МОКШЭРЗЯНЬ ЩАМСЬ ШАБАНЬ СЕЛЬМОСА

Моли тялоть васенце ковоц—декабрсь. Коль сяда кржа пингта ляткшни 2020 кизоть шумордамс и Од кизоть самс. Тяддесь, коронавируснай инфекциять мяльса кирдезь, ульсь аф тёждя. Ломаттне, эрсь эздонк, пуроптозь марс вийснон и ушедсть тюрема апак учсек урмать каршес. И вов ни сембе минь аноктама васьфтемс 2021 кизоть. Кодамкс сон ули? Мезе канды? Кода, кле, Од кизоть васьфтьсак, стане и ётафтсак. Сяс арьсема тянь колга инголенди. Тядде ламоц пуромксне ётафтовсть онлайн-форматса. Интернетть вельде примафоль участия конкурснень, викторинатнень, фестивальхнень, флешмопнень эса. Конешна, тяфтама форматсь аф пяк тонатф, но тундаста сявомок тячиень шити  интернетса мероприятиятне мольфтевихть сяда тов. Активнайста тянь ширде эсь прянц няфтезе «Мокшень правда» газетать кунардонь ялгац—Самарскяй областень Тольятти ошень Мокшэрзянь культурнай центрась. Онлайн-флешмобонзон, конкурсонзон, лия мероприятиянзон колга пачфнеме сидеста. Лемтьфтольхть синь спортти, ялгаксшити, родной кяльхненди, нароттнень ёткса соткснень кемокстамаснонды… И вов Од кизонь каршеня Мокшэрзянь культурнай центрась азсь тялонь, улема, инь кельгома тя праздникти лемтьф «Мокшэрзянь костюмсь иттнень сельмоса» рисункань конкурс. Организаторть валонзон коряс, сонь целец—эвондафтомс иттнень эса наследиять ванфтоманц мархта сотф мяльхть-арьсемат, штоба подросткатне и шабатне содальхть сяда лама Россияса эряй национальносттнень, этнокультурнай питнишить, нароттнень койснон колга, конат няфтевихть национальнай щапнень и синь орнаментснон эса.

Участникокс «Мокшэрзянь костюмсь иттнень сельмоса» конкурсти вийс коре арамс 3-12 кизоса иттненди, конат эряйхть аф аньцек Самарскяй областьса, но и лия региоттнень эса. Рисункать ули кода архнемс карандашса, фломастерса, краскаса.

Мезе тиема, штоба стирнясь или цёранясь прималь участия тя конкурсса? Мокшэрзянь культурнай центрась ВКонтакте группасонза макссь эскиз. Теенза тиема распечатка, архнемат мокшэрзянь национальнай щапнень, а фонць педа-пес рисовандама эсь мяльс коре. Стане, штоба эздонза шарьхкодеволь, кодапт шабать мяленза-арьсеманза мокшэрзятнень эряфснон колга.

Сяда тов анок работать нолдама сканер пачк или эздонза тиема фотография и кучема Мокшэрзянь культурнай центрав (ули кода электроннай почтав mk-center@yandex.ru). Сёрмаса азомат участникть лемонц, фамилиянц, кизонзон и кодама ошса, велеса, населённай лия пунктса сон эряй. Тя васенцесь. Сяда тов авторти эсь работац няфтема ВКонтакте социальнай сетьса личнай страницасонза #МордовскийКостюмГлазамиДетей хэштег ала. Тянь ули кода тиемс тяддень 24 декабрть самс.

Организаторхне эскизть арьсезь стане, што лангсонза аш фкя лацонь тюст. Конкурсть заданияц ащи «Мокшэрзянь костюмсь иттнень сельмоса» лемонц эса, сяс фонць педа-пес рисовандама и архнема стане, кода тянь няйсы шабась.

Ноябрть омбоце пялестонза тифоль ушеткс конкурсти и вов ни 22 ноябрьста Мокшэрзянь культурнай центрать «Мордва Тольятти и Поволжья: Мокша и Эрзя» ВКонтакте группасонза няфтьфоль васенце участницать, 8 кизоса Кира Фадеевать, работац. Сяда тов «Мокшэрзянь костюмсь иттнень сельмоса» Од кизонь конкурсса примасть участия Тольятти ошень 71№ школаса тонафнись Тимофей Шмелёв (9 кизот), Тольятти ошень 66№ школаса  тонафнись Карина Якшамкина (9 кизоц).

Мокшэрзянь культурнай центрась тернесыне тядятнень-алятнень примамс участия тя проектса—Од кизонь конкурсса эсь идьснон мархта. Тяфта ули кода азондомс шабатненди эсь юронтень, коентень-обуцянтень и мокшэрзянь культурать колга.

«Мокшэрзянь костюмсь иттнень сельмоса» Од кизонь конкурсса ули кода примамс участия 24 декабрть самс. 25 декабрьста теенза тиевихть итокт ВКонтакте социальнай сетьса Мокшэрзянь культурнай центрать страницасонза вайгялень максомать вельде. Тяфта содавихть сяськихнень лемсна. Теест максовихть казнет, а эрь участниксь получай электроннай сертификат.

Од кизонь конкурссь учи участникнень эса!

Т.АЛЬШИНА.