Инвалид-иттне апак юкстакт

 «Инвалид-идь» валсь кайги казямста. Сонь кулемстонза люпштави седице. Кизоста кизос тяфтама шабатнень лувкссна коль касы. Кепотьксонди, 2017 кизонь даннайхнень коряс, Россияса ульсь 643 тёжянь инвалидность мархта шаба. А тядде тя лувкссь кассь  700 тёжянти. Тянди лама туфталда: идень урматне и травматне, кальдяв экологиясь. Тяда башка, специалисттнень мяльснон коряс, тяфтама итттнень лувксснон касомасна сотф медицинать цебярьгодоманц мархта.Тяни шабати шачемда меле ни тиендихть обследованият, конат лездыхть содамс уликс урматнень.

Ограниченнай возможность мархта шабатнень тядясна-алясна васетькшнихть лама прябала мархта. Инь васенцесь—тя ломаттнень мархта прянь вятемасна: афшарьхкодемась,  эздост безярдомась и пелемась. Тя вяти  иттнень и синь тядяснон-аляснон обществаса башка ащемати.

Аф теждя улемс инвалидкс оцю ломанти, но ламода сяда стака иттненди. Вдь ёмланяста ломанць тонафни инь ламоти, кочкси эрявикс содамошит. А шумбрашинь афсатыксне арсихть тянди оцюдонга оцю перяфксокс. А вдь ламоц инвалид-иттне асуфт и тя стака тейнек шарьхкодемска. Кода стане синь сермадыхть крхка смузь мархта стихт, мазы вайгяльсна, лац рисовандайхть, морайхть музыкальнай инструментса, сатнихть сатфкст спортса? Аф эрь шумбра идти тя сафтови!

Тейнек содама, тяфтама шабатненди пяк и пяк эряви лезкс и шарьхкодема аф аньцек тядятнень-алятнень ширде, но и марнек обществать эзда. Аньцек стане теест ули кода марямс пряснон эрявиксокс и кельговиксокс, обществать пяльксокс.

Саранскяйса колма кизот мельцек ётафневи эряфс «Счастливый день» («Павазу ши») социальнай арт-проектсь, кона лемтьф ограниченнай возможность мархта шабатненди. Васенцеда проектсь няфтьфоль Приволжскяй федеральнай округонь «iВолга» од ломанень форумса, коса сон шнафоль-кемокстафоль и максфтольхть ярмакт тя пара тевть ушедоманцты.

Проектть руководителенц О.В.Зеткинать валонзон коряс, «Павазу шись» васендакиге арьсефоль ДЦП-са сяряди иттнень лемс, но кода няевсь меле, проекту ушедсть сашендома эняльдемат и лия стака урмаса сяряди шабатнень тядяснон-аляснон эзда. Конешна, киндивок ашель атказама, васендакиге сяс, мес ошса пяк кржа вастта, коса питнефтома ётафневихть занятият ограниченнай возможность мархта иттненди. Саранскяень епархиясь проектти макссь помещения эсь зданиясонза (Московскяй ульцясь, 2№ кудсь).

Проектсь лемтьф «Павазу шикс», сяс мес эрь недляшиня волонтерхне казендихть иттненди мялень салай пинге, кона пяшксе кенярдемада и павазда. Тя проектса покоди 30 волонтер. Ламонцне эздост студентт, конат тонафнихть М.Е.Евсевьевонь лемса Мордовскяй государственнай педагогическяй университетса, психологиянь и дефектологиянь факультетса. Марнек «Павазу шити» сувси ограниченнай возможность мархта 38 шаба. Синь мархтост ётафневихть творческяй занятият, конатнень пингста иттне тиендихть эрь кодама поделкат, работайхть пластилинть и сёвонть мархта, рисовандайхть акварельса. Сембось тя лезды касфтомс шабатнень маштомошиснон, цебярьгофтомс кядень мелкай моторикаснон. Тяда башка, иттнень мархта ётафневихть  налхксемат, конатнень пингста синь весялготкшнихть, тонафнихть ялгафнема. Занятияда меле сембе пуромкшнихть фкя шра ваксс чайда симома.

Мзярс молихть занятиятне, тядятненди-алятненди башка ётафневихть психологонь и священнослужителень мархта васедемат, конатнень пингста ванондовихть уликс прябалатне, макссеви психологическяй и духовнай лезкс.

Тяни пандемиять сюнеда занятиятне ётафневихть онлайн-режимса.

Проектть руководителенц валонзон коряс, «Павазу шить» лемс азф лама пара вал аф аньцек тядятнень-алятнень, но и шабатнень эзда.

—Минь проектоньконь гордостец—тя иттне,—азонды Ольга Владимировна Зеткина.—Оцю паваз няемс шабатнень сельмоса кенярдема. Минь аф лувондсаськ ограниченнай возможность мархта шабатнень кодама-бди эсь лацоннекс. Вдь кодама афсатыкст афольхть уле идть шумбрашисонза, шабась ляткшни шабакс.

Т.Петрова.