А.РОДИОНОВА: «КЯЛЕНЬ СОДАМАСЬ КОЗЯКОФТСЫ ЛОМАНТЬ ВАЙМОНЦ»

Газетаньконь тячиень номерсонза мяленьке содафтомс лувиеньконь асу стирть Александра Родионовать мархта. Сон тонафни Н.П.Огарёвонь лемса Мордовскяй госуниверситетонь филологическяй факультетса «Педагогическое образование» направлениять коряс. Крхкаста тонафнесыне мокшень и рузонь кяльхнень. Мялец арамс учителькс.

—Тейне 18 киза. Шачень-касонь Саранскяйса. Школаса тонафнемстон арьсекшнень лама профессиянь колга, но сембода пяк салазе мялезень педагогонь тевсь. Пичедень, видеста-аф кочкайне кизень. Филологическяй факультетса содамошинь пуроптомась пяк мялезон. Минь тонафнесаськ мокшень и эрзянь кяльхнень, сяда тов карматама тонафнемост финскяйть и сербскяйть. Кялень содамась козякофтсы ломанть ваймонц.

—Александра, тон лац корхтат мокшекс. Кода ошса эрязь тонадыть кяльть?

—Сюконян шнаманкса, но штоба лац содамс кяльть эряви нинге путомс лама вий. Тя тевса тейне лездыхть университетонь преподавательхне. Койсон, кялень содамать юронза сявовихть семьяста, а нинге велеса эряй бабатнень-атятнень эзда. Идькс пингстон мон сидеста улендень Атяшевскяй райононь Тарасово велеса. Тостонне тядязе, сон эрзява. Сяс эрзянь кяльса корхтан сяда тёждяста. А алязе мокша, сон шачсь Рузаевскяй райононь Палаевка велеса. Кудса минь корхтатама и мокшекс, и эрзякс, и рузкс.

—Александра, тонь аляце, Василий Сергеевич Родионов, содаф мокшень музыкант, цебярь баянист. Улема, тонга асуват музыкань ширде. Аф кунара кулине «Пиземня» мокшень мороть, конань тон мазыста морайть. Сон педи седис, токай вайме.

—Сюкпря пара валонкса. Тя мороть мон васенцеда морайне, мзярда тейне ульсь 13 киза. Валхне—Р.К.Орловать, а музыкась—В.С.Родионовонь. А морсема ушедонь нинге идень садику якамстон. Ошса тяни аф лама шабада, конат содасазь мокшень и эрзянь кяльхнень, сяс мон фалу вешфолень. (Пееди). Примсень участия эрь кодама мероприятияса, морсень мокшень и эрзянь морот. А школаса сувсень «Калинка» идень фольклорнай ансамбльти. Музыкальнай школа ашень адела, монць тонафнян гитараса морама. Тя ушедсь эста, мзярда алязе шачема шизон казсь гитара. Тянивок,  вузса тонафнемста, мон аф кадондса выступандамань тевть. Аф кунара университетса васенце курсонь студенттнень ёткса ётась «Звездопад» пялькстомась. «Народный вокал» номинацияса мон сатыне 3 вастть.

—Азонтт, пожалуйста, мезсь тяниень пингонь од ломаттнень салсесыне мяльснон?

—Тяни лама эрь кодама тевда, конатненди кярьмотькшнихть од ломаттне. Васендакиге, койсон, тя спортсь. Кепотьксонди, мон аф кельгса стак ащекшнемазень. Омбоце класста сявомок якан волейбольнай секцияс. Мон сувань университетонь командати. Тяда башка, тяни ламоц студенттне занцихть пря волонтерстваса. Лиятненди лездомась—тя пара тев, сон петьсы седить, максы кенярдема. Примсень участия «Версия» волонтерскяй проектса. Минь лезнеме культурань куттненди ётафнемс эрь кодама мероприятият. Улень волонтеркс Саранскяйса футболть коряс Миронь чемпионатть ётафтомста.

Од ломаттненди аш кода кядьтевфтома. Койсон, тянь лангс мзярдовок аф етай модась. Конашкава пара, мзярда эсь кядьса тифть мархта ули кода кеняртьфтемс-дивандафтомс лиятнень. Мон тиендян заказс коре панчфста и ярхцамбяльста казнет. Тяни ламонцнень мяльсна поздравляндамс мала ломаньцнон кода-бди эсь лацоннекс. Панчфнень и конфетатнень мархта кинге аф дивандафтат, тя няеви мялень мольфти казнекс. А вов кда танцтинять и эрек панчфнень марса путомс-латцемс илань куймоняс, тя няеви ёфси лиякс. Васенце куймонять-казнеть тиине 2 кизода инголе, мялезель кеняртьфтемс тядязень шачема шистонза. Тя тевсь пяк салазе мялезень, ушедонь кочксема илань куймонят заказс коре.

—Александра, сюкпря корхнеманкса. Арьсян тейть оцю сатфкст кода тонафнемаса, стане и сембе пара тефнень эса.

Т.ПЕТРОВА.