Д.А.ЛЮБИМКИН: «ПАВАЗУКС ЛУВСА РЕДАКЦИЯСА РАБОТАМА ПИНГОЗЕНЬ»

Данил Александрович Любмкин! Тя лемсь республикасонк лац содаф аф аньцек журналисттненди, редакциянь работникненди, но и велень, ошень ламоц эряйхненди. Тя и шарьхкодеви: вдь эсь эряфсонза 45 киза сон макссь журналистикати. Пцтай пяле век седикс-ваймокс покодсь «Мокшень правдаса». Сон тяса занцесь разнай должностть: ульсь литсотрудникокс, ответственнай секретарькс, сёрмань отделонь заведующайкс, общественно-политическяй отделонь редакторкс. Кой-коста нльне ляткшнесь главнай редакторть вастс. Редакцияса работамста сатсь оцю уважения и авторитет Мордовиянь журналисттнень, писательхнень, марнек национальнай интеллигенциять ёткса, и, конешна жа, «Мокшень правдань» лувихнень ёткса.

Д.А.Любимкин кунара ни пенсияса, кудса ваймоси. Но Од кизонь карша тейнек удалась васьфтемс и седишкада корхнемс мархтонза.

Да, аш кода мярьгомс, што кизотне тяфтак ётасть трудонь ветерантть вакска. Синь лешазь шяярензон, стакалгофтозь аськолксонц, но исть матов валда тяштенятне сельмостонза. И мялямонцтывок Данил Александровичень дивандат, азонды тяфтама подробность мархта, бта сембось ульсь исяк. А событияда 83 киза кувалмонь эряфсонза аф кржаль.

Кода «мокшень правдисстт», конешна, корхтаманьконь ушедоськ родной кяльсонк лисенди газетаньконь  малаткшни юбилеенц эзда.

—Эхи вишкста моли пингсь, афи моли, а лиезь лии,—пеедезь ушедозе азондоманц Д.А.Любимкин,—ваттака, сай кизоть топоди 100 киза ни «Мокшень правданьконди»—«минь Щаваньконди» (тяфта кельгомга лемнесазь газетать мокшень журналисттне и писательхне).

Сон аф ламос арьсезевсь, а сяльде поладозе:

—Мзярда арьсекшнян редакцияса ётафтф кизотнень колга, фалу сашендан мяльс: мон павазуван ломанць, што тняра пинге работань национальнай газетасонк, кона ётась кувака, стака, но и славнай ки. Кочкась козя опыт, кассь профессиональнай ширде, лама пара тев тись эсь народонцты.

—Тон, Данил Александрович, занцеть разнай должностть редакцияса, но сембода лама киза улеть сёрмань отделонь оцюнякс. И кулендевсь, бта тя вастсь сембодонга пяк тушендсь мялезт?

—Афкукс тяфта. Вастозень мушендыне сёрмань отделса. Монь койсон, тя отделса сембода интереснай работась. Тяса кядялгат ётнихть сембе сёрматне, рабселькорхнень сембе материалсна. Васенцекс лувсайть и синь прважасайть отделга. Минь картотекасонк эста ульсь 350-шка рабселькоронь лем. Эрь кизоня получсеме пцтай 4 тёжятть сёрма ломаттнень эзда. Минь старандаме коль сяда касфнемс газетать лувиензон лувксснон,—сяда тов азонды Д.А.Любимкин.—Тянкса велева панчсеме корреспондентскяй пунктт. Синь перьфкаст пуромкшнесь лама селькор. Ня лездыеньке сёрматкшнесть и пачфнесть редакцияв статьят, корреспонденцият, информацият.

Штоба газетать сяда маласькофтомс ломаттненди, районга ётафневсть лувиень конференцият, беседат. Велеряйхненди пачфневсь, кит и кода тиендьсазь газетать. Тяса жа сотцевсь, мезсь тушенды мялезост лувихнень, а мезсь аф, мезе ёрайхть няемс газетать страницанзон эзда.

Вяре азфти эсь ширденк поладсаськ. Данил Александрович сембе 350-цьке райселькорхнень содазень аф аньцек шамас, но и синь лемснон, эряма, работама или тонафнема вастснон. Редакцияса дивандакшнесть: кода кирнезе сон тяфтама оцю информациять прясонза. Тяда башка, сёрмань отделонь оцюнясь эрь кизоня рабселькорхненди кучсесь памяткат, коса пачфневсь-азондовсь сянь колга, кодама темас материалхт васендакиге эрявихть редакцияти, мезть лангс шарфтомс башка мяль и стак тов.

—Любой газетать авторитетоц, популярностец ащи эсонза покоди журналисттнень эзда, сянь, кода синь малаткшнихть эсь тевснонды, макссь ли теест Шкайсь сёрмадомань асу. Мезе азолеть тянь ширде «Мокшень правдаса» покоди эсь ялгатнень колга?

—Васендакиге мялезе азомс: «Мокшень прадавть» редакцияса сембе пинкнень ульсь пяк цебярь творческяй атмосферась. Эряме и работаме ладязь, фкя-фкянди лездозь, кельгоськ тевоньконь, кельгоськ и весялготкшнеманьконь. А ваносте, кит мархтон работакшнесть газетаса: Илья Девин, Илья Кишняков, Юрий Кузнецов, Анатолий Тяпаев, Михаил Кяшкин, Иван Чумаков, Василий Чукаров, Василий Шеянов, Михаил Бычков, Павел Вельматов, Анатолий Ежов, Григорий Пинясов, Михаил Моисеев, Василий Каргин, Иван Кудашкин и лиятне. Ня лепне мокшэрзянь крайсонк содафт лац эсь статьяснон, очеркснон, фильетонцнон, лия публикацияснон коряс, конатнень фкя-фкянди малакс тиендьсыне ся, што аноклафт профессиональнай оцю уровеньца, мокшень ару кяльса-валса.

А од журналисттнень кядьста эста лама вешевсь и кизефневсь. А сят, конат вешендсть тёждя тефт, редакцияса ламос исть кирнев.

—Юбилеень карша парольхть лятфтамс велень, рабочай и ся корреспонденттнень лемсна, конат сяда сидеста тяшнесть редакцияв заметкат, корреспонденцият, кинь лезксснон вельде тиендевсь газетась.

—Лувихнень лезксфтома нолямс мялень салай, интереснай газета пяк стака, пцтай аш кода. Сяс минь, «Мокшень правдаса» покоди журналисттне, кеняртькшнеме редакцияв саф эрь сёрмати. А тейнек сёрмадыда, лездыда, кода сяда вяре азыне ни, эста ульсь пяк лама. Сембе тяни афи лятфтавихть, сяс азсайне инь активнайхнень. Нят: П.Ф.Царев, И.Х.Торопов, А.П.Четырев, Г.И.Ларионов, И.С.Леванов, Н.П.Циликин, И.Л.Житаев, И.М.Сергушкин, В.Н.Корчеганов, Н.С.Алямкин, Ф.М.Костяйкин, В.П.Резепов, С.В.Нумолов, М.В.Кондрашкин, В.М.Сиркин, В.Д.Живайкин, Е.Ф.Кидямкин, И.И.Митин, А.В.Наумов и ламотне, ламотне лиятне.

—Минь корхтаманьке, Данил Александрович, моли юбилеень карша.  Юбилярхнень лемс, кода правила, азонкшневихть аньцек шнамань валхт. Но кода улемс, кда юбилярсь газета, кона сонць кельгсы критикать. Пади, теенза стане жа ули польза, кда азсаськ сонь башка афсатыксонзон и, мярьктяма, мезе  учтама эздонза сяда тов?

—Кода корхнихть, афсатыксонза и эльбятьксонза аш аньцек сянь, кие мезевок аф тиенди. Мон «Мокшень правдать» мархта кяденьбецек ёт мяляфтса эсь прязень. Сон тейне ульсь и ляткшни инь кельгома, инь родной газетакс. Соньфтемонза аф арьсефтеви эряфозе. Лажаткшнян и оцю мяльса лувондса тяниень «Мокшень правданьконь». Эздонза фалу мушендан лама интереснай, мялень пети. Кода фалу, мялезон тушенды сонь версткац, шамаликоц. Улихть и мяльне-арьсемане газетати. Пароль сяда лама тяштемс пенсионерхнень, трудонь ветераттнень колга. А синь улихть эрь велеса, эрь ошса. Кода эряйхть, кодама теест отношениясь, кода сиренятнень колга заботендайхть местнай власттне, общественнай организациятне? Арьсян эряволь макссемс сяда лама материалда мокшэрзятнень историяснон, содаф ломаньцнон колга, лацкас азонкшнемс народоньконь коензон, иланзон, юкстаф ремесланзон-тевонзон колга.

Парольхть тернемс инжикс «Мокшень правдав», «Мокша» и «Якстерь тяштеня» журналхнень.

Корхтаманьконь песта Данил Александрович эняльдсь газетать вельде лемстонза седи ваксста поздравляндамс газетань сотрудникнень, аф штатнай активисттнень, сембе лувихнень Од кизоть и газетать малаткшни 100 кизонь юбилеенц мархта и арьсемс кеме шумбраши, паваз, творческяй од сатфкст, пефтома вий и лаказь-лакай эрьгя.

Тяконь арьсеськ и эстеензовок, кельгома ялганьконди, национальнай печатень ветеранти, Данил Александрович Любимкинонди и сонь семьянцты.

И.ЛУШКИН.