ЛОМАНЦЬ СОДАВИ ТЕВОНЗОН КОРЯС

Мокшалясь       В.И.Сайгашкин содаф зрнянь кядензон, эсь пара тевонзон мархта аф аньцек эсь велесонза, но и марнек районца. Шачемас коре Василий Иванович Инсарскяй райононь Исавелеста. Тоса касозе серенц, тонафнесь школаса. Тядянза-алянза, Лидия Андреевна и Иван Дмитриевич, виень апак ужяльтть работасть колхозса. И эсь кота идьснон тонафтозь трудта аф пелема, эрь тевса маштома.

Школада меле Василий Иванович тонафнесь Саранскяень училищаса столяронь-плотниконь профессияти. А меле лядсь ошу «Мордовпромстрой» тресту работама. Служась армияса, пуроптсь семья. Рьвац, Нина Петровна, работцесь Саранскяень Электроламповай заводса. Шачемас коре мокшавась Лфна велеста.

1979 кизоня Сайгашкиттне састь мяльс кадомс ошть и мрдамс эсь шачема-касома уженязост. И вов тячити самс полатне эряйхть мокшень Лфна велеса. Шачфтсть-касфтсть кафта итть, ваннесть колма унокт.

Аш стама тев, мезьса афолезе сафта тя удалаф мокшалясь. Сонь валонзон коряс, аф лятфтави ни, мзяра куд строяф-путф, шуфтста эрь кодама парши тиф.

90-це кизотнень Василий Ивановичень тердезь работама велень школав. Сон вятсь трудонь и черчениянь урокт, покодсь завхозкс. Тонафтозень иттнень нолямс тевс эрь кодама инструменттнень, работамс станокнень мархта. Тяни мокшалясь ваймоси пенсияса, но стак мзярдовок аф ащекшни. Василий Иванович сафтсы стамань тевсовок. Сон стакшни машинкаса ульцянь эрь кодама щапт, халатт, пильгс щамат, варягат и лама мезе лия.

В.И.Сайгашкинонь валонзон коряс, велеряенза аф кадондсазь сонь тевфтома. Кинди эрявксты, пиземть эзда плащ стай, кинди—тялонди лямбе тапочкат, кинди курткань замок пети и стак тов. Машты кядь мокшалясь мзярдовок аф атказакшни, сембонди стай-пети щапт-каряпт. И кода ни ладяф ламоц мокшень велетнень эса, вестевок аф сявонди работанкса ярмак.

Тяда башка, В.И.Сайгашкин пара мяльса примси участия велеть культурнай эряфсонза. Сонь мазы и кайги вайгялец, мокшалясь лац морай. Тя асушись теенза ётась тядянц эзда, кона эряфоньберьф морсесь велень хорса.

Василий Иванович Лфна велень ансамбльть мархта аф весть выступандакшнесь «Шумбрат, Мордовия!» Народнай творчествань республиканскяй фестивальса.

Нльне тянивок, мзярда лоткафтфт эрь кодама мероприятиятне, концерттне коронавируснай инфекциять сюнеда, В.И.Сайгашкин аф кадондсы шири морамань тевонц. Сон примси участия онлайн-концерттнень эса, конатнень ётафнесыне Инсаронь культурань кудсь.

А конашкава седи ваксста мокшалясь поздравляндазе рьванц эряфкшу ломаттнень шиснон мархта. Сон азондсь стихт, морась мора, казсь панчфт. Сонь поздравлениянц мархта видеороликть интернетса ванозь лама ломань. Мокшалять лемс сёрматф аф кржа шнамань валда.

Василий Иванович машты мазыста корхтама. Азы вал, бта пяште лазы. Коса эряви шутендамс—шутендай, мзярда эряви ломанть мяленц кеподемс—сонь анок ни пара, лямбе валоц. А кда кинь шачема шиц, Василий Ивановичень ламос учсемс аф сави, сон именинникть лемс и стихотворения азонды, и моровок морай.

Вов тяфтамот минь мокшень аляньке!

Т.ПЕТРОВА.