Мокшэрзятнень мешень кирдемань койсна исяк и тячи

Мокшэрзятне ёт мзярда ни кирнесть мешт, и тя тевса маштомошисна содафтольхть марнек Российскяй государстваса. Минь народоньконь бортничестванц колга лятфневи нльне кунардонь пингонь тяштьф книгатнень эса. Кепотьксонди, арабскяй писательхнень тяштьфкссост, рузонь летописьса, путешественникнень сёрмасост. XIII веконь «Слово о погибели Русской земли» древнерусскяй литературнай памятникса лятфтаф, што мокшэрзятне паннесть даця (дань) Киевскяй князти медьса и штаса. Минь виреньке XVI-XVII векста Российскяй государстваса ульсть медень кочкамань аймакокс.
Кунардонь пинкнень атянь-атяньке кочксесть медь вирьста, дикай мешнень эзда, меле ушедсть тиендема нешкопарьхть, а XIX векста эвондасть рамка мархта нешксна.
Мокшэрзятнень нешкснон колга улихть сведеният XVI веконь документтнень эса, сяс мес эста бортничестваса мешкуднянь тиендемась ульсь од тевкс. Нешкопарьхне тиендевсть эчке шуфтста. Плотникне синь тиемстост нолясть тевс эсь лацонь кшнинь узерьхть, конатнень оржа ширесна ульсть тяйнят и кувакат.
Тяфта валом-валом нешкопереса мешень кирдемась полафтозе вирьста медень кочкамать. И XVIII векста мокшэрзянь масторсь сувсесь ся территориятнень ёткс, коса лац ладяфоль медень добувамань тевсь.
Корхтамок кунардонь пинкнень колга аш кода аф лятфтамс народоньконь языческяй шкаензон. Мешень кирдемаса мокшетненди и эрзятненди лездсь Нешке-шкайсь (мокшетнень), Нишке-пазсь (эрзятнень). Тяда башка, эрь нешкопереть ульсь сонцень шкаец—Нешкопере-ава. Сиретне азонкшнезь, што сон ломаттненди няфнесь пря сельмос пови акша тюсса яксяргокс, кона якась нешкоперева и ванондозень мешкуттнень, улихть-аш эсост лазфкат, кода марясазь пряснон эсост мешне.
 Стане жа шкайхнень лемс ётафневсть озкст. Инь васенцесь—июнть кучкаста, мзярда мешне ушеткшнихть нешкондама (роиться). Озкс казнекс (жертва) шкайхненди                    макссевсь васенце мешвеленясь, кона лисендсь нешкопереста. Стане жа минь атянь-атяньке ётафнесть озкст медень таргамать ушедомста. Нешкопери васенце медть эзда сяканяса кадондсть каванямбяль Нешкопере-авати. Озкснень пингста озонкшнесть шкайхненди мешнень араламаснон-ванфтомаснон колга, а стане жа анцесть кядьстост медень козя урожай.
Инь васенце каванямбялькс, кода шкайхненди, стане и ломаттненди, озкснень пингста ульсь пуресь.
Мордовиянь Заслуженнай художникть А.С.Алёшкинонь «Монь Масторавазе» книгасонза максф пурень рецепт, конань мархта содафтсаськ лувиеньконь. Аньцек пидеф квасти минь атянь-атяньке шудефнесть кярястста медь (мёд из сот) и кайсезь сонь кукшеннява. Кядьгонятнень таваткшнезь  розь почфста тиф шапаксса и калмосезь синь модати мзярошка шис якама (бродить). Тя симомбяльсь кунардонь пинкнень ульсь келиста содаф.
Медсь нолявсь тевс аф аньцек ярхцамбялень и симомбялень анокламанди, а стане жа эздонза тиендсть эрь кодама пчкафтомбяльхть.
Германиянь учёнайхне архивста мусть XVI веконь аптекарскяй рецептт. И мезсь сембода дивандафты синь эсост, пцтай эрть эса васенце вастса ащи мокшэрзянь медсь, конань ёткс, кирдемок мяльса урмать, шорсесть разнай компонентт. Учёнайхне тянь лангс шарфтсть мяль, вдь немецнень ульсь синцень медьсна. Тяда башка, ся пингть содафтольхть рузонь, белорусскяй, украинскяй, башкирскяй меттне. Но лекарствань анокламанди кати-мес кондястсь аньцек мокшэрзянь медсь. Учёнайхне ушедсть вешендема туфталхнень, мес и кода медсь повондсь Германияв. Содавсь, што мокшэрзянь медть ёмла парняняса и оцю питне лангс мишендезе немецненди Иван Грознай.
А.С.Алешкин вяре лятфтаф книгасонза пяк лац азонды, кода мокшэрзятне аноклакшнезь тя пчкафты медть.
Тя койсь ульсь средняй векнень пингста. Мокшень или эрзянь алять цёранц шачемда меле, кизонда, тянди башка лемтьф шиня, кочксевсть радня ломаттне и рана шобдавакиге тушендсть вири. Кода содаф, минь народоньконь радня ётконь соткссна ульсть кемот, сяс ломаньда пуромкшнесь лама. Аватне и шабатне тушендсть вири эрь кодама иможень кочкама. Финц алятне срхксесть вири медень добувама, а омбонцне шувондсть модати варя, ацсезь сонь тумонь седяфса. Седяф ёткнень ланга вадендезь сёвоньца, штоба пачкаст афоль шуде медсь. Тя эсь лацонь парьти аватне и шабатне кайсезь кочкаф кстыхнень, нормальхнень, инезихнень, шулятнень, а лангозост бортникне шудефнезь вирьста кочкаф медть, и тяфта слоень-слоень, мзярс аф пяшкоди парьсь. Меле сонь таваткшнезь тумоста тиф вельхксса, вадендезь сёвоньца. И калмосезь модаса. Тя медть кадондозь комозьшка кизос, цёраснон рьвяямозонза. Ащемок лама пинге тумонь тяфтама «котёлса», медсь и вирень иможень соксь арсесть шумбрашинь кемокстай, виень максы симомбялькс. Тя мокшэрзянь медть мельге Иван Грознай кучсесь эсь лацонь отрятт, штоба синь салава таркселезь модаста тя паршить и мишенделезь Германияв. Вов тяфтама мялень салай историческяй фактт содафт народоньконь колга.
Кда ётафтомс корхтаманьконь тяниень пингти, тячивок Мордовиянь медсь лувондови цебярь качествань продукциякс. Миньцонк лама асу и эсь тевонь кельги мешень кирдида. Тячи азонттама Краснослободскяй райононь Сире Рябка велень мешень азорть, пара вайме мокшалять Н.А.Сайкинонь колга. Николай Алексеевич шачемас коре Сире Лепию велеста. Кассь сокаень-видиень, лама идень семьяса. 1959 кизоста сявомок аляц ушедсь кирдема мешт, и Николай Алексеевич нинге ёмланяста  теенза лезнесь нешкопереса. А кемонь кизоса ни цёранясь ульсь мешень мельге афкуксонь ваныкс.
Н.А.Сайкин образованияс коре физикань и математикань учитель. Работась тонафтыкс, ульсь Сире Рябка велень школань директоркс. Но кельгомась мешень кирдемати сяда вииель. И мокшалясь школаста ётась работама колхозонь нешкопери, коса покодсь 20 киза. Колхозса работамда башка, сон сонць 38 киза ни кирди мешт. Тяни нешкопересонза 70 малава нешкоц. Мешень кирдемаса теенза лездыхть сонь рьвац Людмила Федоровна и кафта цёранза. Николай Алексеевичень валонзон коряс, мешень кирдемась теенза канни седиень петема. Тя мялень кеподи тев, кона казенди ломаттненди аньцек цебярь.
Н.А.Сайкин—трудонь кельги, паронь арьси ломань. Сон кельгсы перьфпяльть и эряфть. Мокшалясь машты ялгафнема, инжиень васьфтема, сембонь мархта ладязь эряма. Николай Алексеевич най весяла, сон аф пели стакада-сталмода, аськоляй пингть мархта ряцок.
Вов кода сонць азонды тяниень пингонь мешень кирдемать колга:
—Тядде кизось ульсь аф эсь лацонне. Кувака пизему тундась ашезь макса лама медь. А кизось, меколанкт, козяль эрь кодама панчфса и мани шиса. Тядде минь сявоме 2 тоннат медь. Мишендьсаськ продукциять кода оцю лувксса (оптом), стане и аф ламнянь. Ламоц рамаеньке—Мордовиянь эряйхть, а стане жа улихть и рамайхть Москустовок. Кафта кизот кода мешень кирдемаса ноляса тевс Скандинавиянь мешень азорхнень опытснон. Мон аф сувафнесайне-кяшендьсайне нешкнень тялонди, мешене ётафнесазь тялоть нешкопереса. Ламонцне арьсихть, бта мешне пелихть якшамда, но тя аф стане, мешне пелихть вачашида. И сяс, кда кадомс теест тялонди сатомшка ярхцамбяль (медь), якшапне-кельмотне аф кандыхть нешковелетненди кодамовок зиян. Тяда башка, тяфта ули кода мешень кирдити ванфтомс виензон, вдь мешкуднятнень тяза-тоза каннемасна тевсь аф тёждя.
Материалть аноклазе Т.ПЕТРОВА.