Коронавируссь стаки аськоляй масторть ланга, ванфтость прянтень!

2019 кизоть пестонза од коронавируснай инфекцияса урмаськодсть Китаень Ухань ошса эряйхне. Тяни тя вируссь пачкодсь масторлангть пцтай сембе уженянзонды. Сярядида арась сяшкава лама, што 2020 кизонь 11 мартста Здравоохранениянь всемирнай организациясь коронавирусть мархта ситуациять лемдезе пандемиякс. Тяфтама  масштабса урматне келемкшнихть эста, мзярда ломаттнень организмас повондыхть вируст и бактерият, конатнень каршес аф анок иммуннай системась. Кда варжакстомс историяв, ломанень тналть  ланга ётась лама вии эрь кодама урма.
Кепотьксонди, аф весть ётнесть чумань пандемият. Синь эвондакшнесть VI-VII векнень Средиземноморскяй масторхнень эса. Сембода келиста и кяжиста чумась якась масторланга XIV векть кучкаста. Теенза путфоль лем «Чёрная смерть». Тя пандемиясь васенда ушедсь Китайса, меле повсь Индияв, а сяда тов—Европав. 1346-1353 кизотнень сон юмафтозень-арафтозень Европаса эряйхнень 30-60 процентснон.
Аф весть масторлангса эвондакшнесть холерань пандемият. Тя урмась, кда сонь аф пчкафнемс, кулофтсы ломанть несколька частста.
Ушедомок XX векть кучкаста,  пелькс урматне, конатнень ули вийсна касомс пандемиякс, ушедсть эвондакшнема сяда сидеста. И тянди туфталда лама. Инь васенцесь—эвондась разнай видонь транспорт. Ломаттне ушедсть арнема масторть келес. Вете-кота част самолётса—и тон ни масторлангть тона песонзат.
Кепотьксонди, ёфси аф кунара—2002-2003 кизотнень, ётась ТОРС «атипичнай пневмониянь» пандемия. Урмань срхкафты вируссь  несколька частста кандовсь мирть келес. Васенце сярядись ульсь Китайста.
Омбоце уликс туфталсь, мес тяни касондыхть пандемиятнень лувкссна, тя—ломаттнень и животнайхнень марса улемасна. Климатть полафтомац, вирень керсемась, шяень косьфтамась и ломанть лия тевонза срафтсазь-калафтсазь животнайхнень экосистемаснон. Синь кадондсазь тонатф эряма вастснон и тяконь лувксса, тушендыхть эряма ломаттнень малас. А вдь ламоц животнайхнень эса эряйхть вируст, конат пелькст ломаттненди. Аш кода аф лятфтамс гриппть колга. Ломаттне урмаськоткшнесть и тувонь, и саразонь гриппса. Ётай векста ульсь гриппонь колма оцю пандемият: 1918 кизонь «испанскяй гриппсь», 1957 кизонь «азиатскяй гриппсь» и 1968 кизонь «гонконгскяй гриппсь». Азонттама нюрьхкяняста «испанскяй гриппть» колга. Эпидемиясь ушедсь  Васенце мировой войнать мекольце ковонзон пингста. Урмать сюнеда нюрьхкяня пингста юмась-арась сняра ломань, мзяра ашезь шавов марнек войнань пингть. Испанскяй гриппсь пяляскоткшнесь аньцек киза пяле мархта, но урмаськодсь 550 миллион ломань, планетаньконь эряензон колмоце пялькссна. Сярядихнень 20 процентсна кулось. Кой-кона даннайхнень коряс, юмась-арась 100 миллионть малава ломань, лиякс азомс, 5 процентсь сембе ломанень тналть эзда. Тя урмать эсь лацонь ширец ульсь сянь эса, што сяда стакаста сярядсть 20-40 кизоса од ломаттне, мезсь арась ломанень тналть генофондонцты оцю юмафксокс.
Тячи масторлангса  якай од коронавируснай инфекция, конанди путф международнай лем СОVID-19.
Справканди.
Тяниень пингть коронавирусонь семействась лувонды 43 вид, конатненди урмаськофтовихть млекопитающайхне, нармоттне, земноводнайхне. Содаф 7 коронавируст, конат урмаськофтсазь ломанть, кафттне эздост панчфт учёнайхнень мархта нинге ХХ веконь 60-це кизотнень.
Азома сявок, што нинге 2007 кизоня Гонконгскяй университетонь кой-кона ученайхне, тонафнемок ня вируснень, лемдезь синь пельксокс ломаттненди. Исследованиятнень эса башка шарфтфоль мяль ся региоттнень лангс, коса ломаттнень культурасост ули кой экзотическяй животнаень сивольда ярхцамась—вндрявда (летучая мышь) и эрь кодама куйда-ёзмолдыда. А ня животнайхне ащихть эряма вастокс коронавирусненди и синь вельдест вирусне повондыхть ломаттненди.
Тяни врачнень и учёнайхнень вийсна водендафт тя урмать сяськоманцты. Арьсекшневихть пчкафнемань метотт, од лекарстват, вакцинат. Правительствась эсь ширденза примси мерат, конат ба лоткафтолезь инфекциять келемоманц. Тейнек, ломаттненди, эряви содамс информациять тя урмать колга и ваномс сембе уликс мератнень и рекомендациятнень. Содама, што коронавируссь ётай кожфова путерькснень вельде, мзярда сяряди ломанць козы-кшняй. Сяс эряви фалу каннемс общественнай вастса маскат. Штоба кшнямста, кайгиста корхтамста  кургста или шалхкста лиси путерьксне афольхть пова маласа ащи ломаттнень лангс. Стане жа эряви кирдемс фкя-фкянь эзда 1,5 метрань ётка. Тяда башка, урмась педи рдазу предметтнень вельде, кепотьксонди, кенкш кундаматнень. Эзост фатямда меле, кда шовамс сельмотнень, кургть или шалхкть, урмаськодомати пелькссь ламода касы. Кирдесть прянтень кядьта шумбракснемать эзда. Общественнай вастова каннемат перчаткат. Сидеста штакшнемат сапоньца кяттне, кда аш возможность, ноляма тевс дезинфицирующай средстватнень.
Содаф, тя урмась няфнесы прянц аф эстокиге, эрьси, што инкубационнай пингоц моли 14 ши. Сяс мянь кафта недялят ломанць может аф содамс эсь сярядеманц колга и каннемс вируснень сембе вастова, коса уленди. Тя туфталонкса пандемиять пингста аф эряви якамс тоза, коса лама ломаньда,
Сёксенда сидеста ломаттне сярятькшнихть ОРВИ-са и лия кельмофтевомань урмаса. Од коронавируснай инфекциять симптомонза пяк шарфтыхть вяре лятфтаф урматнень лангс. Сяс, кда кеподсь температурась, марятада кргапарьса сярятьф, ушедоде козома, эстокиге тердеда врач. Тяда лисенде  ломань ёткс, работама или тонафнема васту. Ванфтость прянтень, уледа шумбрат и арьседа маластонт ломаттнень колга.
Материалть аноклазе Т.Петрова.