне «Умарина» государственнай ансамбльсь. Кепотьксонди, «Кельме раса» произведениясь най васьфневи кайги кядень цяпамаса.
Сяда лама Полина Родькинать колга кармасть содама комозце веконь вейхксогемонце кизотнень, мзярда сонць кармась морсема морот республиканскяй радиоса и телевиденияса. Ся передачатнень эса сон лама азондсь мокшэрзянь масторть мазышинц колга, серьгядсь ломаттнень эса кельгомс, шарьхкодемс фкя-фкянь, ванфтомс минценнеть, мезсь ётась бабаньконь, атяньконь эзда. Сон пяк кельгозе пидеманц-панеманц, тя ульсь афкуксонь стряпуха. Сонь лацонза пидеф пачат шуроста коса васьфтят, кда аньцек мокшень велеса.
П.Е.Родькинати аф весть макссевсь вал мокшэрзянь народть пуромксонзон эса, сон сидеста васьфнесь школаса, вузса тонафнихнень мархта, кода маштсь лездсь минценнеть вельмофтемаса. Сон казьф лама Почётнай грамотаса, питни казнеса.
Н.ЛОБАНОВ.