Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031

 
 

 

Национальная тематика

Сире Яксарка мокшень велесь и «Яксарочка» этнографическяй ансамбльть кайги вайгяленза

Арьсян, «Мокшень правдань» эрь корреспондентсь Мордовиять эзда ширеса командировкаса улемстонза ёрай сяда лама содамс тостонь мокшетнень и эрзятнень колга: улихть-аш синь тя республикаса или областьса, кда улихть, то коса и кода эряйхть, кодама тефт тиендихть родной кяльть, мокшэрзянь культурать ванфтомаснон инкса, кодама соткст кирдихть  мокшэрзянь масторть мархта.
Аф кунара тейне удалась улемс Пенза ошса, коса ётась Мордовскяй (мокшень и эрзянь) народть Межрегиональнай общественнай организациянц Исполкомонц президиумонц келептьф заседанияц. Мзярда Мордовияста саф делегациясь пачкодсь заседаниять ётафтома вастонцты—М.Ю.Лермонтовонь лемса Пензенскяй областной библиотекав, «книгань Дворецу» (тяфта лемделине тя библиотекать) сувамста сонь васьфтезь мокшень и эрзянь мороса, гармониянь вайгяльса Пензенскяй областень Шемышейскяй райононь Сире Яксарка мокшень велень «Яксарочка» народнай этнографическяй ансамбльсь и Бессоновскяй райононь  Пазелки велень «Чевгелина» фольклорнай коллективсь. Васенда ашине сода кит ня ломаттне, коста синь, но седиста моли моросна, щамсна-карямсна пяк тусть мялезон. Маладонь теест, азыне коса работан и синьге кенярдсть. Минь, кле,  Шемышейскяй райононь Сире Яксарка велеста «Яксарочка» этнографическяй ансамбльста. Корхни ялганень эзда фкясь ульсь мокшэрзянь тя коллективть руководителец Ольга Викторовна Зоткина.
Сань мяльс сяда лама содамс Сире Яксарка мокшень велеть колга целайнек. «Пензенское краеведение» журналть 2019  кизонкса 1-2№ эса пачфневи, што Сире Яксарка (Рождественское) велесь эвондась кевонь веконь кунардонь поселениятнень вастса. 1709 кизоть самс Ексарка велеть (эста лемоц тяфта тяшневсь) ульсь ясачнай мордвань 124 пирьфоц (296 аля и 175 ава); 1718 кизоня—52 пирьфоц (75 аля и 59 ава). 1717 кизоня августовскяй «кубанскяй погромть» пингста велеть машфтозь ногаецне и кубанецне (Севернай Причерноморьянь кочевой нароттне). Пленц сявфоль 127 аля, шавфоль 27-сь, 95 авась сявфоль пленц, шавфольхть—6-тне.
Велети лемоц максфоль Яксарка (Сурать кержи ляйти прамац) ляйть коряс. Мяльса кирдевсь яксярга мокшень валсь. Тяса инголи ламоль эрьхкта, коса ульсть ведьса уенди нармотть, конатнень лангс охотендасть.
1709 кизода меле велеса эвондась эрзянь выселка, конань эряенза инголи эрясть Алатырскяй уездса. И тянемс ряцок ащихть кафта велет: мокшеннесь—Сире Яксарка и эрзяннесь—Од Яксарка. Шарьхотьф, тяса эряйхнень кяльсна и щамсна-карямсна ламода явихть мокшень и эрзянь лия велетнень эзда. 1928 кизоня Сире Яксаркась сувафтфоль Пензенскяй областть составс.
Велень культурань кудса работай мокшэрзянь культурань музей и ули «Яксарочка» народнай фольклорнай этнографическяй коллектив, конань колга лятфнень сяда вяре.
Кода тейне азозе «Яксарочкать» руководителец  Ольга Викторовна Зоткина, Сире Яксарка велесь мокшень, но эряензон ламошкасна эрзят, сяс этнографическяй тя ансамбльса улихть и мокшават, и эрзяват.
«Яксарочкась»—Пензенскяй областень фольклорнай инь сире коллектифнень эзда фкясь. Эсь кинц ушедозе—пуроптфоль Шемышейскяй райононь Сире Яксарка велеса 1946 (!) кизоня. Советскяй пингть «Яксарочкась» ётазе марнек Пензенскяй областть, аф весть ульсь Москуса, нльне Клайпедав пачкотькшнесь. Фалу учсеф инжикс «Яксарочкать» примсезь Мордовияса, тяфта тевсь ащи тянемс.
«Яксарочкафтома» аф ётни фкявок праздник велеса и районца. Коллективсь аф весть лисендсь сяськикс ламоц фестивальхнень эса. Ламотне, тяконь лувксса и минь—Мордовияста сафне, шарфнихть мяль ансамблень участникнень щамснон лангс. Эрь костюмсь аф лиятнень лаца, эрть эсь рисункац.
О.В.Зоткинать валонзон коряс, щамснон мархта синь няфнесазь козя авань, максома стирень, авозень костюпнень. Кепотьксонди, семьянь азоравать—авозть каркссонза фалу нюрьги кошелёк. Но сембе щапне пяк мазыхть, мялень  салайхть, сяс, мзярда коллективсь лисенди сценать лангс морама, стака азомс, кона щамсь сяда цебярь, сяда удалаф.
Фольклорнай коллективсь морси мокшэрзянь лирическяй, свадьбань, обрядовай, календарнай, праздниконь и рузонь морот. Репертуарсь фалу козякофневи, а тя корхтай сянь колга, што «Яксарочка» народнай этнографическяй ансамбльсь, конанди 74 киза, фалу ащи вешендемань ки лангса.
Т.Альшина.


29.10.2020 №42
 
 
 

 
НОВОСТИ
 
 
 
 

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021  № 1
 
 
 
 

Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020  № 48
 

«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020  № 48
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин