Поиск по сайту: 
 

Архив
 январь 
 2021 
пн вт ср чт пт сб вс
    123
45678910
11121314151617
18192021222324
25262728293031

 
 

 

Национальная тематика

Александра КУЛИКОВА: «КАТК ОД КИЗОНЯ СЕМБЕ УЛИХТЬ ШУМБРАТ!»

Эрь кудса, эрь семьяса тяниень пингть сембе вийса мольфтевихть анокламат Од кизоти, илати лядсь аньцек фкя ши. Наряжафт ни кузнятне, повфнефт гирляндатне, аноклафт казнет радня и мала ломаттненди. Сембе учендыхть илать эса од надияма мархта. Од кизонь карша корреспондентоньконди удалась корхнемс Россиянь и Мордовиянь  Народнай артисткать, Мордовия Республикань Почетнай гражданинть Александра Куликовать мархта, кона лама киза ни кеняртьфнесыне ломаттнень седиень токай и ваймонь эжди мороса. Артисткась азондозе, кодамоль теенза 2020 кизось, мезе сон ученды Букань кизоть эзда и кодамот мяленза-арьсеманза малаткшни илать колга.

 

 

—Александра Николаевна, аф лама пингта меле туй историяв 2020 кизось, мезьса мяляфтовсь сон тейть?

 

—Тяддесь стакаль, тя содаф сембонди. Шеернясь хуш звернясь аф оцюня, но эздонза сатовсь ламотненди. «Сускомань» сон моньге. Эряфозонк апак учсек сувась пелькс урма—коронавируссь, кона лаподсь лангозонк оцю сталма лаца. Сон сувафтсь полафткст эряфонь сембе ширетненди. Тейнек, артисттненди, пандемиять сюнеда савсь кадомс одувонди ламоц концертоньконь. Тядде ашельхть ваныть мархта лямбе васедеманьке, кепотьксонди, Святой Тройцянь шиня, кода улендсь тяда ингольдень кизотнень, Саранск ошть шистонза и нльне 9 майста—Победань шиня. Тяда башка, арьсефтольхть выступленият  лия региоттнень эсовок. Тяфта, кафта кизот мельцек Крымса етафневсь финно-угорскяй народонь оцю фестиваль, коса морсекшнень монга. Тядде тертьфолень колмоце фестивальти. Анокламе ни мялень салай концертнай программа, мондедон башка Крыму срхксесть молемс республикань содаф артисттне А.Бочканов, В.Зобков, О.Глебова. Колма концертт арьсекшневсть етафтомс Керчь ошса… Но киньконь перезе пандемиясь.

 

Аф ваномок самоизоляциянь режимть лангс, тевфтома сембе сяка ашень ащекшне. Мекольдень кизотнень варчсесайнень вийнень кода автор-исполнитель, нолдайне ни авторскяй мора мархта дискозень. Тядде сермадомань тевти пингтон ульсь сяда лама. Тяштьфонень еткста башка лятфталине Победать 75 кизонцты лемтьф стихотворениять-посвящениять, кона, койсон, лиссь пяк удалафста, седиень токайкс. Тяда башка, сермадонь «Медицина на передовой» мора. Морось тяниень пингонь, вдь тячи, коронавирусонь пандемиять пингста, медицинскяй работникне урмать каршес тюремаса ащихть васенце вастса. Тейне савсь няемс эсь сельмосон, кодама стакадонга стака врачнень «якстерь зонаса» трудсна. Врачень профессиять мон лувондса Шкайть эзда максфокс. Мзярда арси кальдяв шумбрашиньконь мархта, минь эняльтькшнетяма «Шкабаваз, лезтт!» и эряскоттама докторхненди.

 

Аф аньцек стакатнень-сталмотнень мархта мяляфтовсь 2020 кизось. Аф кржаль тядде мялень кеподи, кеняртьфти событиядовок. Шееронь кизось, кепотьксонди, казсь тейне уноконь идь, теенза аф кунара топодсь колма ковнят.

 

—Кода арьсекшнят васьфтемс Букань кизоть?

 

—Кода аф ужяль, тядде, улема, илать сави васьфтемс ськамон. Стирезе, унокозе эряйхть Москуса, тяда инголе Од кизонди мзярда синь сашенкшнельхть ширезон, а мзярда монць якселень пялост. Тядде коронавирусть сюнеда пуромомс марс аш кода. Тя, конешна, колсесы мялезень, но кяднень старандан аф нолямс. Вдь корхнихть, кода Од кизоть васьфтьсак, стане сонь и етафтсак, сяс эряви арьсемс аньцек цебярень колга. Хуш улян ськамон, юкстафокс тя веня аф лядан. Инголенди содаса, што тейне пяк ламотне гайфтихть, поздравляндасамазь телефононь пачк. Монь лама ялгадон, конат мзярдовок аф юкснихть колган, лезнихть стака пингста, кирнесазь ширезонь творчестваса.

 

—Кузнявок, улема, наряжать ни?

 

—Кода ина. Сон кунара ни мазопнесы кудботмозень.

 

—А кодама кузнятне тейть сяда кельговихть—эрекне или искусственнайхне?

 

—Мон наряжакшнян искусственнай. Эрек шуфтонятне тейне няевихть пяк ужялькс. Ацергоды седиезе, мзярда илада меле няендьсайне шуфтонятнень кархчень мархненди ердафста. Ушеткшнян арьсема, кодама серикс и парганакс касоль тя емла кузнясь, кда сонь афолезь кер, кода кеняртьфнелезень вирень эряйхнень. А тяни сон яфотьф кархчнень ёткс и киндивок аф эряви. Сяс мон кочксеса искусственнайть. Но кузнянь тараткя шуфтонязень алу сембе сяка путнян.

 

—Артисттненди аф шуроста сашендови работакшнемс праздникста. Тейть, Александра Николаевна, сидеста сашендовсь васьфнемс Од кизоть сцена лангса?

 

—Комсь фкие киза мон работань ведущай солисткакс «Умарина» моронь и кштимань государственнай ансамбльса. Ся пингть, аф кода тяни, пяк сидеста улендсть гострольнай поездканьке. И аф фкя-кафта шида меле ни мртцелеме меки, а колмонь-нилень ков эряме вагонца, макссеме концертт, кепотьксонди, Сибирень, Кавказонь ошнень эса. Аф шуроста гастроленьке прашендсть Од кизонди, тяконь лувксса сашендовсь выступандакшнемс Од кизонь венявок. Шарьхкотьф, кажнайть тя иланя мялецоль улемс семьянц, радня и мала ломанензон мархта, но мезе тият, тя минь работаньке. Штоба кеподемс морси ялганень мяльснон, мон, кода профкомонь председатель, най арьсекшнень кодама-кодама налхксемат, викторинат. Етафнелеме шахматнай турнирхт, од кизонь конкурст, кепотьксонди, кинь кудоц сяда лац мазоптф илати и стак тов.

 

Тяни хуш кувака гастрольс аф тушендан, но сидеста уленди стане, што Од кизоня куду кенерькшнян пачкодемс аньцек куранттнень шавомаснонды, вдь иляденьберьф минь макссетяма концертт ошень разнай площадкатнень лангса. Сюкпря семьязти, мес фалу малаткшнесь тянди шарьхкодема мархта. Саян, а шра лангса сембось анок ни.

 

—Од кизоня ладяф казендемс фкя-фкянди казнет. Тейть мезсь сяда кельгови—  казендемс и получсемс казнет?

 

—Конашкава пара ваймозон, мзярда монць казендян казнет. Сядонга пяк, кда няйса, што казьфозе кеняртьфтезе ломанть. Но тя аф корхтай сянь колга, што аф кельгса, мзярда казнетне казевихть эстейне.

 

—Кодамокс мяляфтовсь Од кизось идькс пингстот?

 

—Эряфсь эста аф теждяль, мольсть войнада мельдень кизотне. Но, аф ваномок тянь лангс, илать васьфнеськ най. Шраньке катк аф тячикс козятольхть, ашельхть, кода тяни, омба масторонь фруктат-месть, сянкса аноклафтольхть эсь кядьса пидеф танцти ярхцамбяльхть. Тячемс мяляфтовихть тейне тядязень пельмененза, сон, улема, тиендезень-пицезень синь кодама-бди эсь лацонь рецептс коре, сяшкава танцтихтельхть. Мяляфтови, кода васенцеда повонь Од кизонь илас велень школазонк, эста тейне ульсь котошка киза. Коридорса стяфтфоль сери кузня, а мазоптфоль сон кагодста тиф гирляндаса, фонарикса, конатнень тиенделезь синць тонафнихне. Мяляфтса, кода стихотворениянь азоманкса Ловонь стирнясь казсь тейне курмозь конфета. Тя ульсь тяшка кенярдемакс!

 

—Александра Николаевна, мезе арьселеть лувиеньконди, республикань сембе эряйхненди илань карша?

 

—Васендакиге, сембонди арьсян кемодонга кеме шумбраши. Катк сяда куроконе туй эряфстонк коронавируссь, а мархтонза и сембе стакатне-сталмотне. Арьсян ломаненьконди цебярьс надияма, ваймонь сетьмоши. Катк Од кизоня сембе улихть павазуфт!

 

—Сюкпря, Александра Николаевна! Шумбраши тейть, од сатфкст кода творчестваса, стане и эряфса!

 

О.ЕВДОКИМОВА.

 


11.01.2021 №
 
 
 

 
НОВОСТИ
 
 
 
 

РОССИЙСКЯЙ ПЕЧАТЕНЬ ШИТЬ МАРХТА!

Мордовиянь массовай информациянь средствань кельгома работникт! Кельгома ветератт! Седи ваксста поздравляндатядязь тинь профессиональнай праздниконтень—Российскяй печатень шить мархта!

 

Тя шись пуропнесыне марс разнай профессиянь ломаттнень: журналисттнень, редакторхнень, издательхнень, полиграфисттнень, почтань работникнень, печатнай продукциянь  каннихнень—сембонь сятнень, кие эрь шинь трудса тиендьсы минь республиканьконь и сембе странать фкя информационнай пространстванц.

 

Ламошкада тинь работантень вельде Мордовия Республикась тячи—тя стабильнай регион, коса фкя-фкянь мархта ладязь эряйхть лама национальностень и конфессиянь представительхне, лац решандакшневихть экономическяй и социальнай прябалатне, пяшкотькшневихть виияфтомань федеральнай и региональнай программатне. Минь опытоньконь колга эрь шиня корхнихть общероссийскяй уровеньца, тянь мархта ладямок Мордовиять цебярь имидженц кода вииямань оцю потенциал мархта перспективнай территориянь.

 

Инголе минь лама марстонь работадонк промышленностьса, аграрнай секторса, социальнай сфераса. Минь карматама тиендема семботь од производствань и рабочай вастонь тиеманкса, финансовай системать одкстоптоманкса, асу од ломаттнень, конат каннихть польза ёмла родинати, ширеснон кирдеманкса. Тяса пяк важнай сембе ширде ваномась и курокста тевонь тиемась, виде оценкань максомась и региональнай СМИ-тнень позицияснон принципиальностьсна, крхкаста и сембе ширде мольфтеви процессненди и событиятненди сувамась. Надиян марстонь цебярь работать лангс, кона кармай лездома минь родной Мордовияньконь виияфтомаса.

 

 Благодарностень инь лямбе валхт азомат печатень ветераттненди. Информациянь максомань курокстонь пингсь, информациянь пачфтемань каналхне тячиень шить пяк полафтсть и стаки полафнихть сяда тов. Но сякокс отрасляса работань фундаментокс лядондыхть мархтонт ладяф профессионализмань койхне, аф озадонь седихть ащемась, тяштемаса маштомошинте! Арьсян теенть, тинь мала ломанентенди шумбраши, творческяй од сатфкст, благополучия и панчфокс панжема. Российскяй печатень шить мархта!

 

Мордовия Республикань

 

Оцюнять аф лама

 

пингс тевонзон

 

тиендисна А.А.Здунов.

 

15.01.2021  № 1
 
 
 
 

Газетать киц

Кельгома ялгат! Кода ни пачфнеськ, сай кизонь 24 сентябрьста топоди 100 киза ёт Родинаньконь столицаса—Москуса лиссь мокшэрзянь «Якстере теште»  газетать васенце номероц. Тя шись и арась шачема шикс мордовскяй национальнай печатти. Сон ульсь афкукс центральнай газетакс сембе мокшетненди и эрзятненди. Сонь сёрматфнезь-мишендезь Пензенскяй, Тамбовскяй, Самарскяй, Симбирскяй, Саратовскяй, Нижегородскяй и лия губерниятнень эса.
«Якстере тештесь», кона лисендсь мокшень и эрзянь кяльса, тернезень лувихнень кирдемс кеме соткст редакциять мархта, пачфнемс мордовскяй народть тевонзон, арьсеманзон и пичефксонзон колга. Лувихне няйсть эздонза ялга, советонь, содамошинь максси. Сон лезнесь теест тиемс письменностьснон, литератураснон, касфнезе национальнай самосознанияснон.
Честь мархта сяда тов мольфтезе тя тевть «Од веле» газетась, кона  кармась лисендема мокшень кяльса 1924 кизоста сявомок Пензаса. Сон лама тись мокшень кяльть грамматическяй норманзон ладямаса, мордовскяй литературать и искусствать виияфтомаса.
«Од велеть», а сяльде «Мокшень правдать» ламоц воспитанниконза кассть оцю квалификациянь журналистокс и цебярь редакторкс.
Юбилеень карша аш кода аф лятфтамс пара валса газетать редакторонзон, конат кизоста кизос мольфтезь национальнай изданиять тевонц, теенза макссезь сембе эсь содамошиснон, асуснон и седиень псиснон. Нят П.С.Глухов, И.И.Московкин, И.В.Шотин, Л.Е.Бажанов, С.Б.Леонтьев, Н.С.Шестов, Г.А.Игнатьев, П.К.Ежов, П.В.Шавензов, А.Д.Горькин, Ф.С.Руськин, В.М.Сурков, Н.И.Учватов, П.П.Кулешов. Ужяленди, конацка эздост аш ни шиса. Сяс тячи макстама аньцек лятфнемат.
Лятфнихть ингольдень редакторхне
П.Глухов, «Якстере теште» газетать редактороц
«Апак ватт оцю сталмотнень лангс, 1921 кизонь 24 сентябрьста Москуса лиссь «Якстере теште» газетать васенце номероц. Тя ульсь РКП(б)-нь ЦК-ть мордовскяй секциянц органоц. Васенце редакторкс кемокстафоль М.М.Евсеев. Газетать нолямаса активнай участия примсесть Е.С.Окин и Ф.И.Завалишин.
Газетать эрь номеронц оцю мяльса васьфнезь кода эрзянь, стане и мокшень лувихне, и активнайста лездсть теенза.
1925 кизоня, мзярда улень редакторкс ни мон, газетаса оцю мяль шарфневсь литературнай виень пуроптомати. Тейнек васенце произведенияснон тяштезь Ф.Чесноков, И.Кривошеев, Я.Григошин и лиятне. Оцю лезкс макссесь Ф.Завалишин, кона эста работась «Беднота» газетаса.
Мокшэрзянь васенце газетать заслуганза пяк оцюфт. Сонь традициянза, козя опытоц тячемс лезнихть национальнай печатть виияфтоманцты».
И.Шотин, «Од веле» газетать редактороц
«Од веле» газетась ульсь РКП(б)-нь Пензенскяй губкомть и губисполкомть органцна. Сон ушедсь лисендема 1924 кизонь 5 майста. Васенце номерхнень редактировандазень партиянь губкомть мордовскяй секциянц секретарец И.И.Московкин, а сяльде редакторкс путфолень мон. Пяк лездсь газетати асу литературнай редакторсь И.Г.Черапкин, кона тиендезе тя важнай и почётнай тевть куломозонза.
Ся кизотнень Пензав работама кучфтольхть Шишканов, Кузькин, Петербургский и  лия ялгатне, кармасть сашендома тонафнема мокшень  цёрат и стирьхть. Газетать перьф пуроптфтольхть местнай мокшень ломатть. Материалхт ушедсть сашендома губерниять, а стане жа Советскяй Союзть сембе вастонзон эзда, коса эрясть мокшет. Велень    корреспонденттне пачфнесть, кода молихть занятиятне школаса,  лац-аф работайхть изба-читальнятне.
«Од велесь» мольфтсь народть ёткса воспитательнай оцю работа, лездсь касомс мокшень асу ломаттненди—композиторхненди, писательхненди, конатнень моросна, стихсна и рассказсна печатлакшневсть газетать страницанзон эса».
Н.Шестов, «Мокшень правдать» редактороц
«Мокшень правдаса» редакторкс кармань работама 1934 кизоня. Ся кизоня Мордовскяй автономнай областсь тифоль автономнай республикакс. Мокшэрзятненди тя ульсь пефтома кенярдемакс.
Пароль сявок, што колхозс пуроптфтольхть крестьянскяй хозяйстватнень 65 процентсна, тифоль 27 МТС и 45 совхоз. Оцю населениять грамотностец пачфтьфоль 90 процентти, аноклафоль всеобщай начальнай образованияти ётамась.
Шарьхкодеви, што сембе ня кизефкснень вакска ашезь ётне  и «Мокшень правдась». Но сембода оцю мяль шарфнеме мокшень велеть культуранц кеподеманцты. Клупнень, изба-читальнятнень, медпункттнень, школатнень работаснон колга корреспонденцият можналь няемс газетать эрь номерсонза».
10.12.2020  № 48
 

«Бизнес-сообществать мархта васедематне кармайхть ётафневома сидеста»

7 декабрьста Мордовия Республикань Оцюнять аф лама пингс тевонзон тиендисна Артём Здунов васетькшнесь предпринимательскяй сферань представительхнень мархта. Корхтамась мольфтевсь ся кизефкснень коряс, конат пичефтьсазь бизнес-сообществать. Предпринимательхне азондозь Мордовиянь вятити прябалатнень, конат эвондакшнихть эпидемическяй условиятнень пингста работамста. Кой-кона кизефксне кармайхть ванондовома коронавируснай инфекциять келемоманц инголдаманц коряс оперативнай штабть маластонь заседаниясонза.
Артём Здунов китькстазе, што тяфтама васедематне кармайхть ётафневома сидеста, а тячиень повесткась аноклафоль синцень участникнень мархта. Лама корхтафоль тяниень пингонь противоэпидемическяй ограничениянь условиятнень пингста предпринимательхнень работаснон колга.
«Талина» компаниянь группать президентоц, промышленниконь и предпринимателень Российскяй союзонь региональнай отделениять и работодателень Мордовскяй объединениять председателец Виктор Бирюков азозень эсь мялензон-арьсеманзон общественнай объединениятнень рольснон касфтомаснон коряс, конат няфнесазь министерстватнень и ведомстватнень видеса бизнес-сообществать интересонзон.
«Ламоц кизефкснень ули кода решандамс ведомственнай уровеньца, кда тя аф лисенди, эста—системась аф работай»,—китькстазе Артём Здунов.
Стане жа примаф предложения аноклакшнемс региональнай бизнес-сообществань представительхнень рейтингснон. Рейтингть тиемста мяльс сявови предприятияса пандови заработнай платась, вииякшнеманкса нолдаф инвестициятне и налоговай пандоматне. «Тейнек эряви содамс, кие канды ярмакт республикав, а кие Мордовияста лихнесыне синь. Кие панды цебярь зарплата, а кие аф. Тя кармай честнайста»,—мярьгсь региононь вятись.
Тяда башка, васедемаса корхтафоль сянь колга, кода кармай работама Од кизонь илатнень пингста питаниянь сферась. Стане жа корхтамась мольфтевсь Роспотребнадзорть и лия контрольно-надзорнай ведомстватнень мархта марстонь работать, илань карша ваймама шинь ярмаркатнень ётафтомаснон колга.
10.12.2020  № 48
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин