Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031

 
 

 

Как жили и живут мокшане

Мокшетнень рьвяямань-рьвакс лисемань койсна

Свадьбась—семьять эряфса фкя инь оцю событиясь. Тя сонь «шачема» шиц. Кунардонь пинкнень мокшэрзятнень пяк козятольхть и эсь лацоннетольхть рьвяямань-рьвакс лисемань койсна-обуцясна. Газетаньконь тячиень номерсонза лятфтатама-азонттама синь колгаст.
Дивандафты, но XVIII-XIX векненди самс мокшэрзятнень еткса пуропневсть семьят, коса полатнень еткса улендсь аф кржа киза. И сяда сиресь аф мирдсель, а, меколанкт, рьвясь. 25-27 кизоса стирьхне лисендсть рьвакс 12-14 кизоса церанятненди. Тейнек, тяниень пингонь эряйхненди, стака шарьхкодемс тянь, а эста тяфта ладяфоль. И вов мес. Фкя ширде стирть тядянзон-алянзон мяльсноль сяда ламоняс кирдемс сонь эсь кудсост кода лездыень. Омбоце ширде—женихть родителензонды стане жа эрявсь кода можна сяда куроконяста получамс кудозост тага финц авань кятть. Рьвянянь кочкамста шарфневсь мяль сянь лангс, кода ащихть семьять тевонза ярмаконь ширде, кодама стирть шумбрашиц, кельгсы-аф сон трудть.
Аф шуроста  венцямда инголе улендсь тяфта лемдеви «рьвянянь салама»: цератне салсезь стирьхнень тядянь-алянь кудста, мельгаст тяда меле ушеткшневсь афкуксонь панцема. А кой-коста улендсь и лиякс: стирсь сонць ворьготкшнесь родителензон эзда и салава тушендсь рьвакс мяльс туф церати. Но тяфта лисендсь аньцек ашу семьятнень эса, сяс мес женихть ашельхть ярмаконза «рамамс» рьвянять.
Кода афоль уле, сембе сяка мокшень свадьбатнень ламошкасна етафневсть кунардонь пингста ладяф койхнень-обуцятнень коряс. Од церать аляц, максомок жертва языческяй шкайхненди, а меле, христианствать примамда меле,—озондомок Шкайти, ваденделезе свежай кши кувонять медьса и веть тушендоль ся кудти, коса эрясь од рьвянясь. Кадомок кшить ортатнень каршеса, сон чаксесь вальмяти и эстокиге ворьготькшнесь ласькозь или ластя алашаса. Койть мяльса кирдезь, стирть аля раднянзонды эрявсь ердамс пря мельганза, и кда удалсесь сатомс кудать, мрдафнелезь теенза кшить и аф ламода «ляпфнезь боконзон» (пикссезь). Кда сатомс ашезь удалсе, эста панихне синць сашендольхть кудать кудозонза и стане жа чаксесть вальмяти, тянь мархта няфнемок свадьбанди эсь согласияснон.
Тя обрядта меле кафта семьятнень еткса ушеткшневсть сай пингонь венцямать колга арьсематне-корхнематне: лувондовсть марстонь карьхцне,  кодама кармай рьвакс лисемань паршись (приданое) и стак тов. Рьвянянь ладямась лувондовсь педа-пес шумордафокс тяфта лемдеви «прокс симома» церемонияда меле. Тя шиня женихть раднянза сашендольхть стирть шири пиравама и казнень казема. Мзярда ульсь кочкаф свадьбань шись, стирть ушеткшнесь вольнай эряфть мархта простямань пингоц: недяляньберьф сон кайгиста ольксесь-аварькшнесь. Рьвакс лисемозост мокшень стирьхне аноклакшнесть эстеест рьвакс лисемань парши (приданое): сташендсть панархт, серматкшнесть нардамат и руцят. Ламось тянь эзда казендевсь женихть тядянзонды-алянзонды и сонь радняндонзы. Лядыкссь путневсь пяшень арзяс (сонь лемнезь парькс), конань рьвянясь сявонделезе мархтонза атявозть кудс.
Шида свадьбада инголе етафневсь обряд ямть мархта. Од рьвянять стирь ялганза, ава раднянза каннесть ширезонза цюгоннянь ямксонь ям. Ярхцсемда меле шра лангакссь сявондевсь и етафневсь од рьвянять инь сире стирь ялганц вельхкска. Тя тиендевсь сянкса, штоба сявок сяда куроконя лисель рьвакс. Ямда меле лятф сембе шаванятне кадондовсть од рьвянять ширеса, штоба  женихсь няелезе, мзяра сай пингонь рьванц раднядонза. Кой-кона мокшень велетнень эса «ямонь» обрядта меле од рьвянясь ялганзон мархта лисендельхть куд пирьфи и рьвянясь ерясь  суркс: кие стирь ялганзон еткста кундасы сонь, ся, арьсекшневсь, маластонь пингть лиси рьвакс.
Свадьбань карша ялганза вятнелезь стирть баняв. Орадомок сёралонц, синь шташендолезь од рьвянять, а тяда меле понцельхть ни теенза кафта сералхт. Рьвакс туф мокшавась шарьхкотькшневсь рьвакс апак тук стирть эзда тяконь лувксса и сянь коряс, кода понафт  шяяренза.
Свадьбань шиня церать раднянза пицельхть-панцельхть «рьвяямань» кшит. Синь аноклакшневсть кода стирть алянцты, стане и тядянцты, крёснаванцты, стирь ялганзонды и мала раднянзонды. Пицевсь 5-9 кши. Церать кудста рьвянянкса срхксесь «свадьбань поездсь», а «пассажирхнень» лувкссна обязательна улендсь аф четнай. Мзярда поездсь малаткшнесь рьвянять кудонцты, кенкшне куду пяксневсть и ушеткшневсь «рьвянянь рамамась». Тяда меле стирть тядянза-алянза бславсезь оттнень и сявондезь церькаву венцяма. Сяльде сембе марса тушендольхть женихть шири, коса рьвяяйхнень васьфнелезь кшиса-салса и ерясть лангозост комляса. Ушеткшневсь свадьбань пиравамась. Сон мольсь колма шит. Омбоце шиня од мирдсь содафнезе эсь кулоф раднянзонды рьванц. Стирсь каннесь теест казненди щапт, конатнень сяльде явондозень ашуфненди.
Од рьвяняти ашель кода самс эсь раднянзон шири эстокиге свадьбада меле: аньцек кафта недялянь етазь мельганза сашендсь аляц и сявондезе фкя ковс эсь пялост. Мирдсь сашендсь рьванц инкса родителензон мархта. Обрядсь лемневсь «меки мрдафтома». Аньцек тя обрядта меле мирдти и рьвяти ульсь кода любой пингста сашенкшнемс инжикс эсь радняснон шири.
Эряви азомс, тячивок ламоц мокшень велетнень эса ванфтовсть рьвяямань-рьвакс лисемань кой-кона сире койхне. Кепотьксонди, тянемс лама вастова якайхть «рьвянянь симома». Стирьхне ингольцекс аноклакшнихть казнет церать тядянзонды-алянзонды, крёсналянцты, крёснаванцты, лия мала раднянзонды. Виде, тяни эсь кядьса стаф-аноклаф казнетнень полафтозь лавкаста рамафне. А тяда инголе стирьхне рьвакс лисемань щамснонга сташендозь синць.  Тянкса тушендсь аф фкя ков, а кой-коста и несколька киза. Нарядсь сташендовсь стане, штоба коряванза ни сотцевольхть стирть эряфса полафтксне, эрь серманять тяса ульсь сонцень крхка смузец. А нинге щамсь аралакшнезе од рьвянять сельмодемада, кяжи духнень эзда. Свадьбать пингста вдь сембонь мяльсна шарфтфоль васендакиге од рьвянять лангс, кажнайсь тяряфнесь ваномс сонь сяда маласта, сяда лацкас. Сидеста, штоба аф повомс кальдяв сельмос, стирьхне мянь кяшендезь шамаснон руцяса.
Велеса свадьбатне тячивок етнихть пяк весяласта. Гармониять вайгялец шабдавакиге колсесы велень сетьмошить. Кодама пара ваномс, кода национальнай мазы щамса наряжаф мокшаватне кштийхть-морайхть коряванза. Тя аф арай кодамовок российскяй «тяштень» концерт ваксс. Стака лувомска, мзяра сиде мороня содай велень эрь мокшавась. Свадьбась аф свадьба синьфтомост. Сиде моронятнень вельде мокшаватне и шнайхть фкя-фкянь, и шутендайхть, и сельме сялгихть.
Кода инголи, стане и тячи мокшень свадьбась лядонды оцюдонга оцю илакс, кона салай мяль эсь коензон-обуцянзон, мазы щамонзон, кайги моронзон мархта.
Материалть аноклазе О.ЕВДОКИМОВА.

19.11.2020 №45
 
 
 

 
НОВОСТИ
 
 

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021  № 1
 
 
 
 

Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020  № 48
 

«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020  № 48
 

Республикань вятить Рузаевскяй районца улеманц колга

Мордовия Республикань Оцюнять аф лама пингс тевонзон тиендисна Артём Здунов 8 декабрьста рабочай визит мархта ульсь Рузаевскяй районца. Республикань вятись содафтсь «Стекольная компания «Развитие» ООО-ть производственнай мощностензон мархта, тяконь лувксса ванозе клянцеконь тарань нолямань цехть.
Заводть продукцияц пачфневи Россиянь ламоц региоттненди, а стане жа экспортс—Арменияв, Литвав, Грузияв, Польшав. Тяфта жа республикань вятись ётафтсь предприятияса «Рузаевка» ТОСЭР-нь резиденттнень мархта келептьф совещания, коса ванондовсть территориять касфтоманц коряс перспективатне. «Штоба сяда активнайста серьгядемс резиденттнень, эряви виияфтомс кинь и транспортонь инфраструктурать, тя пяк важна, карматама лездома»,—азозе Артём Здунов.
Тяка жа шиня республикань вятись ульсь идень технопаркса, коса ванозень работань сембе направлениятнень. Тяса дополнительнай образования получай 800 школаса тонафни.
Мордовия Республикань Оцюнять аф лама пингс тевонзон тиендисна стане жа ванозе идень ташта поликлиникать. 2021 кизонди Артём Здунов путсь задача—строямс идень од поликлиника.
Сяда тов региононь вятись ванозень Ухтомскяень лемса клубть одкстоптоманц коряс тефнень и ульсь «Рузхиммаш» АО-са. Тядде тяса арьсекшневи нолдамс 10 тёжятть вагон. Кафта ковда меле «Рузхиммашса» панжеви содамошинь и маштомошинь фабрика, коса кармайхть тонафневома несколька рабочай направленияс коре од специалистт.
10.12.2020  № 48
 

«Республикаса ули сембось сяда тов касомс-вииякшнемс»

Шуваланяста, 3 декабрьста, ётась Мордовия Республикань котоце созывонь Государственнай Собраниять ведьгемонь фкиеце сессияц. Сонь работасонза примасть участия Мордовиянь Оцюнять аф лама пингс тевонзон тиендисна А.А.Здунов, Мордовия Республикань Государственнай Собраниять Председателец В.В.Чибиркин, Правительствань члеттне, МР-ть эзга федеральнай органонь вятихне, муниципальнай райононь оцюнятне.
Сессиять работанц ушетксста Мордовиянь Оцюнять аф лама пингс тевонзон тиендисна А.А.Здунов залу пуромфненди мярьгсь:
—Тячи минь мархтонт васенцеда васедеме тяфтама составса. Васендакиге мялезе нинге весть азомс сюкпря Российскяй Федерациянь Президентти оцю довериянь максоманкса. Карман тиендема семботь, штоба Мордовиянь эряйхнень надиямаснон пяшкодемс эряфс. Республикаса ули сембось, мезсь эряви вяри касоманди и инголи молеманди, и тя тевса надиян тинь ширень кирдемантень лангс.
10.12.2020  № 48
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин