Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Национальная тематика

АНОКЛАЙХТЬ «МАРДАРИКА» СЫР, КИРДИХТЬ СЯВАТ КАЗАНЬЦТА ШОКША ВЕЛИ САФ МИРДСЬ И РЬВЯСЬ

Ошста ётасть эряма вели, эряма вастонди кочказь велеть—пади, аф сяшкава и сидеста, но ня валхнень кулендезень эрсь эздонк. И содатама ломатть, конат шачсть-кассть тя или тона ошса, эрясть тоса лама киза, а меле полафтозь эряма вастснон и тусть вели. Мес тяфта тисть? Эрть сонцень туфталоц. Финцнень, мярьктяма, кошардозе тиемс тя аськолксть тядянь-алянь ёмла родинати кельгомась, лиятнень мяльснон салазе велень перьфпяльть мазышиц или полафтомс ошень эряфть веленнеть лангс савсь шумбрашить мархта сотф туфталхнень сюнеда.

 

Мон аф кунара арань содафокс Марина Юрьевна Перфильевать мархта, кона мирденц, Марат Викторович Беляковонь, мархта Татарстанонь Казань мазы ошста ётасть эряма Мордовиянь Теньгушевскяй райононь Шокша вели. Мес тяфта тисть? Вов мезе тянь колга азондсь Марина Юрьевна, кона лама киза работась Казаньца журналистокс.

 

«Мирдезень мархта эряме Казаньца. Тейне тя марнек масторлангса инь цебярь ошсь. «Казан»—тя котёл, конань эса марс шовордавсть ламоц нароттнень культурасна, эрь шинь эряфсна-ащефсна, кяльсна. Тяниень пингонь тя ошть ули кода лемдемс Россиять кучкаса шинь стяма ширень козя пакшкакс»,—мярьгсь М.Ю.Перфильева.

 

Мзярда састь мяльс ётамс эряма вели, мирденц мархта срхкасть Мордовиянь Теньгушевскяй райононь Шокша вели. Тоза шава модань вешендихнень 2016 кизоня тердезень велень поселениянь эстонь оцюнясь Д.М.Шиндаков.

 

«Мольсь ноябрь ковсь, менельсь сюнерель, сетькясь пиземня. Дмитрий Михайлович вятемазь сай пингонь участказонк. Перьфпяльсь аф сяшкава козяль, нльне ашуволь—од вирьхне салава эцекшнесть модатнень лангс, конат мзярда-бди соксевсть и витцевсть. Велень ингольдень ульцять киняц-янняц кассь тишеса. Дмитрий тияк азондсь, што ломаттне тяса эрясть 1,5 тёжянь кизода инголе. Шокша эрзянь велети тняра киза! Кепотьксонди, Казанць аньцек аф кунара отмечазе 1000 кизонь топодеманц»,—лятфни Марина Юрьевна.

 

Казаньцта саф авась тя пингть ваймоса марязе тя вастть историянц, кулезень эрзянь моротнень мазышиснон, шудерьксть маласа кальналть потмоса няезе панарть сюреса сёрматф эленц, кулезень стака пулайть лангста каури ракакуднятнень вайгяльснон. И сонь ашель ни мялец мрдамс Казань ошу.

 

М.Ю.Перфильева тянь колга азсь вов мезе: «Ёрань мадомс тя аф содаф модать лангс, ваномс сюнера менельти, кулхцондомс сёксень пиземть и коське лопатнень кашторфснон».

 

Аньцек тянь сатоманц инкса эрявсь лама мезе тиемс. Тумс цебярь зарплата мархта работаста, кадомс стиренцты квартирать, ардомс 600 вайгяльбе грузовой «газельса». Сяда тов эрямс киза сивотьф эряма вастса, конань эса пянакуттне срафтфтольхть-калафтфтольхть, озафтомс панденят, путомс и видемс перень сёрот, водендамс вете сараст и кафта сяват (синь тисть ушеткс хозяйстваснонды).

 

Марина Юрьевна и Марат Викторович ошень эряйхть колмоце поколенияса. Валснон коряс, ошень организмасна вешсь мезе-бди натуральнай, а ваймосна—аутентичнай.

 

Шокша вели эряма ётамдост меле васенце кизоть мезе аньцек ашесть воденда—сараст, мацихть, боратт, куднумолхт, арьсесть и пурхцонь колга. Ёрасть, штоба улель эсь сивольсна, сяс мес пцтай киза ярхцсесть Казаньцта ускф тушёнкада.

 

Мирдсь и рьвясь оцю мяльса ванондозь кода тунда эвондакшни васенце тишенясь и сёксенда прай васенце ловсь, мзяра ведь пуромкшни кельгома шудерьксснонды тунда, а мзяра—кизонь лия пинкнень. И, конешна, коль сяда лама ёрасть содамс тостонь ломаттнень эряфснон-ащефснон колга.

 

«Дивандакшнеме, што велень эряйхне лофцть аф пяк кельгсазь и, мезсь нльне эвфнемазь, макссесазь сонь симомс пурхцкятненди. Велень лавкаста ламотне рамсесть шапафтф капста, кона тиф кодамовок заводса или фабрикаса. Кяжиякшнеме, няемок кархча мархта ёряф кяскавнятнень»,—азозь Марина Юрьевна и Марат Викторович.

 

Но авать мяленц сембода пяк колазе ся, што аф эрь кудса ванфтовсть эрзянь питни щапне, а шуфтонь стака шовархне наксадсть, юмасть-арасть, родонь-плямань знак—тяшкс—мархта паршихне плхтафт пянакуттнень эса. Да и синць пянакуттне калафнефт, сяс мес велесь кунара ни нолдаф газ.

 

Казаньцта сафне рамасть кудня, кона шаволь кемонь кизода ламос. Эрь шиня Марина Юрьевна азонды спасиба ингольдень азоронцты—зрнянь кядь плотникти. Кудсь, кле, коське, вельхкссь кеме, сяс и ванфтовсь.

 

Лежанка мархта подовай оцю пянакудть синь ванфтозь, ташта голландканять одукс маразь синць. Кунардонь арзятне, эсь кядьса стаф занавескатне и подзорхне мрдафтозь кудти афкуксонь шамаликонц.

 

Шокша велеса Марина Юрьевна Перфильева и Марат Викторович Беляков эряйхть нилеце кизось. Садса озафтсть шукшторукст и лакштормарькст. Строяф кардса касондыхть синцень, а аф рамаф сявасна. Тяни мирдть и рьвять Шокша велеса сюра мархта ёмла жуватань инь оцю стадасна. Пурхцт ашесть воденда, сяс сявань лофцть симондьсазь синць. И тиендихть кочевникнень-татархнень и кунардонь эллиттнень рецептснон коряс сыр. Ламотне ни содасазь сырснон, конань лемоц «Мардарика». Мардарика—тя Марат и Марина лепнень, дар и козы валхнень эзда. Сяда тов ёрайхть аноклакшнемс сыр эрзянь рецептть коряс, кда сон муви. И лемдьсазь сонь «Шокшинскяй».

 

Т.АЛЬШИНА.

 

 


28.01.2021 №3
 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин