Морай Н.А.Шумкина

Н.А.Шумкинать лемоц лац содаф аф аньцек Атюрьевскяй районца, но и сембе мокшэрзянь крайса. Сиянь пайгонякс кайги вайгяленц аф весть кулендезь  республиканскяй сцена лангса. Сон тяфта жа морсесь странаньконь ламоц уженянзон эса. Кодама аньцек концертса, фестивальса ашезь примсе участия. И вестевок казнефтома ашезь сашенда. Сонь цёрац, Владислав Шумкин, примась участия Россиянь телевизионнай «Синяя птица» фестивальса-пялькстомаса и занязе тоса омбоце вастть. Шумкиттнень семьясна примась участия «Инь цебярь семьясь» Приволжскяй федеральнай округонь пялькстомаса, лиссь васенцетнень ёткс. А тяддень 17 октябрьста Шумкиттнень семьяса ульсь нинге фкя пяк оцю ила. Кельгома рьвяти, тядяти, авозти, бабати топодсь 50 киза. Странаньконь разнай уженянзон эзда састь Нина Алексеевнань лемс поздравленият.
—Нина—васенце идезе,—мярьгсь тядяц М.С.Абрашкина.—Монцьке нинге ёфсикс  одолень, солдаткалень. Мирдезе, А.И.Лемяскин, служась армияса. Стакаль, пяк стакаль эряфозе. Но спасиба Шкайти и цебярь ломаттненди, ульсть ужяльдине, лездыне, ширень кирдине.
Нина Алексеевнань аляц кулось ёфси одста. Ся пингста ётась лама киза. Но тянемс алянь раднятнень мархта кирди кеме соткст, якайхть фкя-фкянь пяли инжикс.
Нина Алексеевна шабакскиге пяк асуволь стирнясь. Тонафнесь Атерь велень 2№ средняй школаса. Нинге начальнай класса васенце учительницац М.С.Данина приметазе, конашкава лац морай ученицац. Тя кулясь пачкодсь Саранскяи, асу идень интернатонь эстонь директорти П.П.Тришевонди. Мокшалясь сась школав асу стирнять ваномонза, кулхцондомонза. Мялецоль фкя, сявомс интернату тонафнема. Каршек молема Мария Семёновна ашезь карма.
—Тусь Нина Саранскяи, кудозе шамсь,—мярьгсь мокшавась.—Сей ётан, тов ётан, мяльсон стирнязе, васень иднязе. И вдь молень инксонза, сявине меки куду.
Аф лама пингонь ётазь сась ширезост  П.П.Тришев. Кяжи, корхтафоц казяма.
Мария Семёновнанди корхтай:
—Улелеть стирезе, шна перьфкат шарфтолень. Мезенди асу стирнять талантонц модати калмасак. Теенза эряви тонафнемс, касомс, сонь ули валда и павазу вандыец.
Пётр Петрович ашезь васькафтов. Мария Семёновна тага кочказе стирьшабанц кис. Нинась сонцьке каршек молема ашезь карма.
Аделась интернатса вейхкса класст. Ульсь фалу васенцетнень ёткса. Ашель стама концерт, пялькстома, коса ба афоль прима участия. И фалу занцесь васенце вастт. Казендевсь дипломса, Почётнай грамотаса, лия питни казнеса.
Интернатта меле Нина Алексеевна тусь тонафнема Саранскяень Л.П.Кирюковонь лемса музыкальнай училищав. Сяньге аделазе пяк цебярьста. Шумордазе Саранскяйса Национальнай культурань институтть. А эряма, работама вастонди кочказе шачема Атерь веленц. Культурань отделть эста вятезе В.Е. Панфилов. Од специалистть, мокшень асу стирть Виктор Евгеньевич васьфтезе лямбоста. Нинась морась райцентрань культурань кудса. Мянь кафкса кизот покодсь Атерень культурань кудса. Тя— концертт райцентрань сцена лангса, райононь велетнень эзга. Сидеста морама якась Саранскяи, шабрань райоттнень эзга. А тоса сявозь покодема райононь искусствань школав, коса вов ни 22 киза сон и директор, и преподаватель. Кельгома музыкальнай инструментоц—скрипкась. Сонь мархтонза тонафнесь и интернатса, и музыкальнай школаса. Стиренц мяленц вестевок ашезе колсе и Мария Семёновна. Мянь Москуста ускфнесь мокшавась Нинати скрипка.
Виденц азомс, эсь стирензонды мокшавась мезевок ашезь ужяльне. Сембоц шачфнесь кота стирьхть. Фкясь кулось кизоняса. А лядыкс вететне арасть цебярь ломанькс, прянь шнафтома вастокс. Колмотне аделазь школаснон зрнянь медальса. Нинге кафттне тонафнесть «нилес» и «ветес». Сембонь высшай образованиясна. Елена—преподаватель, Татьяна и Юлия—юристт, Галина—экономист. Аньцек Нина сотозе эсь эряфонц культурать, искусствать мархта. И вестевок нинге ашезь каенда, што кочказе тя профессиять. Коса аньцек ашезь уле. Ульсь лама всероссийскяй фестивальхнень-пялькстоматнень эса. Сявондсь аньцек васенце и омбоце степенень диплопт. Лама тись сянкса, штоба Владислав Шумкин, омбоце цёрац, поволь центральнай телевиденияв «Синяя птица» пялькстомати. Сон пяк достойнайста аралазе Атюрьевскяй районть, республикать честенц. Лиссь финалу. Тя аф фкя шинь труд. Мзяра вий путсь, средства карьхцясь, содасы аньцек тядяц, Нина Алексеевна. Тяни сон нилеце курсонь студент, тонафни Москуса Гнеситтнень лемса академияса. Примси участия концерттнень эса, морси оцю сцена лангса. Ламоксть няфнезь центральнай телевиденияса. Сонць максси концертт. Получай нинге фкя высшай образования—юристонь.
Н.А.Шумкина—кельгома рьвя. Мирденц, Виктор Васильевичень мархта, эряйхть пцтай колмогемонь киза. Сонь профессияц сотф велень хозяйствать мархта, ичкозе ащи музыкать, искусствать эзда. Но сон семботь тиендьсы сянкса, штоба лездомс рьванцты, кирдемс сонь ширенц. Оцю кельгомаса шачсть кафта цёрасна. Владиславда башка нинге цёрасна Алексей. Сон аделась Вологдаса УФСИН-нь академия. Тяни покоди Явас посёлкаса УФСИН-нь управленияса. Сонцень семьяц. Нина Алексеевнанди казсь кафта уноконят. Костянди 11 октябрьста топодсь 3 кизот, София шачсь тяддень 25 сентябрьста. Оцю казне мокшавать юбилейс.
Нина Алексеевна и Виктор Васильевич сявсть касфтомс идень кудста стирня. Ксенья Журавлёва павазуста марясы прянц Шумкиттнень семьяса. Сон келькф, щаф-каряф. Кода и Нина Алексеевна, машты морама. Якай искусствань школас. Ксенья, аф ваномок эсь кизонзон лангс, примась участия лама Всероссийскяй пялькстомаса, морась республиканскяй, Атерень культурань кудонь сцена лангса. Кочкась лама питни казне. Од тядяц и аляц шнафтыхть мархтонза пря.
Тя кизось аф тёждяста ётай Н.А.Шумкинати. Кда аф пандемиясь, мзяра оцю ила ётафтоль сонць, мзяра иласа прималь участия. Тянивок, конешна, трудендай, но сембе работанц тиендьсы компьютер вельде. Тоса и морай, и азонды искусствань школать работанц колга. Но эряфсь аф ащи фкя вастса, аськоляй инголи. Нина Алексеевнавок ашезь кенере кафта пяли ваномс, эряфсонза оцю ила. Юбилей мархта, Нина Алексеевна!
И.ВЕШКИН.