Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

СЛУЖАСЬ МОКШЕНЬ ЖУРНАЛИСТИКАТИ

И.А.Шукшинонди—65

 

Мелянь 23 ноябрьста топодель 65 киза ялганьконди, мокшень содаф журналистти и идень писательти И.А.Шукшинонди. Сон эрясь сембоц 51 киза. Синь эздост пцтай колмогемонть максозе «Мокшень правдати», коса работась сёрмань отделса корреспондентокс. Теенза лездыкс и тонафтыкс ульсть Н.И.Учватов, П.П.Кулешов, И.С.Лушкин, Д.А. Любимкин и лиятне. Пингонь ётазь Иван Афанасьевич кармась трудендама литературань и искусствань отделса содаф писательть М.С.Моисеевонь мархта. Мзярда Михаил Степанович тусь пенсияс, отделонь вятикс кармась И.А.Шукшин.

 

Тевоц пяк ответственнаель, вешсь кядьстонза козя опыт, маштомоши. Кода отделонь вятиенди, Иван Афанасьевиченди сувсесть содаф писательхть, художникт, композиторхт, артистт. Синь мархтост эрявсь корхнемс, кулхцондомс мяльсна-арьсемасна, мумс марстонь кяль, содамс, мезе и кода сёрмадомс колгаст. И Иван Афанасьевич эсь тевонц тиендезе аф лияда кальдявста. Тяшнесь очеркт, зарисовкат, ванондозень редакцияв кучф, кантф сёрматфснон. Сяка пингть, сонцьке тяшнесь азкст иттненди, пеетькст и стихт оцю лувихненди. Синь печатлакшневсть «Мокша» журналса, «Мокшень правда» газетаса. Мордовскяй книжнай издательстваса лиссь «Ше-еронь оцязор» лем ала ит-тненди азксонь книганяц. Сонь пяк лац васьфтезь ёмла лувихне, мокшень кялень кельгихне, тядянь-алянь кяльса сёрмады ломаттне. И.А.Шукшинонь азксонзонды оцю питне макссь содаф писательсь, редакторсь Г.И.Пинясов. Сонь рецензиянц лемоцоль «Эвондась «Шееронь оцязор» и печатлафоль «Мокша» журналть 1998 кизонь 3№-са. Ашезь ёта журналист ялганьконь книганц вакска и «Мокшень правдась». Лиссть мянь кафта шнамань материалхт. Фкять автороц Н.И.Зотова. Сонь лемоцоль «Ваймонь идихть». Омбоцеть сёрмадозе Атерень врачсь В.М.Сиркин. Лемдезе «Мялень пети книганя». Приметазь од писательть и литературнай критикне. Содаф учёнайсь, вузонь профессорсь М.Г.Имяреков тонафнемань пособиясонза «Мокшэрзянь идень литературась», кона нолдафоль 2003 кизоня «Красный Октябрь» типографияса, Иван Афанасьевичень книганцты и сембе творчестванцты шарфтсь башка мяль. Сон сёрмадсь, што касы од писатель и сон нинге няфтьсы эсь прянц, нолдай аф фкя удалаф книга, кеняртьфтьсыне лувиензон. Пади, тяфта и улель, кда апак учсек куломац.

 

Лац мяляфтса, кода книгань лисемдонза меле сашендсь Атерень району лувиензон мархта васетькшнема. Мархтонза улеме районнай библиотекаса, Атерь велень 1№, 2№ средняй общеобразовательнай школатнень эса. Якаме Од Кярьгав, родной школазонза. Эста книганянц ламотне ни кенерсть морафтомс. Сяс авторть васьфнезь пяк лямбоста. Кизефнезь и творческяй планонзон колга. Сон отвечась, што работай омбоце книганянц лангса. Кодама сон лиси, няфтьсы пингсь.

 

И виде. Ламоц стихонза, ёфксонза, азксонза лисендсть «Мокша» и «Якстерь тяштеня» журналхнень эса, «Мокшень правдаса», но конат ашесть лисенде башка книганяса.

 

Штоба сяда лама содамс ломанть колга, эряви молемс сонь шачема велезонза, васьфтемс раднянзон и земляконзон мархта. Шачема-касома велекс И.А.Шукшинонди ульсь Шяйгужесь. Мзярда-бди сон ульсь оцюкс. Эсонза лама эряйдоль. Тяни сон юмси-арси. Тонафнесь Од Кярьгань школаса. Средняй образования получась Стрельникова велеса. Покодсь «Красное знамя» совхозса. Служась армияса. Аделазе Н.П.Огарёвонь лемса Мордовскяй госуниверситетонь филологическяй факультетонь мокшэрзянь отделениять. Эсь кельгома веленц ашезе юксне мзярдовок.

 

—Пяк ужяль ялгазе,—мярьгсь Шяйгужень эряйсь В.И.Путяйкин.—14 киза ни аш мархтонк. Марса тонафнеме школаса, налхксеме. Ульсь и свадьбасон. Мзярда работась «Мокшень правдаса», сашендсь вели. Лезнесь родителензонды. Вестевок ашезь ётне кудозень вакска. Толкавась сембонь, кода эряй веленьке, кодама прябалат улихть. И аф пелезь сёрмадсь пичефксоньконь колга газетав.

 

Родителенза, Афанасий Михайлович и Прасковья Михайловна, мокшень простой ломаттельхть. Аляц ётазе войнать. Войнада меле трудендась «Красное знамя» совхозса трактористокс, электрикокс, мотористокс. Тядяцка трудендась совхозса. Марса эрясть 60-да лама киза. Касфтсть 7 итть. Сембонди макссть цебярь воспитания, образования. Ужяль, аф кунара тусь эряфста Темникавса эряй цёрасна, Михаил Афанасьевич. Сон работась мастеркс-преподавателькс Темникавонь ГПТУ-са. «Мокшень правдаса» работамста Иван Афанасьевич сидеста якась Темникаву командировкас. Лотксесь брадонц шири. Михаил Афанасьевич и рьвац, Ирина Григорьевна, пяк кельгозь радняснон. Шяйгужеса эряй сазороц, Анна Афанасьевна. Сонь ширезонзовок сидеста сашендоль Иван Афанасьевич. Ванфтовсь и родителень кудсна, коса журналистсь и писательсь кассь. Сон ащи брадснон, Пётр Афанасьевичень, мельге. Хуш и эряй Москуса, но сашенды сидеста.

 

И.А.Шукшинонь семьяц эряй Саранскяйса. Рьвац, Лидия Ивановна, лама киза покодсь кабельнай заводса. Тяни трудендай санитаркакс ошень 4№ больницяса. Цёрац, Константин, индивидуальнай предприниматель. Сонцень семьяц, касы цёраняц. Стирец, Нина, работай идень садса, вяти музыкань занятият шабатнень мархта.

 

И.А.Шукшинонь аф юкснесазь шачема велесонза, школаса. Эрь кизоня Оцяду велень основной общеобразовательнай школаса лемозонза ётафневихть илат, коза терневихть раднянза, велеряенза. Иттне лувондсазь азксонзон, стихонзон. Раднянза лятфнесазь, кодама цебярь ломанькс сон ульсь, кода маштсь сонць азондома и лиянь кулхцондома.

 

Сон кулось 2006 кизонь 7 ноябрьста. Кемнилие киза ни аш мархтонк. И сембе тя пингть И.А.Шукшинонь лемс ётафневихть илат. Эрь кизоня сонь стихонза кайгихть Малькинскяй лувоматнень эса. Ётафневихть литературнай илат велень библиотекатнень эса. Аноклакшневихть выставкат. Аф кржа вий лятфнемань илань ётафнемаса путни Оцядувонь школась.

 

—Сембе семьяньконь лемста азан оцю спасиба ся ломаттненди, конат лямбе валса кунцесазь Иван Афанасьевичень лемонц, аноклакшнихть и ётафнихть лемозонза лятфнемань илат,—мярьгсь А.А.Шукшина.—Эрь ломанць эряй снярс, мзярс сонь мяляфтсазь. Пара мялезонк, мзярда «Мокшень правдаса» макссесазь стихонзон, азксонзон, тяшнихть колганза.

 

Илья ВЕШКИН,

 

Россиянь Писателень союзонь член.

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022