Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Тема дня

«Тяддесь велень хозяйствати арась инь удалафокс республикать марнек историясонза!»

13 ноябрьста Республикань Кудса ётась торжественнай собрания, кона лемтьфоль Велень хозяйствань и перерабатывающай промышленностень работниконь шити. Мероприятиясь ётафтфоль санитарно-эпидемиологическяй вешфкснень мяльса кирдезь: участникне нолдазь тевс маскатнень и перчаткатнень, кирдсть социальнай дистанция, а шида тяда инголе тисть тест коронавируснай инфекциять лангс. Илань мероприятияти видеоконференциянь режимса полаткшнесть республикань сембе райоттне, аграрийхнень лемс лямбе валхт азсь Мордовия Республикань Оцюнясь Владимир Волков.
«Седи ваксста поздравляндатядязь Велень хозяйствань и перерабатывающай промышленностень работниконь шить мархта!—приветствовандазень Мордовиянь велень труженикнень Владимир Волков.—Сембе  минь васьфнесаськ тячиень шить цебярь настроения мархта и гордостень марязь. Туфталсь тянкса сатомшка оцю—тяддесь велень хозяйствати арась инь удалафокс республикать марнек историясонза!»
Республикаса кочкаф рекорднай урожай, сатф инь оцю касома лофцонь продуктивностть коряс, кирневихть сиволень и алонь производствать коряс эсь рекордоньке. Тяда башка, тевс нолдафт мировой уровенень несколька производства.
Велень хозяйствань сезонць шумордавсь сокайхнень-видихнень рекорднай сатфксснон мархта. Тядде Мордовияса кочкаф 1 миллион 760 тёжянь тонна сёра, урожайностсь—37 центнерда лама гектарста. Тя результатсь арась историческяйкс, сяс мес мзярдовок тяда инголе Мордовиянь паксятнень лангста апак кочксеколь тяфтама оцю урожай. Инь лама сёра советскяй пингть урядафоль 1973 кизоня—тя 1 миллион 300 тёжянь тоннада цють сяда лама, урожайностсь ульсь 17 центнер гектарста. Тяда меле сёронь урядамаса инь оцю результат аграрийхне сатнесть 2017 кизоня. Эста республикаса кочкафоль 1 миллион 467 тёжянь тонна сёра (урожайностсь—34,6 центнер гектарста). Тядде Мордовиясь ётазе тяда ингольдень эсь рекордонц 300 тёжянь тоннада или 17 процентта.
«1 миллионда лама тонна сёра Мордовияса кочксеви ни сисем кизот мельцек. И тявок рекорд!—азозе МР-нь Оцюянсь.—Рекорд, конань сатомс удалась сокайхнень-видихнень, сёронь касфтыхнень тевонь лац тиендемаснон, велень хозяйствать маштозь вятеманц, паксятнень лангса передовой технологиятнень и тяниень пингонь техникать тевс нолямаснон, федеральнай центрать и Россиянь Президентть В.В.Путинонь ширень кирдеманц вельде. Сонь участиянц пингста Мордовияса эряфс ётафтфт  АПК-са пяк эрявикс проектт. Сяс минь велень хозяйстваньке няфни касома сембе ширетнень коряс».
Инь оцю урожайность тядде сатф Рузаевскяй райононь «Исток» обществаса—72 центнерда лама гектарста средняйста хозяйствать эзга. Оцю производительностть эзда ащи трудть инкса пандомась. Средняй зарплатась «Истокса» 53 тёжянь цалковай, мезсь нльне сяда лама «Рузхиммаш» градообразующай предприятияса пандови заработнай платать коряс.
Урожайностть коряс мялень кеподи результатт стане жа сатфт «Октябрьская» агрофирмаса (56 центнерда лама гектарста), Чамзинскяй райононь «Калиновское» (55 центнерда лама гектарста) и Лямбирскяй райононь «Нива» (53,6 центнер гектарста) предприятиятнень эса.
«Кда нинге 2 кизода  тяда инголе сёронь урядамать коряс сяда тёжянень рубежть ётнезь аньцек кафта райононьке, тяни синь эздост арась кота—тя Лямбирскяй, Ковылкинскяй, Атяшевскяй, Старошайговскяй, Рузаевскяй и Чамзинскяй райоттне. Нинге кота райоттне кочкасть 80 тёжяньда лама тонна сёра,—китькстазе Владимир Волков.—Инь цебярьхть показателенза Лямбирскяй районть, коса кочкаф 160 тёжяньда лама сёра, урожайностсь—51 центнер гектарста. Тяддень результаттне няфнесазь—миньцонк ули сембось, штоба эрь кизоня кочксемс 1,5 миллион тонна сёра, а сяда тов касфтомс тя лувксть 2 миллиотт тоннас».
Тяка пингть Мордовиянь Оцюнясь шарфтсь мяль сянди, што тяддесь аф пяк удалафоль республикань якстеряпсонь касфнихненди. «Марса урядаф 760 тёжянь тонна сахарнай якстеряпс, урожайностсь—380 центнер гектарста. Тя мелянь оцю урожайть пцтай колмоцекс пяльксоц,—китькстазе сон.—И, конешна, ня показательхне аф ладяйхть якстеряпсонь касфниеньконь уровеньцнонды и возможностьснонды. Но кода афоль уле, мялезе спасибамс сахарнай якстеряпсонь производительхненди и сембонди, кие трудендась паксятнень лангса лац тевонь тиендеманкса».
Эсь корхтамасонза Мордовиянь Оцюнясь шарфтсь мяль животноводствань отраслять лангска, кона няфни стабильнайста касома. Алонь производствать коряс, кда лувомс, мзяра сави фкя ломанти, республикаса арась ни тонатфокс улемс  лидеркс странаса (кизоньберьф арьсекшневи нолдамс 1,5 миллиардть малава ал), тядде удалась лисемс 1 вастти Россияса лофцонь производствать коряс (10 ковста—506 килограмма лофца фкя ломанти). Сивольть производстванц коряс, кда стане жа лувомс фкя ломанти, Мордовиясь стаки занцесы 2 вастть ПФО-са и 6 вастть Россияса (эрь эряйти 10 ковонь итокнень коряс ноляви 377 килограмма сиволь).
«Тядде тевс нолдафт несколька инвестиционнай проектт, конат нльне аф республиканскяй, а общероссийскяй масштабоннет,—азозе Владимир Волков.—Сивольть производстванц коряс тя «Талина» компаниянь группать проектоц. Предприятиясь кизоньберьф шумордазень фкя пингста колма животноводческяй комплекснень строямаснон Ковылкинскяй районца. Эрсь эздост арьсеф 100 тёжянь тувонди. Комплекснень строяманкса нолдаф 5,5 миллиартта лама цалковаень лувксса инвестиция. «Талинась» арьсекшни поладомс строямать сяда тов».
2020 кизоня арьсекшневи нолдамс 350 тёжянь тонна сиволь (касомась 9 процент). А мекольце 10 кизотнень сивольть производствац сембе категориянь хозяйстватнень эса кассь пцтай колмонь-крда, общественнай секторса—нилень-крда. «Советскяй пингонь инь оцю показательхнень минь ётаськ 2,5-крда,—азозе МР-нь Оцюнясь.—Эряви азомс, што аф аньцек лувкссь касфневи, но и цебярьгофневи качестваське».
Лофцть производстванц коряс велень хозяйствань предприятияньке стане жа няфнихть оцю касома. Арьсекшневи нолдамс аф 470 тёжяньда кржа тонна лофца. «Эряви азомс, нльне тялонда жуватань кирдихненди удалси потьнемс суткаста фкя тёжяньда лама лофца!—азозе Владимир Волков.—Кизоть итогонзон коряс арьсекшневи потямс фкя траксста 7200 килограмма лофца (касомась 460 килограмма). Тя кармай тага фкя рекордоньке».
Мордовиянь Оцюнясь путсь задача аграрийхнень инголе аф лотксемс сатфть лангс. «Сяс сяда товолдонь целеньке—кафта кизоста сядонга касфтомс продуктивностть, потямс фкя траксста 8 тёжянень килограмма лофца!—мярьгсь     МР-нь Оцюнясь.
Мордовиясь сувси АПК-нь экспортонь касфнемать коряс национальнай проектонь участникнень лувксс. 2024 кизоть самс омба мастору велень хозяйствань продукцияньконь пачфнемац эряви касфтомс колмонь-крда. Тяниень пингть Мордовиянь  продукциясь пачфневи миронь 28 странав. Тяфта, кепотьксонди, «Атяшевский» МПК-сь кизоста касфтозень экспортнай продукциять объемонзон пцтай сисемонь-крда, «Ромодановсахар» и «Консервный завод «Саранский» предприятиятне—ветень-крда.
«Тага весть мялезе азомс—сембе ня сатфксоньконь афоль удала сатомс, кда аф велень трудонь кельги эряйхне,—китькстазе Владимир Волков.—Сяс васенце вастса тейнек ащи велеса эряфть цебярьгофнемац. Тейнек лама удалась тиемс велеть виияфнеманц коряс федеральнай программатнень вельде. Но тиема нинге сядонга лама. Корхтамась мольфтеви китнень одкстопнемаснон, медицинать доступнайшинц касфнеманц, велень школатнень, клупнень строямаснон и козякофнемаснон, велетненди цебярь качествань симома ведень пачфнемать колга. Россиянь Президентть решениянц коряс тевс сувафтф «Велень территориятнень комплекснайста виияфнемасна» од программась. Тядде сонь эряфс ётафтоманкса Мордовиясь нолдась 1,8 миллиард цалковай. Тяда башка, федеральнай бюджетста республикати тя кизоня нолдаф 817 миллион цалковай или 3 миллиоттнень малава цалковай велень тёжянь эряйти. Тя инь оцю показательсь Приволжскяй федеральнай округса. Средстватне карьхцявихть ся кизефкснень решандаманкса, конат пяк пичефтьсазь велеряйхнень: кинь, инженернай и социальнай инфраструктурань строяманкса. Тяфта, тяддень декабрьста панжеви культурань од центра Сире Шайгавса, а стане жа петьф-тиф культурань куд Лямбирьса».
Республикань Оцюнясь кошардозень холдингонь вятихнень, хозяйствань директорхнень аф лядондомс ширеса эсь работникснон эряма вастонь прябаласнон решандамаснон эзда, лезнемс теест займаса, нолямс ярмакт ипотекать коряс васенце взносонь пандоманкса. Штоба тердемс и кирдемс грамотнай специалисттнень велеса, теест эрявихть максомс эряма вастт, а стане жа социальнай гарантият. «Кепси мяль ся, што мекольдень кизотнень веленьке одкстомсь,—мярьгсь Владимир Волков.—Лама од ломань эвондась велень хозяйствань предприятиятнень руководстваса, животноводческяй комплексонь работникнень, перерабатывающай предприятиянь      специалисттнень ёткса. Ламода  тя сатовсь АПК-ти од кадратнень ширень кирдемаснон коряс республиканскяй программать тевс сувафтоманц вельде. Эсонза примасть участия ни пцтай 350 од ломань».

19.11.2020 №45
 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин