Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031

 
 

 

Национальная тематика

Мордовия Республикань Национальнай драматическяй театрать директороц С.И.Дорогайкина:

—Светлана Ивановна, кода работась и работай Мордовия Республикань Национальнай драматическяй театрась пандемиять пингста?
—Конешна, коронавируснай пандемиясь цютькада «керомазь», но работась Национальнай драматическяй театраса мольсь и мольфтеви. И мянь эста, мзярда ладяф ограничениятнень инкса театрань зданиясь пякстафоль, творческяй работась ашезь лоткафнев. Актёрхнень мархта конференц-связень вельде ётафневсть репетицият, видеотрансляциянь режимса зрительхненди няфневсть спектакльхть и творческяй лия проектт. Лиякс мярьгомс, тиендевсь сембось зрителеньконь аф юмафтоманкса.
Тядде Национальнай драматическяй театрась эсь спектаклензон мархта тяфта жа тертьфоль театральнай колма фестивальс. Нят: «Майатул» («Штатол») финно-угорскяй народонь Международнай театральнай фестивальсь, кона ётась Йошкар-Оласа, «Волжскяй ёфкс» национальнай театрань Межрегиональнай фестивальсь, кона ётафтовсь Чебоксарыса, и «Федерация» лем ала Всероссийскяй театральнай фестивальсь, кона арьсефоль ётафтомс Чеченскяй Республикать столицаса.
Йошкар-Оласа и Чебоксарыса Национальнай драматическяй театрань спектакльхне сатозь фестивалень гран-притнень. А Грозный ошу пандемиять сюнеда ладяф ограничениятнень инкса молемс ашезь сав.
Тяда башка, ноябрь ковть песта Нижняй Новгородса ётась «Морайхть драматическяй театрань артисттне» лем ала фестивальсь, кона лемтьфоль Великай Победать 75 кизонь юбилеенцты. Тоса стане жа морасть Национальнай драматическяй театрань актёрхне Павел Михайлов, Александр Батырев, Антон Саранкин, Евгений Благов и Александр Родькин. Синь кафта номерсна повсть фестивалень гала-концертс, мезсь артисттненди арась творческяй оцю сатфокс.
—Кода содасаськ, Светлана Ивановна, аф ваномок прябалатнень лангс, конатнень кандозень коронавируснай пандемиясь, Национальнай драматическяй театраса мольфтевсть постановкат.
—Тяддень кизоть ушетксста, кона Россиянь Президентть В.В.Путинонь Указонц коряс азф Славань и Мялямонь кизокс, Великай Победать 75 кизонь юбилеенц лемс минь путоськ «Саня, Ваня, мархтост Римас» спектакльть. Владимир Гуркинонь военно-патриотическяй драманц коряс постановкать тиезе минь асу актёроньке Андрей Анисимов.
И, эряви азомс, спектакльсь, конань минь няфнесаськ зрительхненди, ванфтомок пандемиять пингста ладяф вешфкснень, пяк тушенды ваныхнень мяльс. Сяс тя спектакльть тяфта жа ётафтоськ рузонь кяльс. Тянь мархта минь няфтьсаськ: Великай Победась—марстонь сатфкс. Премьерать ётафтсаськ Од кизоть самс.
Конешна, ужяль, што тя спектакльть тейнек тядде ашезь удала няфтемс Мордовиянь райоттнень эса и «Оцю гастрольхть» государственнай программать рамкаса Россиянь лия региоттнень эса.
Лиякс мярьгомс, тоса, коса Национальнай драматическяй театрать творчествац тяфта жа цебярьста содаф, и коса эсонк фалу учи мокшэрзянь и лия национальностень зрительсь.
Минь путоме «Ульхть Кельгомать мархта» лем ала Од кизонь од постановка. Тяфта жа аноклафт Од кизонь представленият иттненди и оцюфненди, конат няфтевихть, ванфтомок санитарно-эпидемиологическяй мерань сембе вешфкснень.
—Кода мольфтевсь тядде  грантонь сатомать коряс работась?
—Аф васенце кизось ни Национальнай драматическяй театрась сатни грантт, пялькстомок странань лия театратнень мархта «Оцю гастрольхть» Российскяй Федерациянь Культурань министерствать программаса. Ня грантонь ярмакнень лангс театрась якай гастрольс Россиянь финно-угорскяй республикав и лия регионц, коса компактнайста эряйхть мокшэрзят.
Тяфта жа, пялькстомок Российскяй Федерациянь Культурань министерствать лия программаса, Национальнай драматическяй театрась сатни грантт постановканди.
Кепотьксонди, ня ярмакнень лангс, пцтай 4000000 цалковай, театраса путфоль Валентина Мишанинать пьесанц коряс «Куйгорож» спектакльсь, кона сявсь ни аф фкя гран-при Международнай и Всероссийскяй театральнай фестивальса.
—Кодапт, Светлана Ивановна, сай кизонди планонте-арьсеманте?
—Кода фалу, Мордовия Республикань Национальнай драматическяй театрась сай кизоня кармай путнема од спектакльхть, ётафнема гастрольхть Мордовияса и Россиянь финно-угорскяй лия республикатнень эса, а тяфта жа странань ся областтнень эса, коса компактнайста эряйхть мокшэрзят.
Карматама няфнема од спектакленьконь Межрегиональнай, Всероссийскяй и Международнай театральнай фестивальхнень эса. И, конешна, тяфта жа эрьгавста карматама работама стационарса, сяда сидеста няфнемок спектакльхть театрань залса.
Тяфта тиемс арьсекшневи нинге сяс, мес тядде пандемиять сюнеда ладяф ограничениятнень инкса театрань залть мярьгондеви пяшкотькшнемс аньцек 30 процентс. Сяс надиян, сай кизоня коронавируснай пандемиясь аценди, и ограничениятне лафчептовихть. Мезсь, конешна, арай цебярь казнекс кода зрительти, стане и Национальнай драматическяй театрати.
—Удалаза, Светлана Ивановна, арьсефонте.
—Сюкпря. Эсь ширден «Мокшень правда» газетань лувихненди арьсян васьфтемс Од кизоть валда мяльса и од надиямаса! Малаткшни Од кизоть мархта, кельгома ялгат!
В.НЕСТЕРОВ.

10.12.2020 №48
 
 
 

 
НОВОСТИ
 
 
 
 

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021  № 1
 
 
 
 

Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020  № 48
 

«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020  № 48
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин