Пою велень «Изолайн» предприятияти—15 киза

Ульсь пинге, мзярда Пою велень эряйхнень    сатфксснон колга содасть марнек республикаса. Тяса най урятцесть сёронь, модамарень, якстеряпсонь, шурьхкянь козя урожайхть, государствати мишендевсь лама лофца, сиволь, саразонь алхт и лия продукция. Тяни пцтай тя сембось лядсь аньцек лятфнемаса, тусь историяв. Ферматне срадсть-каладсть, шамсь машинно-тракторнай парксь, лама пакся ёфси аф соксеви. Фкя пингста велесь лядсь урозкс.
Велеряйхнень сяда оцю пялькссна тушендсть покодема ошу, шабрань хозяйствава. И мзярс нинге тяфта улель, кда кеветие кизода инголе   Пою велеса афоль панжев  «Изолайн» предприятиясь. Эста ламонцне ашесть веронда сянди, што мзярда-аф мзярда тя  строительнай  продукциянь нолямань цехсь кеподьсы аф аньцек велень, но и марнек райононь экономикать. Главнайсь ульсь сянь эса—кода меки мрдафтомс шачема вели ошу туф од ломаттнень, кода кеподемс синь мяльснон  велень  эряфти. Путф задачась курокста ётафтовсь эряфс, кемотть од ломань мрдасть эсь велезост и сембонди теест мувсь работа «Изолайн» предприятияса.
—Кеветие кизоста няевсь кодама цебярь коллектив кочкавсь минь предприятиясонк,—мярьгсь «Изолайн» ООО-ть директороц Г.Г.Палаев.—Ковста-ковс  пяшкотькшневихть платтне, касы продукциять ассортиментоц, кемокстай эсь базаньке. Тядде помещениятнень эса ётафтоме оцю реконструкциянь работат, панчсевихть од склатт, полафневи оборудованиясь, территорияса сяда лац тиевихть китне.
Сембе ня цебярь тефнень эса оцю путксоц сонцень Григорий Григорьевич Палаевонь. Нинге шабакс кельгозе работаманц, най тиендсь стане, кода тонафтсь эсонза аляц, войнань и трудонь ветеранць Григорий Николаевич Палаев. Тяни сон аш шиса, но велеряйхне сембе пингть колганза лятфнихть пара валса.
Предприятияса коллективсь—35-45 кизоса од ломатть. Цехса покодихть кафта, а кой-мзярда и колма сменаса. Качествась васенце вастса, нолдать гастяф продукция, премиясь керови, ламода кирьфтави. Маштозь тиендьсазь эсь тевснон Николай Родин, Наталья и Вячеслав Базаефне, Яков Келин, Лариса  Толшева, Галина и Евгений  Чекашофне, Сергей и Марина Тюрькиттне, Иван и Татьяна Синякиттне. Синь фалу путневихть примеркс лиятненди, велень шнама ломатть.
«Изолайн» предприятиясь эряй эсь правиланзон мархта. Тяса аш васта копоряйхненди, нолатненди, сятненди, кинь мялец сяда кржа работамс, но сяда лама анамс.
—Васенце кизотнень колма-ниле тяфтама ломань ёрасть шовордавомс ёткозонк, но курокста теест няфтеськ кенкшть,—пеедезь азонды Григорий Палаев.—Нолапарьхненди ширесонк аш мезе тиендемс, катк лия вастса пингснон ётафнесазь. Тейнек эрявихть афкуксонь работникт, конатненди аф няфнема и аф лятфнема мезе тиемс и кода тиемс. Тячиень коллективсь шарьхкодихнень эзда, сяс и инголест путф задачатнень ломаттне пяшкотькшнесазь эсь пингстонза, оцю качества мархта. Азан спасиба теест тянкса.
«Изолайн» предприятиясь киветие киза рынкаса. Но тя аньцек ушеткс, сяда оцю тефне инголет.
Н.Лобанов.