Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031

 
 

 

Национальная тематика

ГАЗЕТАТЬ ЦЕБЯРЬ ЯЛГАЦ

Нинге аф кунара Атюрьевскяй райононь велетнень эса эрясь-ащесь Великай Отечественнай войнань лама ветеранда, конат ульсть цебярь ялгакс «Мокшень правдати». Газетать 100 кизонь юбилеенц карша аш кода аф лятфтамс Мордовскяй АССР-нь Заслуженнай учительхнень М.В.Кондрашкинонь, М.П.Кшнякинонь, велень хозяйствань труженикть В.И.Жаткинонь и лиятнень лемснон. Синь аф аньцек сёрматфнезь, морафнезь газетаньконь, но и пара мяльса сёрматкшнесть велень эряфть, трудонь кельги ломаттнень колга, кепсесть оржа кизефкст, азонкшнезь эсь мяльснон-арьсемаснон кяльть, литературать, койхнень-обуцятнень квалма. Тячиень номерса мялезе азондомс войнань и педагогическяй трудонь ветеранть, мокшалять М.В.Кондрашкинонь колга.
Редакцияса ашель стама журналист, конань афолезе сода Михаил Васильевич. Сон цебярь ялгаль В.М.Сурковонь, Н.И.Учватовонь, П.П.Кулешовонь мархта, содазе и И.С.Лушкинонь. Стане жа лац содазень А.С.Малькинонь, И.М.Девинонь, Г.И.Пинясовонь, М.Г.Имярековонь, И.Н.Кудашкинонь, М.С.Моисеевонь, конат разнай кизотнень трудендакшнесть тядянь-алянь кяльса лисенди изданиять эса. И пяк дивандакшнесь, кодама асу ломатть смексезь-тиендезь газетать.
Учительсь сёрматкшнесь тонафнемань книгат национальнай школань иттненди. Эрявсть стихт, аф оцю азкст. Сай эняльдема мархта Саранскяи, сувай редакцияв, азсы, мезе теенза эряви.
—Архт, якак аф ламос,—корхтайхть редакцияса. Частта меле сувай, а стихне ни учихть эсонза.
Михаил Васильевичень телефоноц ульсь редакциянь эрь сотрудникть кядьса. Но сембодонга пяк гайфнесь Д.А.Любимкин. Сон вятезе сёрмань отделть. Эрь корхтамац ушеткшнесь тяфта.
—Михаил Васильевич, моли «Мокшень правдати» сёрматфтомась. Лезтт, ялгай, тя эрявикс тевса.
Гайфнемась ашезь сатне, Данил Александрович тяшнесь Михаил Васильевичень лемс сёрмат. И ветеранць, коса афоль покоде, сёрматфнесь куду, организацияв эсь кяльса лисенди газета. Кошярязень тянь тиемс мархтонза покоди ялганзон.
Мзярда шисоль педагогическяй трудонь ветеранць, аф весть колганза тяшнень кельгома газетазонк. Ломанць сон Атерьса, районца, да и марнек республикаса содафоль. И аф аньцек мес лама киза ульсь школань директоркс, образованиянь отделонь вятикс, тонафнемань книгань, методическяй разработкань авторкс, но и лама вий, пинге путсь «Память» книгать сёрмадомста. Тя тевонди кизот тушендсть. И мзярда тяшнень колганза, фалу кизефнине: «Мзярда ушедсь «Мокшень правдать» сёрматфнемонза?» Тя кизефксть лангс Михаил Васильевич фалу отвечсесь шутендазь:
—Шачень-касонь мокшень Бораж велеса. Алязе, Василий Тимофеевич, учителель, грамотнай ломанель. И нинге шабакс мяляфтса кудсонк ульсь «Мокшень правда». И сонь пара мяльса лувондоськ.
Пцтай 70 киза сувсесь тядянь-алянь кяльса изданиясь Кондрашкинонь кудозонза. Мокшалясь куломозонза ашезь явонда газетать мархта.
—Тядязе, Мария Яковлевна, рузаваль,—корхтай Михаил Васильевичень цёрац, Торбеево посёлкань эряйсь, Николай Михайлович.—И сон вестевок ашезь аще каршек «Мокшень правдати». А кой-коста зарплатаста, пенсияста сонць тяштьфнесь алязти газета. Пара мяльса газетать ванондоськ миньге. Хуш и монцьке эрян рузава мархта, но мокшень кяльть кельгса, оцю мяльса корхтан. А тя кельгомась сась алязень эзда.
«Мокшень правдав» М.В.Кондрашкин тяшнесь сидеста. Азонкшнезе лувихненди, кода васьфнесь, ялгафтсь А.С.Малькинонь, И.М.Девинонь мархта, кода пякснезь тюрьмав учителенц, содаф мокшень поэтть В.А.Волковонь. Василий Афанасьевич вятсь Мокшень Козловкань школаса мокшень кялень и мокшэрзянь литературань урокт. Кондрашкинда башка ученикокс теенза ульсь и сай пингонь содаф поэтсь П.К.Торопкин. Фкя шиня састь шабатне тонафнема, а учительсна аш. Эста тянь квалма лама ашесть корхне. Но школаса содазь, што учительснон пякстазь. «Мокшень правдать» мархта ялгафтсь и М.М.Ковнин, кона печатлакшнезень эсь стихонзон, азксонзон, зарисовканзон, статьянзон велень эряфть, трудонь кельги ломаттнень колга.
Михаил Васильевич цебярьста содазень И.М.Кшнякинонь, Ф.С.Руськинонь, А.П.Майоровонь, конатнень мархта васьфнесь и Атерьса, и Саранскяйса. Народнай образованияти Кондрашкин ялгась лемдсь нильгемоньда лама киза. Ульсь и школань директоркс, и РОНО-нь заведующайкс. Саранскяйста саф инжихне вестевок ашесть ётне аф кабинетонц, аф кудонц вакска. Сувсесть кода радня ломанень пяли. И педагогическяй трудонь ветеранць сембонь примсезень.
«Мокшень правдать» цебярь ялгац ётась кувака и аф тёждя эряфонь ки. Шачсь сон Атюрьевскяй райононь Бораж мокшень велеса. Велесь ащи мазы вастса, ёфксонь уженяса. Перьфканза вирь. Шачсь учителень семьяса. Аляц, Василий Тимофеевич, грамотнай ломанель, тонафтсь велень иднят. Эстонь кизотнень Бораж велеса аньцек начальнай школаль. Ветеце классу мольсь тонафнема шабрань Мокшень Козловка вели. Школада меле трудендась «Виде эряф» колхозса. Тяса и сатозе Великай              Отечественнай войнась. 1944 кизоть ушетксста сявозь Якстерь Армияв. Тюрсь фашисттнень каршес Белоруссияса, Латвияса, Литваса васенце Прибалтийскяй фронтть составса. Тоса ульсь колмоце Белорусскяй фронтть составса, тюрсь Восточнай Пруссиять, Кенигсбергть инкса. Тяса и васьфтезе Сяськомань шить.
Войнада меле частьснон ёрдазь Дальняй Востоку, тюрсь и Япониять каршес. Казьф      Отечественнай войнань II степенень орденца, «За взятие Кенигсберга» и лия боевой медальса. Куду сась 1951 кизоня. Служась связень войскаса, кеподсь срафтф-калафтф странать эса.
Тяда меле Михаил Васильевич сась Атери. Покодсь кинофикациянь отделонь оцюнякс, комсомолонь райкомса омбоце секретарькс. Тонафнесь Темникавонь учителень институтса. Тяка пингть путозь директоркс Бораж велень кафкса кизонь школав. Од директорсь васенце вастти путозе од школань строямать. Уликс школась аф оцюволь, срадома лангсоль. И тя теенза удалась. Ужяленди, но школась тяни сёлкф.
Пенсияс лисемда мелевок тевфтома ашезь ляткшне. Вятезе Атюрьевскяй райононь Ветеранонь советть. 2000 кизоня ульсь Москуса Сяськомань парадса. Примась участия «Память» книгать сёрмадомаса. Вете кизот макссь тя тевти. Мзяра сёрма, совет, эняльдема сашендсь Михаил Васильевичень лемс. Сембе ванфт, киртьфт мяльса «Память» книгать нолдамста.
Михаил Васильевич рьванц, Мария Яковлевнань, мархта касфтсть вете итть: колма цёрат, кафта стирьхть. Нина и Валентина—педагогическяй трудонь ветератт. Васенцесь эряфонц оцюшканц максозе Торбеевань 3№, омбоцесь—Атерь велень 2№ средняй общеобразовательнай школатненди. Владимир покоди Торбеевань газораспределительнай станцияса, Николай—Торбеевань «Энергия» ООО-са. Василий эряй Москуса. Михаил Васильевичень кинц кочказь уноконза Владислав и Екатерина. Кондрашкиттнень учителень родсна вятеви сяда тов.
М.В.Кондрашкин, «Мокшень правдать» ялгац, кадсь эсь колганза пяк цебярь лятфнемат, тонафнемань книгат, методическяй пособият, конатнень тянемс нолясазь тевс уроксост мокшень кялень учительхне. А «Память» книгась арась шра лангонь энциклопедиякс. Мезсь кеняртьфти, Михаил Васильевичень лемоц и пара тевонза апак юкстакт. Лемозонза лятфнемань илат ётафневихть Боражень, Мокшень Козловкань, Атерень 1№ средняй школатнень эса, районнай библиотекаса, коса шнамань валса азонкшнихть колганза учитель ялганза, учениконза, раднянза, велеряенза.
Илья ВЕШКИН,
Россиянь Писателень
союзонь член.

24.12.2020 №50
 
 
 

 
НОВОСТИ
 
 
 
 

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021  № 1
 
 
 
 

Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020  № 48
 

«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020  № 48
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин