Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031

 
 

 

Наши мокшанские сыновья и дочери

Вал Виктор Лобановонь колга

Сонь ламоль ялгадонза, конатнень мархта васетькшнесь эрь шиня, конатненди гайфнесь телефонца, конатненди кучсесь сёрмат. Карелияса эряй артистть Геннадий Мелехинонь пяли Виктор Лобанов арнесь аф весть, и ламоксть синь васьфнезь шобдавань зарять тостонь эрьхке берякса, коза ёрязь ульмоняснон, лятфнезь, кода Саранскяйса аноклакшнесть телевиденияв спектакльхть  (Виктор Михайлович лама киза покодсь телевиденияса, а Мелехин—минь театрасонк).
Ламоль Виктор Лобановонь ялгадонза Пойвеле шачема велесонза. Сембе сонь содазь, и сонга сембонь содазень. Кие ашезь сашенда ширезонза Пойвелеса пялост, али Саранскяи «Мокша» журналонь редакцияв, коса сон главнай редактороль, васьфнезень пара мяльса.
Лац содасть фкя-фкянь Пойвелень учительть Александр Наумовонь мархта. Аф весть ётнезь ялга тястонь паксятнень, лугатнень, уендсть Исса ляйге. Куцендсть панда пряв, лиякс мярьгомс, Ош-панду, коса археолокне музь ломаттнень кунардонь эряма вастснон. Весть сась «Мокша» журналонь редакцияв моронь латцись Василий Родионов. И аф ськамонза. Мархтонза кафта цёрат. Нят Пойвелень цёратне Владимир и Юрий Келиттне. Мезьса аделавсь васедемась? Цёратне морасть и гармонияса, и эсь вайгяльса. Мзярце кизось ни синь кеняртьфнесть ломаттнень эса! Синць латцихть морот, синць и морсесазь. Виктор Михайловичка максозе теест «Эряк, Пойвеле, эряк!» моронц.  Кали кирди седице аф шнамс мороса эсь велецень!
Ламоль Виктор Михайловичень ялгадонза Писательхнень ёткса. Хуш кизос коре сяда сиретольхть, а арасть маластонь ялгакс. Нят—Илья Девин, Илья Кишняков, Юрий Кузнецов, Сергей Кинякин, лиятне.
Илья Девин 1968 кизоня, кода Мордовиянь Писателень союзть оцюняц, кучезе Мокшэрзянь университетонь омбоце курсонь студентть Виктор Лобановонь сяда тов тонафнема Москуву М.Горькаень лемса литературнай институту. И аф ськамонза, а нинге вете од ломатть Мордовияста тусть. 1973 кизоня аделазь тонафнемаснон и састь эсь ширезонк, кода афкуксонь од писательхть. И ушедсть работама—кие газетаса, кие радиоса. Виктор Лобановонь сявозь телевиденияв. И сидеста ушедоме няендемонза телеэкранца—азонды и няфнесы кода эряйхть и мезе тиендихть велеса или ошса.
Тяка пингть Лобанов сёрмадсь. Сермадсь стихт. Пшкятькшнесь Исса ляенцты: «Няйса, тон велезень малас уле туманнять пачк шаштат. Повфтамайть лажатфонь палас, седис сувама тон маштат». А «Одкс пинге» стихотворениясонза азондозе: «Арьсян, эсон ули эрьгя сокамс паксят, видемс сёрот, нармонь лаца лиемс вярьге, морамс седи ваксстонь морот».
И тага няйсаськ, конашкава сон кельгозе шачема масторть лангса эрь луганять, эрь вирнять, эзгаст ётай эрь яннять и кинять. И азондозе: «Заря ланга, заря ланга бта няян танцти он: кяденьбецек стирня мархта паксянь янга молян мон. Жаворонка, морак вельхкссон, ару кожфкять тага  лазк, мон стирнять аф ёру кельгса,—эрька сембонди тянь азк».
Жаворонкась и азозе тейнек: «Виктор Лобанов рьвяясь!» Сявозе рьвакс Нелля Бураковать. Сон Дагестанонь. Тонафнесь Москуса пединститутса. Свадьбасна ульсь Пойвелеса. Викторонь тядянц Мария Сергеевнать и алянц Михаил Павловичень пяк тусь мялезост рьвянясна. Учительница. Нелля Николаевна меле лама киза работась Саранскяень школаса.
Исса ляец, шачема масторть мазышиц, ломаттнень эрь шинь тевсна  кошардозь од поэтть и азксонь сёрмадома. 1992 кизоня Мокшэрзянь издательствась нолдазе Виктор Лобановонь васенце книганц—«Калонь кунциень азкст».
Меле лиссть стихонь и азксонь книганза: «Шкаень толня», «Эрян надиязь». Ётафтозень мокшень кяльс «Мордва» очерконь книгать, «Мордовия» кафта томса энциклопедиять, В.Н.Ганичевонь «Ушаков адмиралсь» романонц. Мекольцесь печатлавсь «Мокша» журналса.
Мольсь пингсь. Григорий Пинясов «Мокша» журналти главнай редакторкс ульсь кемготува киза.  Кармась вятемонза «Якстерь тяштеня» идень журналть. «Мокша» журналть вятемонза ушедсь Виктор Лобанов.
Виктор Лобанов арьсесь сёрмадомс Григорий Пинясовонь колга. Пинясов кулось, сон сёрмадсь аф кржа. Виктор Михайлович кочказень сонь сембе произведениянзон и Мокшэрзянь издательствась нолдазень синь кафта томса.
Ётай кизоть лиссь Виктор Лобановонь книгацка «Григорий Пинясовонь Шкайгиц. Документальнай повесть». Тяза кочкавсь сембось, мезе сон  содась Пинясовонь колга. Лама киза работасть марса. Ульсь Пинясовонь шачема велеса Мокшень Кужеса (Зубунь районца), Пинясовга ульсь Виктор Михайловичень мархта Пойвелеса.
Виктор Лобанов тя повестьсонза азондозе аф аньцек сянь, мезе сёрмадсь Григорий Пинясов, сон няфнезе марнек эряфонц. Ушедозе Пинясовонь велестонза, а сяда тов—Пинясов «Мокшень правдаса» ответственнай секретарель, Пинясов—Германскяй Демократическяй Республикаса Советскяй Армиянь солдатоль. Тосонга  мушендсь ётка—сёрмадсь армейскяй газетав, солдатонь эряфть  няфнезе.
Весть Григорий Пинясовонь нолдазь увольненияс ошу. Мольсь каналть трвава. И вдруг кульсь идень юватькшнемат. Фкя цёранясь ушедсь ваяма. Пинясов ашезь абонда, комотсь каналу и идезе цёранять. Омбоце шиня немецонь идть аляц сась частень командирти, эняльдсь нолдамс Пинясовонь пялонза инжикс. Каванязе, макссь казнет.
Мрдась Пинясов армияста и тяса ушедсь журналистонь  и писателень эряфоц. «Сембе сёрматфозень пяледа ламоц—алязень азксонза, сонь мархтонза корхнематне»,—виденцякшнесь Григорий Ильич Виктор Лобановонди. Пинясовонь аляц, Илья Максимович, педа-пес ётазень войнань китнень, ранендафоль, сась  куду фкя пильгса.
«Григорий Пинясовонь Шкайгиц» книгать лувомста лядсь мялезон, кода арнеме Лямбирскяй райононь Сенем эрьхкти. Виктор Лобановонь ялгац пачфтсь куля—Сенем эрьхкса пяк повихть кярякатне. Тяфта кармаме мярьгондема карасьти, мзярда Илья Девин азондозе тейнек, тяфта лемнесазь сонь шачема велесонза—Теризморгаса, Виктор Михайлович гайфтсь Пинясовонди: «Срхкак, ялгай! Калонь кунцема мольхтяма!» И аф аньцек теенза гайфтсь. Лобановонь кудснон малас (Светотехстрои) Пинясовонь мархта сань монга. «ПАЗик» машинасонза сась цёранц мархта и  Василий Федосеев. Сон рузонь писатель. Кой-кона азксонзон ётафнеськ мокшекс и печатлакшневсть «Мокша» журналса. Путоськ машинав рюкзаконьконь, ульмоняньконь.
Шись маниель. И апак учсек менельсь шобдалгодсь. Сяконь учт—лоськофты пизем. Лоськофтсь аф пизем, а снавда оцю цярахман цяткофтсь.
Кудста лиссь Лобанов. Рюкзакоц, ульмонза. Рьвац, Нелля Николаевна,  мельганза валгсь. Валгсь и кяшсь кенкшть вельхксонц алу. Цярахманць стаки цяткофнесь кудбряти,      Федосеевонь машинанц цють ашезе варяяфта. Нелля Николаевна шукиезе прянц. Шять, ёрась пшкядемс, козовок афолеме моле тяфтама погоданя. Но кали кирдьсак Виктор Михайловичень, кда срхкафтозень ялганзон калонь кундама! Мезевок ашезь пшкяде каршек рьвац. Туме.
Калхне исть пов. Шять, цярахманць эвфтезень и кяшендсть. Ащеме илядьс, кундаме—кие фкя, кие кафта аф оцю окуннят и сембе лядоме венц лангс.
Ашеме каенда, мес саме. Ярхцамбяленьке ульсь. Федосеев крьвястсь толмар, лакафтсь чай. Симоме и сяда нарде чайда. Тага мярьган, ашеме каенда, мес саме. Мзяра корхнема корхнефоль ся веня! Мзяра ки орадоме эряфстонк, мзяра пара тев лятфнеме! Лятфнеськ и сянь, мезсь мзярда-бди колазе мяленьконь, но ашезь юкстав. Мезсь ашезь юкстав?
Пинясов лятфтазе, кода ворбетля афтерьксне ёрасть кяж теенза пандомс, мес сёрмадсь колгаст газетав. Угадясть вирень кужу фкя илас, аерксне мусть кузня—кружазь, мяльсноль лябамс или нинге сядонга пяк «наказамс». И кода сон васькафтозень, аф няемга кяшсь ситерькснень ёткс. Вирсь, кле, идемань.
Лобанов лятфтазе, кода вайсесь Исса ляи. Цёрашаба ялгань келеса курькснесть нурдоняса ляй берякста. Шопотькшнесь. Ялганза тусть куду, а сон цють кирдевсь. Меколи арьсесь курькстомс сяда крутаста. Нолдазе нурдонянц и афи фатясь, кода чошкафтсь эй варяв. Пара—угадясь ётамда аля. Идезе. Кудса кяшсь пянакудлангс. Сувась алясь, азондозе, кода таргазе эйваряста цёраснон. Витянь аляц кенярдсь, каванязе цёранц идиенц, кенярдсь  тядяцка, но  сияк и авардсь.
Монга азондыне эсь приключениязень. Тейне кемзисемге кизоль. Эрявсь тялонда молемс Кадошкинав. Алякс велестонк тоза кемгафтува вайгяльбе. Ялга ичкозе. Молень Инсар станцияв. Тоза сисем вайгяльбет. Арьсень ардомс Кадошкинав поездса. Пассажирскяйхть ашельхть. Сась товарнай. Най цистернат. Нефта усксихть.  Содуфт цистернатне. Ётксост кодамовок тамбурхт аш. Озамс аш коза.  Станциянь дежурнайсь яфчазе флагонянц. Макссь товарнайти ки. Ашень арьсе—тя пелькс. Кярьмодень варягаса фкя цистернать бокса кшнинь кундаманяти. Нюрян. Поездсь тусь и коль вихонзакшни. Аера вармась эрьхни шамазон. Ардан, кода цистернати петфтаф нармонь. Пара—товарнайсь лоткась Кадошкинав (лийфтемань  кефкие вайгяльбе), афоль лотка—качафтоль Хованщинав нинге комозьшка. Кати кирделень, кати аф.
«Григорий Пинясовонь Шкайгиц» книгати Виктор Лобанов печатлазень нинге «Мокшень ломанень тяштьксонзон». Нят оцю арьсемат мокшень кяльть колга. Лобанов сёрмадсь: «Минь пяк сидеста  юватькшнетяма, эрьхнесаськ мяштеньконь, цють аф панароньконь мяштьстонк сязендьсаськ—ванфтсаськ кяленьконь! Ванфтсаськ коеньконь-обуцяньконь! Ванфтсаськ сембе мокшэрзяннеть! Вдь корхтайхть: тон аф юватькшнек, а мезевок тик тонць. Тик стама тев, кона вчёк и лезды кяльть ванфтоманцты. Корхтак мокшекс, сёрматт мокшекс. Сёрматфнек мокшень кяльса  журнал, рамак книгат». И азондсь тя книгасонза кялень содай ламоц мокшень и эрзянь, а тяфта жа и лия  странань учёнайхнень колга, печатлакшнезень синь портретснон. Штоба содалеськ, кит афкукс пичедсть мокшень и эрзянь кяльхнень ванфтомаснон инкса.
А пингсь малаткшнесь Виктор Лобановонь юбилеенцты. 2020 кизонь 10 майста теенза топодсь 70 киза. Юбилейсь ётась паронь арьсезь. Арьсесть теенза кеме шумбраши, сёрмадомс од книгат, макссесть казнет.
Тяда инголе, ётай 2019 кизоня, Виктор Михайлович кой-мзярс сярядсь. Пчксесь больницясонга.  И мзярда сембось тя лядсь фталу, сон марязе прянц тага шумбракс-тазакс, кода и фалу улендсь. И сёрмадсь стихотворения, конань лемдезе Ульяна уноконянцты.
Пчкамда меле
Тяфта лиссь, эрь,
Шкайнять волянясь,
А вдь лисель и лиякс…
Няян он и бта молень мон
Ёфси кельме калмоть ваксс,
Шуфтомсть кядне,
шуфтомсть пильгоне
Коль аф ётни стака онць.
Кати-кие тифтедсь
инголен,
Инзетькст тодусонза сонь.
Шобда менельсь,
ваймяйхть ангелхне,
Семботь комачазе ловсь…
И тя ёткть мон кулень
вайгяльня:
«Щятяй, щятяняй,
тон ков?!»
Вакссон удось пиче
марьнязе,
Удось танцтиста, мзназь.
А мон сельмоведнень
нарнине.
Удок, лефкскяй, тят ризна.
Тя ульсь мокшень содаф поэтть, писательть Виктор Михайлович Лобановонь мекольце стихотворенияц, а писатель ялганц колга повестец—мекольце книгац.
Аф кунара сон тусь эздонк. Карматама фалу лятфнемонза.
Анатолий Тяпаев.

22.10.2020 №41
 
 
 

 
НОВОСТИ
 
 
 
 

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021  № 1
 
 
 
 

Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020  № 48
 

«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020  № 48
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин