«Шачема ширети лажадомась фалу эряй ваймосон»,—мярьгсь мокшавась А.Ф.Пирогова (Артемкина)

«Мокшаваня» рубрика ала стаки пачфнетяма асу, лама тевса сафты, шачф-удалаф мокшаватнень-баяраватнень колга. Коса синь афольхть эря, кодама работаса афольхть работа, аф ваномок заняфшиснон лангс, фалу шарфнихть башка мяль национальнайти—мокшэрзянь культурати, коеньконди-обуцяньконди, моротненди и сиде моронятненди. Кафтонь-крда кеняртьфти ся, што тяфта уленди аф аньцек мокшэрзянь масторса, но и ширеса эрямстост. Мярьктяма, тусь ломанць Мордовияста лия региону или республикав, мес тяфта тись—эрть сонцень туфталонза. Но и ёмла родинать эзда ичкозе эрямста ламоц мокшетне аф юкснихть сянь колга, мезсь ётась теест тядянь лофцть мархта. Тяфтапнень ёткс сувси и «Мокшаваня» рубрикать тячиень героиняц Мордовиянь Ковылкинскяй райононь Керата велеса шачф-касф мокшавась Антонина Фёдоровна Пирогова (Артемкина). Мзярда мокшавати эняльдень азондомс эсь колганза, корхтаманц ушедозе ёмла родинанц эзда.
«Шачень-касонь Ковылкинскяй райононь Керетино велеса, конанди мокшекс мярьгихть Керата. Идькс пингонь лятфнематне тянемс эжнесазь ваймозень. Тядязе, Дарья Степановна, и алязе,  Фёдор Арсентьевич, покодсть колхозса, тиендсть кудъётконь тефт. Тяда башка, алязе эряфоньберьф ялгаль гармониять мархта, сон цебярь гармонистоль, сяс музыкальнай тя инструментть вайгялец сидеста кайгсь кудсонк. Тядязе пяк кельгозе кургса мораманц, сонь мазыель вайгялец. Вов и минь—иттне (эздонк колма) туме лацост. Брадозе, Николай Фёдорович, гармонист, мон и сестразе,    Тамара Фёдоровна, кельгоськ и тянивок кельгсаськ кштиманьконь и мораманьконь. Тядянь-алянь кудса сидеста кочксевсть ломатть, праздникнень пингста кулевсть мокшэрзянь, рузонь морот, сиде моронят. Керата велень школаса тонафнемстон оцю мяльса примсень участия ётафневи сембе пуромкснень эса, лисендень сценать лангс».
1983 кизоня Антонина Фёдоровна тусь Москуву. Тонафнесь училищаса, работась пищевой комбинатса. Лиссь рьвакс. Мзярда шачсь стирец Оксана, кой-мзярс ашезь работа, а меле пильгонек-прянек ваясь панчфонь бизнести, флористикати. Панчфнень мархта работамась эстокиге тусь мокшавать мяльс, сяс тя тевти сон макссь аф кржа киза.
Москусь—пяк оцю ош, конань эса эряфсь лаказь-лакай, тевда кргавидева, шитне эрязста ласькихть фкя-фкянь мельге, ётка пинге ёфси аш. Тянь аф весть савсь кулендемс столицань пцтай эрь эряйть эзда. Но, аф ваномок заняфокс улемать лангс, Антонина Фёдоровна ёрась кирдемс соткст Москуса эряй мокшетнень и эрзятнень мархта, морсемс родной кяльса морот, примсемс участия ётафневи пуромкснень эса. Тя и вятезе сонь «Баяраваня» самодеятельнай межэтническяй ансамбльти, кона Люберцы ошса. Вете кизот мокшавась морсесь творческяй тя коллективса, якась репетициятненди, эрь выступленияти аноклакшесь виень аф ужяльдезь. Сонь улихть мокшавань щамонза-карямонза, конатнень Антонина Фёдоровна лувондсыне инь оцю козяшикс эряфсонза.
«Павазонди, ванфтовсть щамоньке и нарядоньке. Но тя тейне няевсь кржа. Москуса эрямстон стафтонь отт, козякофтыне эсь лацонь коллекциязень. Тянемс ванфтса тядязень рьвакс тума панаронц»,—азозе А.Ф.Пирогова (Артемкина).
Тяни мокшавась уликс туфталхнень сюнеда аф морси «Баяраваняса», аф якай репетицияс. Но тя аф корхтай сянь квалма, што юкстась национальнай ширеть колга. Мокшень велеса шачф-касф эрь ломанць, койсон, фалу мяляфтсы кода ётнесть праздникне, кода мольфтевсь теест анокламась, кодама ярхцамбяльхть кудазораватне путнесть шра лангс.
Тячиень героиняньконь валонзон коряс, Керата велеса тядяц эрь праздниконди пицесь-панцесь суронь эчке пачат, аноклакшесь студень, шяняпт, конатненди Кератаса мярьгихть сокор тувонь шяняпт. Тяфта фалу улендсь Михалувонь шиня и Очижиста. Вов и стирец Москуса сидеста аноклакшни национальнай ярхцамбяльхть, каванякшнесыне мархтост ширезонза сашендыхнень.
Антонина Фёдоровна, аф ваномок ширеса эрямать лангс, мзярдовок аф юксни Мордовиять колга. Сидеста сашенды Ковылкинскяй району. Керата  велеса тянемс ащи Пирогофнень кудсна. Фотографиянц лангс ваномста аф мярьгат, што эсонза аш фалунь эряйхть. Няеви, што кудть мельге якайхть, ваныхть мельганза. Вельхтяф кшнинь вельхксса, стенанза архтфт, перьфоц шарф перяфксса, фкявок сор тишеня аф няят.
Кода азозе Антонина Фёдоровна, тядянь-алянь кудсь фалу ульсь и тянивок ляткшни ваймонь сетьмофти уженякс. Суван, кле, и эстокиге юкстан ризфнень-пичефкснень колга и коль учан, што каршезон лиси тядязе. Ужяль, но мокшавать шачфтыенза-касфтыенза кунара ни ашет шиса. Аньцек родной кудть лямбоц сембе сяка эжнесыне иттнень. А.Ф.Пироговать (Артемкинать) брадоц, Николай Фёдорович Пирогов, Кератав сашенды сяда сидеста сембонь коряс, тяса ётафнесы и отпусконц. Ваны кудть мельге, кирдьсы сонь арушиса, сяс и няевихть алянь кяттне.
Кода лятфнине сяда вяре, тяни героиняньке мзярс аф морси коллективса, но аф явонды моротнень мархта.
«Мялезон рузонь, мокшэрзянь, украинскяй и лия моротне, сиде моронятне. Марнек семьяньке музыкальнай и пара, што мороти кельгомась ётась тейневок»,—мярьгсь сон.
Антонина Фёдоровна, мзярда уленди Мордовияса, Кератаса, аф ащекшни тевфтома. Кизонда сявондьсы кядезонза куймонянц и туй паксяв иможень кочкама.
Кепси мялец, што Кератаса пцтай ашесть ляда шава кутт. Ломаттне, кле, мртцихть меки, рамсесазь катф куттнень. И целайнек велесь мазы, ару, китне ацафт асфальтса, ётафтф ведь.
А.Ф.Пирогова (Артемкина) лувондсы прянц павазу ломанькс. Стиренц Оксанать кафта высшай образованиянза, сон работай ведущай специалистокс автомобильнай оцю компанияса. Антонина Фёдоровнанди тиезе эряфса инь оцю казнетнень эзда фкять—уноконять, конань лемоц Прохор.
Тяни моли Од кизоти, Роштувати анокламась. Конешна, коронавирусть сюнеда ня, кода и лия праздникнень, савихть ётафтомс лиякс мелянь-манань кизотнень коряс. Но мокшавась надияй, што марстонь вийса минь сяськсаськ тя урмать и сембось меки арай вастозонза. Катк тяфта и ули!
Т.АЛЬШИНА.