Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

«Музыкафтома аф шарьхкодьса эсь прязень»

Тячи азонттама лувиеньконди аф лама музыкать и теенза тонафнемать колга. Газетаньконь инжиец—И.М.Яушевонь лемса государственнай музыкальнай театрань гобоень группань ведущай концертмейстерсь О.А.Видяскина. Ольга Александровна шачсь Саранскяйса, тонафнесь Л.П.Кирюковонь лемса Саранскяень музыкальнай училищаса, меле аделазе М.И.Глинкань лемса Нижегородскяй государственнай консерваториять. Театрань оркестраса морамда башка О.А.Видяскина заняф педагогическяй тевса. Сон тонафни студентт и итть гобойса морама Саранскяень музыкальнай училищаса и 4№ музыкальнай школаса.
—Ольга Александровна, ушетксонди, азонтт, пожалуйста, гобой музыкальнай инструментть колга.
—Гобойсь—тя шуфтста тиф духовой инструмент. Сонь историяц тушенды кунардонь пинкненди. Кепотьксонди, нинге Древняй Египетса минь эрадонк инголе III тёжянь кизотнень пингста содафоль гобойть атянь-атяц «мемет-сь». Средняй векста ульсть гобойть лаца лама инструментта пцтай сембе странатнень эса. Кепотьксонди, мокшэрзянь народнай музыкальнай инструменттнень ёткста ули кода лятфтамс шалмейть и нюдить, конат стане жа ащихть раднякс гобойти. Тя морамать гайнямац сембе инструменттнень ёткста лия, сон пяк кайги, мазы и седиень токай. Гобойсь ноляви тевс камернай музыкаса и симфоническяй оркестраса сольнай инструментокс. Сонь вайгяленц вельде латцеви марнек оркестрать морамац. Сидеста композиторхне нолясазь тевс гобойть музыкаса национальнай колоритонь няфтеманкса. Нинге азома ся, што тя инструментсь сувафтф Гиннесонь рекордонь книгати, кода мораманди инь стака инструментсь.
—Азонтт аф лама эсь колгат, кода музыкась сувась эряфозт?
—Мон шачень музыкань кельгиень семьяса. Атязе морсесь балалайкаса, алязе—гармонист, тядязе  морай гитараса. Тяда башка, нинге идень садса салсезе мялезень музыкальнай залса ащи пианинась. Конашкава мялезоноль, мзярда воспитательсь морсесь мархтонза. Улема, эста шачсь эсон музыкати кельгомась. Тяни, ужяленди, сидеста идень саттнень эса ноляйхть тевс музыкальнай записть, фонограммат. И тя пяк и пяк кальдяв! Эряви, штоба иттне куленделезь живой музыкать. Вдь аньцек сон афкукс саласы мяльть, эждьсы седить. Минь театрасонк сидеста няфнетяма шабатненди спектакльхть, коса содафнесаськ синь музыкальнай инструменттнень мархта. Содалесте, конашкава иттнень мялезост ня спектакльхне. Кепотьксонди, «Петя и врьгазсь» ёфкссь няфневи оркестрать мораманц коряс, залу пуромкшни фалу лама ваныда.
—Театрань оркестраса  морси 50 малава музыкант. Лисендихть-аф эльбятькст марса морамста?
—Конешна лисендихть. Мзярс тят репетированда, музыканттне сякокс лядыхть ломанькс. (Пееди). Уленди, кинь кальдяв прянь марямац, кинь туйхть шири мяленза-арьсеманза. А стане жа лисендихть эльбятькст механическяй туфталонкса. Кепотьксонди, инструментса кодамовок фкя нотань пунясь ашезь кеподе и тянкса колсеви гайнямась. Тяда башка, уфамста инструментса кочксеви-пуромкшни летьке, а ведь путерькскятненди ули кода пандомс кодамовок нотань варянять и тя ни сатни музыкать коламанцты.
—Ольга Александровна, мезе азолеть музыкальнай театрав сайхненди?
—Улель пяк пара, кда ломанць сашендоль концертс аф аньцек мазы музыкань кулхцондома, но и сонь шарьхкодемонза. Кда мон саян театрав оперань кулхцондома и инголькиге ашень содафта мезень колга сон, маряви-аф оперась тейне мялень салайкс? Кати-кати. Кепотьксонди, Европаса, театрав сембе сайхне инголькиге содафнихть, мезень колга пачфневи операть или балетть эса, лувондсазь буклеттнень. И эста сценаста морамась педа-пес пачкоди ломанть седис-ваймос. Но миньцонк, ужяленди, театрав аф сембе сайхне сявондьсазь мяльс тя правилать.
—Эрь шарфтсаськ корхтаманьконь музыкати тонафнемать колга. Ули тяфтама сидеста васьфневи прябала, мзярда иттне, аделамок музыкальнай школа, аердакшнихть музыкать эзда, оду вестевок аф сявондьсазь кядезост музыкальнай инструментть. Мес тяфта лисенди? Кодамот тянь коряс мяльхне-арьсематне?
—Да, тя оцю прябала. Минь, педагокне, фалу корхнетяма тя кизефксть коряс эсь ёткованк. Но тяса кирдема мяльса ся, што музыкати тонафнемась—тя аф тёждя тев, сон веши лама виень путомада. А музыкальнай школась водендаф сай пингонь профессионалонь касфтомати, а аф весяласта пингонь ётафнемати. Образовательнай системаса улихть программат, коса сёрматф, мезе маштома шабати тя или тона класса тонафнемста. И тянь вешсазь педагокне эсь тонафниснон эзда.
Эсь ширден мон тяряфнян аф люпштамс шабатнень лангс «эряви» валса. Васендакиге, монь мялезе арамс тонафниезти ялгакс. И кда няйса, што  сон сизеф, колаф мялец, лафчепнесайне уликс вешфкснень. Эряфса аф уленди стане, штоба шабась фалу оцю мяльса тонафнель музыкати. Кода эрь тевса, улихть вяри касомат и улихть алу валгомат.
Стане жа тонафнемань тевсон фалу кирдьсайне мяльсон эсь педагогонень. Синь вестевок вихца ашемазь кошяря, сяс эздон лиссь музыкант. Васенце тонафтыезе Е.М.Елизаров, ужяленди, сон аф кунара тусь эряфста. Валда лятфнемат! Сон васенцекс содафтомань гобой инструментть мархта, и тянкса теенза оцю спасиба. Вдь монь мялезель арамс пианисткакс. И кода меле содавсь, пианисттненди стака мумс работа, синь эздост фалу лама. А гобойса морайда, кепотьксонди, Саранскяйса аньцек кафоненк.
Консерваториянь педагогозе—П.И.Федьков. Сон тонафтомань морама Европань музыканттнень лаца, сяс мес сонць тонафнесь Францияса. Тяни сон морси Мариинскяй Государственнай академическяй театрать Приморскяй сценанц лангса Владивосток ошса.
Музыкати тонафнемаса содама ся, што, кда ломанць арай профессионалкс, эста сон получай стама профессия, кона арай теенза кельгома тевкс. Кепотьксонди, мон лувса эсь прязень павазукс. Аф содаса, кода эрялень музыкафтома.
—Кулендень тяфтама мяльхть-арьсемат тядятнень-алятнень ёткса, кле, кда шабась сидеста сярятькшни эрь кодама кельмофтевомань урмаса, сон эряви водендамс духовой инструментса морама, и шумбрашинь сембе прябалатне ётайхть. Мезе тянь коряс азолеть?
—Монга сидеста кулендьса тя корхнемать тядятнень-алятнень эзда. Виде, што тя туфталонксовок водендакшнесазь иттнень духовой инструментса морама. Аф содаса кие ся врачсь, кона тяфта арьси. Но ялгакс люпшталине сонь кяденц, сяс мес аф кадондсамазь тонафнифтома. (пееди). Содама ся, што уфамань (духовой) инструментса морамста ваймось аф тарксеви шалхкова, най кургонь пачк. Но, кда музыкантть пантф шалхкоц, а морамста нинге заняф кургоц, тяфта теенза ули пяк стака. Сяс мон аф шарьхкодьса, кода духовой инструментсь лездови шалхконь урматнень пингста. Да, уфамань инструментса морайхнень тазат тевлавсна, но, сяка пингть, пяк сизефт. Вдь уфазь морамста аш кода тарксемс ваймоть кода фалу. Копорень и пеконь пукшетне най ащихть кемокстафста, моли люпштама пря уйти. Аф стак вдь духовой инструментса морайхне тушендыхть пенсияс сяда инголи. Нинге минь ули кода ряцок арафтомс спортсметтнень мархта. Тейнек, кода спортсметтненди, эряви тренировандамс эрь шиня, лиякс, вишкста юмайхть-колавихть маштомошитне. Да и концертта меле музыкантсь стане сизси, бта ётась ласькозь лама вайгяльбе. Ну, конешна, тя сизефсь канды седиень петема, кенярдема и вишкста ётни залу пуромф ваныхнень кядень цяпамаснон эзда.
—Сюкпря, Ольга Александровна, корхнеманкса.
Т.ПЕТРОВА.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022