ВОВ ТЯФТАМОТ МИНЬ МОКШЕНЬ СТИРЕНЬКЕ!

 «Сельмонянза сонь бта тяштть палыхть, щёканянза шобдавань зарякс крфайхть, трванза, мярьгат, инезихть. Ронгоняц—виде акша келуня». Вов тяфта Ф.С.Атянин «Сельмоведь-богатырь» ёфксса морокс моразе мокшень од стирть мазышинц.

Газетаньконь тячиень номерсонза содафтсаськ лувиеньконь асу студенткать Наталья Вирясовать мархта. Сон хуш аф ёфксонь героиня, но Атянинонь Марунянц эзда мезьсовок аф лядонды. Шачемас коре Наталья Зубово-Полянскяй райононь Од Потьма велеста. Тядянза-алянза трудонь кельги, пара вайме ломатть, конат кородозь  ванфнесазь сембе минценнеть. Шабаснон тонафтозь эсь народонь коень-обуцянь содама, родной кяльса корхтама.

Школать героиняньке аделазе зрнянь медальса. Кельгома предметонза  мокшень и рузонь кяльхне и  литературась. Стирсь пичедсь, мзярда школаса тонафнемстонза кирьфтазь лувксснон мокшень кялень и литературань урокнень. Мокшень кялень тонафтыть Е.И.Царакаевать уроконза кадсть аф аньцек цебярь лятфнемат Натальять мялямсонза, но и няфтезь кить сай пингонь профессиянцты. Ниньге идькс пингста, ваномок кельгома педагогонзон лангс, Натальять эвондась мялец арамс учителькс. И курок сонь мяленза-арьсеманза пяшкодевсть эряфс. Стирсь поступась тонафнема Н.П.Огарёвонь лемса Мордовскяй госуниверситету, филологическяй факультету. Пуропни содамошит «Педагогическое образование» направлениять коряс, крхкаста тонафнесыне мокшень и рузонь кяльхнень.

 Наталья, кода афкуксонь мокшень стирь, сафтсы сембоса. Алянц, Анатолий Ивановичень, эзда тонафни мешень кирдемань тевти. Стирсь аф пели кодамовок стакада-сталмода, фалу анок лездомс нешкопереса. Героиняньконь валонзон коряс, эрь тевсь ули кода тонафнемс, улеза аньцек оцю мяль.

Тядянц, Ольга Андреевнань, эзда Наталья тонадсь мокшень танцти пачань пидема. Содаф, што Зубунь пачатне инь эчкне и ляпотне. Наталья пидемань-панемань тевса оцю мяль шарфни кунардонь пингонь мокшэрзянь рецепттненди. Вдь минь атянь-атяньке ульсть пяк тазат и шумбрат, а тя тевса ламось ащи ярхцамбяльть эзда.

Тяда башка, Натальяти пяк ладяйхть мокшень щапне. Тяни, ужяленди, нльне велетнень эса шуроста няят национальнай щамса наряжаф ломатть. Аньцек кой-кит тя обуцять ванфнесазь свадьбатнень пингста. Сяс Натальять щавац, Раиса Алексеевна Кевбрина, оцю мяль шарфни национальнай щапнень ванфтомаснонды. Сон аноклась сембе стирь уноконзонды мазы щапт. Мокшавась сонць тиенди пуряфкст (руця лангс сотневи коняфкст), стакшни  сапонят, сёрмады сюреса панархт.

Наталья эсь мокшень мазы нарядонц щафнесы сценаса выступандамста. Стирсь машты морама. Тя асушиса Шкайсь казезе марнек  семьяснон. Кельгсазь морамаснон щавац-бабац, аляц-тядяц. Школаса тонафнемста героиняньке морсесь «Калинушка» идень ансамбльса и «Субботея» велень фольклорнай коллективса. Аф весть стирсь ульсь «Шумбрат, Мордовия!» Народнай творчествань республиканскяй фестивальса.

И Саранскяйса тонафнемстонза Наталья Вирясовась аф кадондсы морамань тевонц. Аф кунара университетса васенце курсонь студенттнень ёткса ётась «Звездопад» пялькстомась. «Вокал народный, дуэт» номинацияса сон сатозе васенце вастть. Тонафни ялганц, Алина Ждакаевать, мархта синь морасть мокшень, эрзянь и рузонь кяльса мора.

Тяда башка, Наталья кельгсы фотографиянь тиеманц. Сон тяряфни тонадомс няфтемс мазышить фотообъективть вельде. Сембода пяк салсесы стирть мяленц фотопортретсь. Вов тяфтамот минь мокшень стиреньке!

Т.Петрова.