ВИИ ЖУРНАЛИСТ И РЕДАКТОР

 «Мокшень правдать» ингольдень главнай редакторонц В.М.Сурковонь лятфнеманза

 

Лиссь стане, што эряфозень пцтай пяленц максыне, кода кой-кит лемнесазь «Мокшень правда» щакати. Эсь сельмосон няине сонь и цебярь ширензон, эсь лафтусон варчсине сталмотненьге. Улень пцтай сембе иланзон эса. А иладонза, эряви азомс, лиятнень коряс аф сяда кржаль.

 

Тевсь вов мезьса: васенда газетати шачема шикс лувондовсь 1924 кизонь 5 майсь. Ся пингста, мзярда Пензаса ушедсь лисендема «Од веле» лемса мокшень васенце газетась. Тянь лангс ванозь ётафневсть илатневок. Васенцесь, улема, ётась 1934 кизоня. Содавсь тя сянь коряс, што эста «Мокшень правдась» казьфоль Мордовскяй АССР-нь Верховнай Советть Президиумонц Почётнай грамотаса («Од велесь» «Мокшень правдакс» арась 1932 кизоня).

 

Сяда келиста ётась газетати 25 кизонь топодемась. Тя ульсь 1949 кизонь майста. Лац мяляфтса ся пингть васендакиге сяс, мес эста монцьке работань ни редакцияса. Ся пинкнень периодическяй печатьса эвондасть цебярь полафткст: кассь газетатнень форматсна и периодичностьсна. «Мокшень правдатьке» кафтонь-крда кассь объёмоц, сон кармась лисендема недяляти ветексть.

 

Редакцияв работама састь од вийхть, васендакиге фронтовикнень эзда, ётксост Андрей Петрович Майоров, Герасим Андреевич Игнатьев, Илья Максимович Девин, Илья Прокофьевич Кишняков, Михаил Андреевич Кяшкин, Иван Филиппович Чумаков, Василий Никанорович Радин, Михаил Лукьянович Сайгин, Сергей Степанович Ларионов, Георгий Абрамович Пьянзин. Эздост ламотненди газетаса работамань опытсь кондястсь арамс оцю писателькс.

 

…1950 кизось   «Мокшень правдати» стакаль. Сонь нинге васенце пялестонза сась Москуста ЦК-нь ответственнай работник. Тянемс мяляфтса фамилиянцка—Сайранов. Кафонест—сон и обкомть идеологиянь секретарец—васетькшнесть рузонь, мокшень и эрзянь журналисттнень мархта. Азозь эсь мяльснон: кле, «Мокшень правда» и «Эрзянь коммуна» газетатнень лувондыдост кржа. Улема, сяс, мес ёмла форматсна, аф  кенерькшнихть событиятнень мельге, ёмлат эсост печатлави материалхнень идейнай уровеньцна. Сяс лихневи предложения: колма редакциятнень эзда тиемс фкя, марстонь вийса нолямс фкя цебярь газета, валда-валс ётафнемс сонь мокшень и эрзянь кяльхненди. Кизефтемазь: кода ваттама тянь лангс.

 

Хуш эста и пельксоль панжада молемс вяре ащихнень каршес, тя ушетксть шназь аф сембе. Максфоль кизефкс, васендакиге Сайрановонди.

 

—Коса нинге, Мордовияда башка, шовордавихть республиканскяй газетатне.

 

—Мзярс аньцек Мордовияса. Лия вастова ашесть кенере нинге условиятне. Тинь опытонте кондясти лиятнендинге.

 

Пингонь ётазь примафоль решения республиканскяй «Красная Мордовия», «Мокшень правда» и «Эрзянь коммуна» газетатнень эзда тиемс марстонь «Советская Мордовия», кона кармай лисендема колма кяльса.

 

Рузонь изданияса ингольцекс ульсть отделхт, собкорхт, спецкорхт, национальнайхнень эса—аньцек переводчикт. Васенда переводчикненди пандомась афоль сатне киндивок. Сяс мокшень и эрзянь журналисттне сраткшнесть кие-коза. Сашендовсь вастозост примсемс тевонь аф содай ломатть. Недяля кафта работайхть, и, ванат, кандыхть заявления: «нолдамасть, кле, пульзяфтомасть редакциясонт…» Нагрузкась, афкукс, сембонди пяк оцюволь. Газетатне лисендсть аньцек омбоце шиня шобдава, и сияк тага тефт—эряви анокламс сай номерть.

 

Няевсь, што газетатнень шовордамаснон мархта нолдаф эльбятькс. Эрявсь сонь петемс.

 

Кинди эрявсть эряскодозь аноклаф, тапаряф кяльса сёрматф газетатне, конат пачкотькшнесть лувити 2-3 шида меле, а кой-коста сядонга поздна?

 

Стясь кизефкссь, штоба национальнай газетатнень меки тиемс самостоятельнайкс. Арьсефоль тянь тиемс 1957 кизоста сявомок. Мокшень газетась ванфтозе ингольдень лемонц—«Мокшень правда».

 

Аф лама кизонь ётазь арань «Мокшень правдаса» творческяй коллективонь вятикс.

 

Редакторкс улень ламос. Афи азондови, мзяра тя пингть шудесь ляйда-шудерькста, мзяра торась атямда, ётась вишке даволда. … тянь азондсазь лиятне. Мон жа лоткан аньцек кой-кона сяда оржа эпизоттнень лангс.

 

«Мокшень правдаса» и «Эрзянь правдаса» ашель фкявок автомашина, а «Советскяй Мордовияса» эздост кафтоль.

 

Тянь колга аф весть корхнефоль республиканскяй организациятнень эса, пачкотькшнень КПСС-нь обкомть васенце секретаренцты Осипов ялгативок теенза тяда инголе кучф письменнай кагодта меле. Валса эняльксоньконь лувондозе видекс, тевса мезевок ашезь полафне.

 

Савсь кучемс казяма сёрма КПСС-нь ЦК-ть секретаренц лемс. Аньцек эста национальнай редакциятненди мувсь тифтень автомобиль, нолдафтольхть ярмакт печатлама машинкань, мебелень, радиоприемниконь рамамс.

 

…1963 кизоня тага кеподсь кизефкс национальнай республикатнень эса газетань редакциятнень шовордамаснон колга. Мярьгондевсь теест азоркс путомс стама главнай редактор, кона цебярьста содасыне аф аньцек рузонь, а национальнай кяльхнень. Ушетксонь тиикс тя мезть кочказь Татариять. Тоса главнай редакторкс путфоль «Социалистик Татарстан»—национальнай газетать редактороц. Вов ни шнасть тя ушетксть эса!

 

Сась, кода корхнихть, рядсь и тейнек. Эрявсь, штоба согласиндальхть васендакиге синць редакциятне. «Советскяй Мордовиясь» ушетксть шназе. «Эрзянь правдась»—аф сей, аф тов. Кармасть корхнема монь мархтон:

 

—Месть кашанкшнят, вдь пара тевсь…

 

—Тя пароть таньфонц минь ни варчсеськ. Ашезь лисе эста, аф лиси тянивок.

 

Кода аньцек ашесть апряка эсон: и националист, и оппозиционист, и идеяфтома деляга, кона аф шарьхкодьсы партиять Программанц, Уставонц и марнек политиканц. Аш мезенксовок муворгофнематне сязезь тяфтаконга лафча шумбрашизень. Пчкафтыхне мярьгсть мадомс стационару, мяляфтса, палатав мархтон корхнема сувась обкомста пропагандань отделть вятиец. Тяфта и тяфта, кле: кизефкссь решандаф стане, кода арьсефоль. Главнай редакторсь мярьгонди улемс теенза заместителькс.

 

Азыне: аф заместителькс, аф мезькска лиякс марстонь редакцияв аф молян. Муда лия ломань.

 

Конфликтсь пачкодсь партиянь Центральнай Комитету. Примафоль виде решения: сяс мес Мордовияса редакциятне шоворявсть ни, и тя шовордамась цебярь ширде прянц ашезе няфте, кадомс тостонь газетатнень стане, кода ульсть.

 

Лия республикатнень эсовок шоворьф редакциятне курок тапарясть. Сембе сяда кайгиста кулендевсть вайгяльхть, штоба лоткафтомс ковга аф кондясти практикать.

 

…1971 кизось. Журналисттнень ёткса срадсь куля: «Эрзянь правдась» аноклай пяле веконь юбилеенцты. Шачема шинц лувондсы 1921 кизонь сентябрьста «Якстере теште» газетать эзда. Молень обкому, кизефнеса:

 

—Ну кулятне видет?

 

—Да, видет. Вагот аноклаф кагодсновок.

 

—Но вдь «Якстере тештесь» ульсь марстоннекс—и эрзятненди, и мокшетненди. Сяс тя юбилейсь кафцьке национальнай газетатнень.

 

—Ня валхне эрявихть кемокстамс…

 

Штоба кемокстамс, лама пинге ашезь эряв. Мувсть «Якстере тештеть» васенце номеронза. Эсост азфоль, што газетась ноляви Москуса сембе странань мордовскяй населенияти. Материалхнень пяледа ламосна печатлакшневсть эрзякс, сяда кржатне—мокшекс—(улема, редакциянь работникнень эзда сяда ламось эрзятольхть).

 

Партиянь Центральнай Комитетса консультацияда меле мярькфоль кафцьке национальнай газетатнень юбилейснон ётафтомс марса: 24 сентябрьста. Илась ётась келиста. Юбилярхне казьфтольхть «Знак Почета» орденца. Государственнай казнет получасть ламоц журналисттне, активсь.

 

Торжественнай заседанияс терневсть «Якстере тештеть», «Од велеть», «Мокшень правдать» ингольдень сотрудниксна, васендакиге радакторхне. Ётксост И.В.Шотин, Н.С.Шестов, Н.Е.Бажанов, С.В.Леонтьев, И.М.Кшнякин, А.Д.Горькин, П.К.Ежов, Ф.С.Руськин, Н.В.Шавензов. Сашендыхнень эзда сембе казьфтольхть Почётнай грамотаса, питни сувенирса.