В.И.Мишанинати—70 киза

Васенце авась—Народнай писателеньке
1968 кизоня Мордовиянь Писателень союзсь кочкась мокшень и эрзянь цёрат и стирьхть, штоба синь кучемс тонафнема Москуву А.М.Горькаень лемса литературнай институту. «Мокша» журналть главнай редактороц Илья Девин пара мяльса азозе:
—Эрьда кучсаськ Валентина Мишанинать! Сон машты ни сёрмадома. Катк тоса нинге тонафни.
Кадошкинскяй райононь Адаж велень стирсь Валентина Мишанинась аньцек-аньцек аделазе кемонце классть. «Мокша» журналу кучсезень васенце стихонзон и азксонзон, и синь ульсть печатлафт.
Москуву тусть тонафнема кота цёрат и стирьхть. Тонафнезь содаф поэтт, писательхть, критикт. Сёрматфснонга ванондозь, няфнезь, мезсь удалась, а мезсь изь удала.
Валентина Ивановнань салазь мяленц азксне. И васендакиге иттнень  колга и теест лувондомс. Эсь идькс пингоц нинге ёфси аф ичкози лядсь. Кода крхка ару эшиняста амолясь эздонза од эряфонь шаролкскат, мяльхть-арьсемат, кинь ушеткст.
Эрясь Москуса, тонафнесь институтса, а азксонзонды сашендсть мокшэрзянь крайсь, шачема велец, идькс пингонь ялганза. Кой-кона азксонзон кучсезень «Мокша» журналу и «Мокшень правда» газетав, печатлакшнезь.
Мишанинать серьгятькшнезь Саранскяи од писателень семинарска. Сембода пяк мяляфтовсь теенза семинарсь, кона ётась, мзярда  Валентина Ивановна тонафнесь Москуса нилеце кизось ни. Кандсь мархтонза кой-мзяра азкс. Ванозь семинарса, ламотнень шназь. А ванондозь кит? Содаф писатель и содаф поэт. Юрий Кузнецов и Сергей Кинякин.
Синь и кошардозь Мишанинать, штоба кандолезень Мокшэрзянь книжнай издательствав сембе азксонзон. Синь, ня содаф кафцьке алятне, покодсть издательстваса.
1972 кизоня лиссь Саранскяйса Валентина Мишанинать «Кить ушетксоц» азксонь васенце книгац.
1973 кизоня Мордовияста кучф цёратне и стирьхне шумордазь Горькаень лемса литературнай институтса тонафнемаснон, мрдасть шачема шири. Тевфтома ашесть ляда. Кинь сявозь покодема телевиденияв, кинь—газетав. Валентина Мишанинать серьгядезь Мокшэрзянь издательствав, тоза, коса нолдазь васенце книганц.
Издательствать фкя комнатац алуце этажсоль. Тясоль художественнай литературань редакциясь. Тяза и сашендсть писательхне. Няфтезь, кие мезе сёрмадсь. Спорсесть. Кенярькшнесть, кинь лиссь книгац тязк мокшекс, эрзякс, рузкс, а кинь нолдазь и Москуса. Кода аф кенярдят! Сяс и морась кой-коста художественнай редакциясь. Тяса и сотцезе Мишанинась, кода эряйхть и мезе арьсихть писательхне.
Кизошкада меле Валентина Ивановна «Мокша» журналть редакцияса ни. Журналсь лисендсь кафта ковти весть. Эсонза печатлакшневсь и «Якстерь тяштеня» журналсь. И сон ушедсь вятемонза. Сёрмадыда ламоль, а журналса аньцек кемготува лопаняль. Кажнайсь учсь, мзярда соньге печатласазь. Тяфтамоль тевсь оцю журналса. Писателень тналсь кассь, эвондасть и повестть, и роматт. Пяк тушендсть Мишанинать мяльс Яков Пинясовонь иденди азксонза. Журналу сембе ашесть тяльгонде, лисендсть башка книгаса Саранскяйса и  Москуса. А кой-кона азксонзон лувондозь и лия странаса—Венгрияса, ГДР-са, Польшаса и нльне Китайса.
Вов тейть и мокшень писатель! Яков Пинясовонди васенцекс макссть Мордовиянь Народнай писателень лем.
Эрявсть «Мокша» и «Сятко» журналхне нолямс аф кафта ковти весть, а эрь ковня. Эрявсть нолямс идень журналхтка.
«Мокша» журналсь тиезе васенце аськолксть. Потмостонза «Якстерь тяштенять» валхтозе и ушедсь нолямонза башка. Тяни сон кунара ни арась идень афкуксонь цебярь журналкс.
Валентина Ивановна лама кизот «Мокша» журналса ответственнай секретарель. Сонь кядялонза шарсть журналть ламоц тевонза. Журналське полафтсь, кармась лисендема эрь ковня.
Лиссь Мишанинать омбоце книгац—«Сиянь ракакудня». Кода сёрмадсь литературоведсь и критиксь Мария Малькинась: «Валентина Мишанинать произведениянзон эса конфликттне драматичнайхть, азксонза, повестенза, конешна, и драманза аделсевихть ризнафты сценаса: «Сиянь ракакудня» легендаса кяжияф Ведявась тисы кельги цёрать ведькс, а кельгома стиренц—ракакуднякс; Пингонь ортатнень омбокса эрьгодсть фкя-фкада Сиям и Гарой; аф павазу Максимкась «Эсь беряконцты» повестьса; пичетькшни аф прокс удалаф эряфонц инкса Анастасия Львовна «Качаму шобдава» азксса. Да и сембе тяштьфонзон эса сатомшка лама седиень кольфти сценада».
Тяса лятфтаськ, мезе Мишанинась сёрмадсь сяда тов. А «Пингонь ортат» повестец и кой-кона азксонза «Ворота времени» лем ала лиссть Москуса «Детская литература» издательстваса 1984 кизоня. Рузкс повестть и азкснень ётафтозень сонць Мишанинась. Москуса «Литературная Россия» газетаса печатлазь и «Качаму шобдава» («Дымное утро») азксонц.
Лиякс мярьгомс, Валентина Мишанинать азксонза и повестенза ушедсть нолявома и рузкс,  пачкодсть аф аньцек Москуву. «Сиянь ракакудняц» лиссь Таллин ошса эстононь кяльса. Азксонзон эсь кяльсост лувондсазь Венгрияса и Финляндияса, лисендсть синь и удмуртонь, карелонь, мариецонь, коминь кяльсовок.
Мишанинась лама вий путни финно-угрань литературатнень ёткса соткснень кемокстамаснонды. Улендсь и уленди марстонь пуромксса. Васетькшни радня писательхнень мархта. Аф весть ётафнезень азксснон мокшекс, печатлакшнезень «Мокша» журналса.
Мольсь пингсь. Лиссть Валентина Мишанинань книганза: «Озкс тумоть тарадонза», «Ки лангса ломатть», «Вальмафтома куд». Кие ашезе васьфне, азондозе синь колгаст эсь мяленц, шачема велесонзовок кизефнезь, кода сёрмадозень «Эрясь-ащесь Куля баба» и «Тев мельге Пиче вели» азксонзон. Пяк ни лятфнесазь эсь эряфснон и содаф ломаньцнон.
1993 кизоста сявомок Валентина Мишанинась кармась вятемост Мокшэрзянь национальнай драматическяй театраса литературань тефнень, аноклакшнесь пьесат. Кярьмодсь тя тевти сяс, мес сонцьке арась драматургокс, пьесань тяшникс. Эряфсь макссь теенза сюрекит пьесань сёрмадомс, ломанень седи-ваймотнень няфнемс, няфнемс сянь, кода стясть карань-каршек  паронь арьсемась и кяжсь, ялгаксшись и фкя-фкянь лангс врьгятнемась, ломанькс эрямась и аньцек козяшинь мельге панцемась. Национальнай театрать сценаса сон няфтезень «Кда орта лангса суви пине», «Куйгорож», «Тят шава и тят сала», «Толмар» и лия пьесанзон. Синь колгаст азондозь мяльснон критикне, спектаклятнень  ванысна. Мяленьке миньге кой-мезе азомс.
Мокшень и эрзянь писательхне эсь произведениязост сувафнезь фольклоронь геройхнень. Пераснон алда лисендсть «Толонь нармотть», «Сельведь-богатырьхть», «Атямонь рьвянят». Тя киге сась тейнек и Мишанинать «Куйгорожец». Мокшень фольклорса сон инь отькорь дейка. Мярьгат, шары крня. Ёфси тевфтома аф ащи. А нарвазе Куйгорожть алста Сюмерьге баба—Ведун баба, Пята атянь рьвац. Надияфтсь, мезе аф анат Куйгорожть кядьста, тисы. Анасть од куд, и вов ни мазы од кудсот, шра лангсост мезе аньцек аш поремс. А Куйгорожсь тага корхтай: «Тевс кучемак!» Меколи атясь мярьгсь калафнемс пандть. Сяньге Куйгорожсь тисы, а мзярда козовок аф кошардасазь, юмай-арай.
Мезти тонафтсамазь кунардонь ёфкссь? Тяда «нарвосе» куйгорошт. Тяда надиякшне лангозост. Семботь сатнесть тинць.
Валентина Мишанинать сембе пьесанза, а эздост кемоньда лама, сявфт эряфста. Тяфтама и аф кувака пьесац, кона тернесамазь «Сада инжикс». Ошть песа ташта кудса, кода дачаса, эряй Вера, нинге аф сире авась. Цёрац рамазе тя кудть, ёрай путомс вастозонза од куд, кафта этажса коттеджа. Тядянц кучезе тяза эряма. Бабать аф мялезонза. Сембось тяса читорды, поталакста     пяяри рдаз. Вера бабань тячи шачема шиц. Телефонца серьгядезе уноконц. А цёрац и рьвяняц аф сайхть. Кенкшти чакайхть. Мусть вирьса эрьготьф бабаня. Сувафтозь. Сась Верать унокоцка Никита. Озафтозе шрать ваксс. Кие-бди тага чакай кенкшти. Вера лиси, кядьбеда сувафты апак нарак  атя. Ся ойксни, кулан, кле, урмась фатямань. Вера гайфти «скорайти», самс ашесть надияфта. Сонць путы атяти укол. Сон медсестра, Никитань тя аф мялезонза. Ёрасы Митя бомжть панемс. Верать аф нолдасы. Меколи дачаса Вера шачема шинь иласонза симихть-ярхцайхть и Митя бомжсь, и эрьготьф бабанясь. Цёрац тяда инголе тусь. Но сон тага эвондай. Мархтонза вятьсы пеку Даша стирть, эняльди нолдамс синь тяза эряма. Дашать тядяц и аляц панезь кудста.
Тевсь шарфты крутаста. Даша ушеды ойкснема. Вера щакась сувафтсы омбоце комнатав, матсы кровати. Сонць тага гайфти «скорайти». Мзярда сась «скорайсь», Даша и Никита ашельхть ни тяса. Даша шачфтсь. Никита серьгядсь «такси» и синь ворьгодсть. «Коса шачфтысь?»—кизефтезь Верать. «Шачфтысь—мон»,—азозе Вера. сонць кирдезе беремаса иднять.
Аф фкя киза Мишанинась Мокшэрзянь национальнай театрань артисттнень ёткса. Виде, ниле кизот аерфнезь тяста, кочксезь Мордовиянь Писателень союзть правленияв председательти полафтыкс, а меле тага тяса, коса инголет сценась, а  седисот, мяльсот эряфонь китне-яттне. Пароль мялезонза, мзярда артисттне тушендсть мокшень и эрзянь велева спектаклянь няфнема, а мзярда мртцесть, азондозь, конашкава кенярдезь васьфнезь велеряйхне эсь шачема кяльса корхтазь налхкомаснон.
Национальнай театрати кадозь эсь пьесаснон сире писательхне, пьесасна тя пингс ашесть ола, ашезь юмафта асуснон, вановихть оцю мяльса.
Ужяль, пяк шуроста каннихть од пьесат Мокшэрзянь национальнай театрав писательхне. Сембе сяка ули надияма—мокшень и эрзянь кяльса пьесань сёрмадомась аф лафчеми. Аф лафчеми, мес минь ули Николай Платонович Огарёвонь лемса университетоньке, ули Макар Евсевьевич Евсевьевонь лемса педагогическяй университетоньке. Огарёв и Евсевьев учёнайхне лац содазь мокшэрзянь крайть, сонь асу ломанензон, цёранзон и стирензон. Синь ёткстост касондсть и касыхть эряфонь латцихть, сёронь видихть, кшнинь шяняфтыхть, артистт и писательхть.
Валентина Мишанинась ётафтозе мокшекс Николай Васильевич Гоголень    «Рьвяяма» («Женитьба») пьесанц.  И пяк удалафста няфтезе тя пьесать Национальнай театраньке. Гоголень героенза корхтазевсть мокшекс. Ули кинь эзда тонафнемс мокшень и эрзянь кяльса пьесань сёрмадыхненди.
Шачсь Валентина Ивановна Мишанинась Кадошкинскяй райононь Адаж велеса 1950 кизонь 25 ноябрьста. 1977 кизоня примаф СССР-нь Писателень союзу. 2011 кизоня теенза максф Мордовия Республикань Народнай писателень почётнай лем.
Сон васенце авась—Народнай писателеньке. Арьсетяма теенза кеме шумбраши, ламоняс эрямс, кеняртьфнемс  лувихнень од книгаса, няфнемс сцена лангса оцю киге ласьки урмань сяськонди эряфоньконь.
              Анатолий Тяпаев.