«Мялезе, штоба родной кяльса моротне кельговольхть од ломаттненди»

Мордовскяй государственнай филармониянь солистсь, Мордовия Республикань Оцюнять премиянц лауреатоц Андрей Бочканов республикасонк содаф лац. Од морсить творчествац кельгови и од ломаттненди, и эряфкшуфнендивок. Андрей аф аньцек асу морай, сон нинге сонць тяшти морот и латци музыка. Сёрмады артистсь эсь родной кяльсонза—эрзякс, но улихть и рузонь моронзовок. А нинге сон ётафнесыне эрзянь кяльс рузонь и омба масторонь моротнень. Ня шитнень Андрей ульсь редакциясонк, коса корреспондентоньконь мархта корхнемста азондсь эсь колганза, кода студентсь-строительсь арась артистокс и кодамот творческяй планонза.

—Андрей, ламотненди содафт и кельговихть тонь моротне, но, улема, аф сембе содайхть колгат. Эрь азонтк, костоннят тон, кит тядятне-алятне, улихть раднятнень ёткса лацот вайгялю ломатть?
—Шачень и касонь Рузаевка ошса. Тядяне-аляне шачемас коре Кочкуровскяй райононь Качелай веленнет. Алязе, Василий Андреевич, эсь пингстонза сась Рузаевкав машинистокс работама, а сяльде мельганза сась тядязевок. Алязе эряфоньберьф работась машина ки лангса, тядязе, Людмила Никитична, образованияс коре педагог, школаса вятсь рузонь кялень и литературань урокт. Тяни синь кафцьке пенсиясот. Морайхть ульсть тядязень ширеста. Щятязе, кепотьксонди, морсесь и вайгяльса, и музыкальнай инструментса—гармонияса и балалайкаса. Сире щятязе ульсь певчай церькавонь хорса. Улема, синь лацост тунь вайгялюкс. Школаса аф шуроста примсень участия эрь кодама мероприятияса, тяка пингть якань музыкальнай школав. Но арамс артистокс, виденц азомс, мзярдовок ашень арьсекшне. Мзярда шумордайне школаса тонафнемать, поступань тонафнема Н.П.Огаревонь лемса МГУ-нь архитектурно-строительнай факультету. Аделамдонза меле ламос вешендине эсь вастозень, мзярошка пинге работань клянцеконь заводса, сяльде—банкса, страховой компанияса.
—Кода ина сценать лангс повоть? 
—Студентонь кизотнень оцю мяльса примсень участия «Студенческая весна» конкурсса. Сувсень «Проспект» вокальнай ансамбльти. Морсекшнеме, весялготкшнеме… Фкя репетициять пингста лангозон шарфтсь мяль Мордовскяй государственнай филармониянь солисткась, МР-нь Заслуженнай артисткась Оксана Глебова. Маладсь тейне, шназе морамазень, тияк макссь кой-кодама советт вайгялезень ладяманц коряс. Ся пингста сявомок ушедсь минь марстонь работаньке. Оксана Кирилловна арась тейне творческяй наставникокс и вокалть коряс педагогокс. И сянкса, што тячи мон артистан, азома сюкпря васендакиге теенза. Университетса тонафнемать шумордамда меле сон тердемань самс работама филармонияв, но мон ламос атказакшнень, сяс мес, кода ни азыне, ашине няенде прязень профессиональнай артистокс. А мзярда меколи согласиндань и лисень работама договорс коре, курокста сувань тя тевти и тяни сценась, можна мярьгомс, марнек монь эряфозе.
—Эсот ули оцю кельгома родной кяльти, мезсь эряви аньцек шнамс. Тон, няк, моротка сёрмадат эрзякс…
—Эсь кяльти кельгомась, улема, васендакиге шаченды семьяса. Тейне тянкса азома сюкпря бабазти. Наталья Васильевнати. Тядязе-алязе хуш эсь ётковаст корхнесть эрзякс, монь мархтон мес-бди сяда сидеста корхнесть рузкс. А вов бабазе, меколанкт. Весть сон мярьгсь тейне: «Оду мон тонь мархтот рузкс корхтама аф карман…» И валонц кирдезе. И вов мезть колга тага мялезе азомс. Мзярда тонафнень университетса васенце курсса, филологическяй наукань кандидатсь, мокшень кялень преподавательсь Надежда Федоровна Кабаевась пяк мялень салайста вятсь тейнек мокшень кяльть коряс занятият, да аф най кяльть, сон аф кржа азонкшнесь мокшэрзятнень эвондамаснон, историяснон колга. Тейне эста нльне визькс арась, мес мон, мокшэрзянь цёрась, тяшкава кржа содан эсь народозень колга. Ушедонь морафнема лама эрь кодама литература, аф кржа  информация вешендень интернетста. Педа-пес лувине  Кузьма Абрамовонь «Пургаз» романонц и сонь лия книганзон.
Филармонияса работамста шарфтонь мяль сянь лангс, што миньцонк, национальнай республикаса, пцтай аш национальнай эстрада. Кепотьксонди, Удмуртияса, Марий Элса, аф корхтамок ни Татарстанть и Чувашиять колга, национальнай эстрадати вешфкссь ламода сяда оцю. Тяконь лувксса дискотекатнень пингста. Од ломаттне пара мяльса кштикшнихть родной кяльса моротнень коряс. Сань мяльс тяряфтомс пяшкодемс тя афсатыксть. Монь пяк оцю мялезе, штоба од ломаттненди кельговольхть родной кяльса моротне. Эста васенцеда варжайне вийнень сермадомань тевса. Мзярда няфтине ваныти «Вай кодамо» эрзянь кяльса васенце морозень, сон тусь мялезост. Тя, мярьгат, пацят макссь тейне. Аф лама пингта меле сёрматфоль омбоце морось, меле—колмоцесь, нилецесь… Сембоц ниле кизоста тяштень комсь ветиеда лама мора. Лиссь фкя альбомозе.
 —Музыкатьке тонць латцесак? Мезсь эвондакшни ингольцекс—строчкатне или музыкась?
—Монць. Кельгса, мзярда и музыкась, и валхне «шачендыхть» фкя пингста. Но валхнень сёрмадомасна, эряви азомс, макссеви тейне сяда стакаста.
—Мезень колга моротне?
—Старандан сёрмадомс сянь колга, мезсь салсесы од ломаттнень мяльснон. Тя, васендакиге, кельгомась. Стане жа улихть мороне, конат лемтьфт идькс пингти, родинати.
—Ваныти пяк кельговихть моротне, конатнень тон ётафтыть рузонь и нльне омба масторонь кяльста. Тя тевти кярьмодеть ёфси аф кунара…
—Виде. Тя мяльсь сась тейне кудса ащемань режимть пингста, кона ладяфоль коронавируснай инфекциять келемоманкса. Тевфтома нюрьксемазень аф кельгса, вов и кярьмодень перевоттненди. Ётафтыне «Cream Soda» группать «Я плачу на техно» моронц, морайне сонь эсь ютуб-каналсон, ваныхне шнамазь. Кармань работама сяда тов. Кемоньшка мора ни, улема, ётафтонь.
—Морамада башка ули кельгома тевце?
—Кельгса морафтомазень. Художественнай литературада башка пара мяльса лувондсайне национальнай периодическяй изданиятнень.
—Творчествацень кельгиензон ёткса лама од стирьда и, улема, васенце кизефкссь, кона синь пичефтьсыне, заняф-аф Андрей Бочкановонь седиец. Тон аф          рьвяяфат, а якай ялгаце ули?
—Мзярс аш. Мон анокан од содафтоматненди. (пееди).
—Арьсетяма тейть сатфкст творчестваса и эряфса! Сюкпря корхнеманкса!
О.ЕВДОКИМОВА.