Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031

 
 

 

Культура

Саранск ошень П.С.Кирилловонь лемса Краеведческяй библиотекать заведующаец Н.М.Бояркина: «ТЕВОНЬКЕ ЭРЯВИХТЬ РОССИЯНЬ ЛАМА НАЦИОНАЛЬНОСТЕНЬ НАРОДТИ"

—Нина Михайловна, кода работай коронавируснай пандемиять пингста Саранск ошень П.С.Кирилловонь лемса Краеведческяй библиотекась?

 

—Кода содаф, тяддесь Россиянь Президентть В.В.Путинонь Указонц коряс азф Славань и Мялямонь кизокс. Сяс библиотекать тяддень тевсонза васенце вастса ащи патриотическяй работась, конань эса минь вятьсаськ-ётафтсаськ  ёмла, од и эряфкшу лувиеньконь ёткса. Тя и лия работать пандемиять инкса ладяф ограниченияда инголе минь сяда сидеста ётафнеськ библиотекать зданияса. А мзярда ладяфтольхть ограниченият, сембе мероприятияньконь минь ушедоме ётафнема онлайн-форматса. Информациясь колгаст тяфта жа лихневи-латцеви библиотеканьконь страницаса, конат панчфт «ВКонтакте», «Одноклассники» социальнай сетьтнень эса и официальнай сайтсонк.

 

—Нина Михайловна, кодама мероприятиятнень вельде пачфнесасть од поколенияти атянь-атяснон Подвигснон колга, конатнень синь тиезь Великай Отечественнай войнать пингста фронтса и тылса, мялямть?

 

—Тяддеть ушетксста сявомок и тя пингс, Саранск ошень П.С.Кирилловонь лемса Краеведческяй библиотекась ётафтсь эряфс мероприятиянь целай цикла, конат лемтьфт воиттнень и тылонь труженикнень подвигснонды, а тяфта жа Великай Победать 75 кизонь юбилеенцты.

 

«Победань шамаликт», «Победань тяштсь валдопты сембонди», «Книгать мархта—Победати», «Синь ковандазь Победать тылса» и лия мероприятияса, конат ётафневсть кода библиотекань залса, стане и онлайн-форматса, ломанень судьбать вельде няфнеськ лувихненди, кода стакаста сатсь минь атянь-атяньконди Великай Победась.

 

Тя темати тяфта жа лемтьфтольхть «Мужествань урок» лем ала мероприятиятне, коса од лувихненди азондоме Михаил Петрович Девятаевонь и Советскяй Союзонь лия Геройхнень, минь земляконьконь, подвигснон колга.

 

Тяфта жа Великай Победати лемтьф мероприятиятненди сувафтозе эсь путксонц «Васедемат микрофонть   ваксса» лем ала радиопередачань циклась. Пингстост радиотрансляциянь режимса Саранск ошень П.С.Кирилловонь лемса Краеведческяй библиотекань работникне азондсть лувихненди Мордовиянь поэттнень и писательхнень колга, конат Великай Отечественнай войнаса максозь эряфснон Родинать инкса, а тяфта жа сятнень квалма, кит Победать мархта мрдасть куду.

 

Конешна, кодамовок мероприятияса Великай Победать питненц колга сембе мяльхне-арьсематне педа-пес аф азондовихть. Но тейнек эсь мероприятияньконь вельде удалась сувафтомс лувиеньконь ваймос тя мяльть: Великай Победать марстонь вийса сатозе минь лама национальностень народоньке!

 

—Кода содаф, Саранск ошень П.С.Кирилловонь лемса библиотекась тяфта жа вяти оцю работа межкультурнай и межнациональнай сфераса.

 

—Пара кулемс тянь, мзярда ломаттне макссихть цебярь питне минь работаньконди, тя максси тейнек эрьгя-вий тиендемс сонь нинге сяда цебярьста.

 

Корхтамок библиотекать работанц квалма межкультурнай и межнациональнай сфератнень эса, эряви азомс: минь ветеце кизось ни вятьсаськ «Наследие» республиканскяй программать вешфксонзон коряс. Ётафнемок эряфс ня вешфкснень, минь касфтсаськ лувихнень республикань нароттнень, синь историяснон и культураснон колга содамошиснон. Тяфта жа минь няфнесаськ лувихненди Россиянь лама национальностень народть марстонь историянц, культуранц и сатфксонзон. Тяка пингть минь ванфтсаськ и виияфтсаськ мокшэрзянь народть национальнай культуранц, коензон-обуцянзон, пачфнемок синь, кода и мокшэрзянь литературать, аф фкя лацонь мероприятия вельде од поколениятненди.

 

Кода содаф, Мордовия Республикась нароттнень ёткса межнациональнай цебярь и кеме соткснень коряс марнек Россияса ащи васенце васт.  Надиян, оцюдонга оцю сатфксса ули Саранск ошень П.С.Кирилловонь лемса библиотекатьке валда путксоц.

 

—Нина Михайловна, П.С.Кирилловонь лемса Краеведческяй библиотекась мероприятиянь анокламста и ётафтомста республикань кодама организация мархта  кирди творческяй соткст?

 

—Мероприятиянь анокламста и ётафтомста библиотеканьке кирди соткст республикань сембе организациятнень мархта, конат работайхть мокшэрзянь национальнай, республикань межнациональнай, литературнай, информационнай и национальнай культурань сфераса. Ётксост—Мордовскяй (мокшень и эрзянь) народонь Межрегиональнай общественнай организациясь, Финно-угорскяй народонь культурань Поволжскяй центрась, Мордовиянь национальнай драматическяй театрась, Писателень и Композиторонь союсне, «Мокшень правда» газетась, национальнай лия изданиятне и телерадиопрограмматне, а тяфта жа Саранск ошень школатне, «Надежда» приютсь и лия организациятне.

 

Сембе минь марстонь вийса тихтяма фкя тев. Сон, кода няфнесазь мероприятиянь мониторинкне, эряви ломаттненди. Сяс тейнек ули мезенкса работамс!

 

—Койсон, библиотекать сай кизонь работасонза тяфта жа кармай лама мялень салай мероприятия. Кодама темас синь кармайхть лемтьфт?

 

—Тейнек, Саранск ошень П.С.Кирилловонь лемса Краеведческяй библиотекаса покодихненди, сембе мероприятиятне инь няевикст и питнидонга питнихть. Синь анокламстост и ётафтомстост фалу путневи лама эрьгя и вий.

 

Кда корхтамс синь темаснон колга, эряви азомс, мероприятиятне кармайхть лемтьфт патриотическяй, национально-культурнай и лия тематненди, конат малат и питнихть минь лувиеньконди.

 

—Удалаза, Нина Михайловна, арьсефонте.

 

—Сюкпря пара валонкса-арьсеманкса.

 

В.НЕСТЕРОВ.

 


03.12.2020 №47
 
 
 

 
НОВОСТИ
 
 
 
 

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021  № 1
 
 
 
 

Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020  № 48
 

«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020  № 48
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин