Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Обо всем понемногу

КОДА ПИЦЕВИХТЬ СУРОНЬ ПАЧАТНЕ

Кие хуш весть варжазень мокшень пачатнень, ся  мзярдонга аф юкстасы таньфснон. Кода аф ужяль, мекольдень кизотнень тя ярхцамбяльсь эвондакшни шра  лангса коль сяда шуроста.  И кода няеви редакциять почтаста, тя аф кржада азондови сянь мархта, што ламоц од аватне лац-ряц аф содасазь, мезе тиема, штоба лисельхть тяфтама танцти пачат. Сяс минь тячи лятфтасаськ лувиеньконди юкстаф рецептть.

 

Расчётсь—кота ломаненди.

 

Сявода суронь ямкст. Сембода ладяйхть тюжя тюсоннетне. Ямкснень каямс оцю лапшавас и штамс синь колмоксть лямбе ведьса. Тяда меле веляфтомат сифтему, штоба ведсь шудель. Тяфта кирдемат пяле частшка. Пяк косьфтамс аф эрявихть. Ня ямкснень эзда сявома 300-шка грамма шонгарямонди, кона эряви шапаксонь тиемс. Шонгарямсь пидема шобдавакиге.

 

Ямкснень можнат яжафтомс, но сяда пара, кда томбамс. Кода томбамс,  содасазь сяда эряфкшуфне. Почфть лацкас  сифондемс.

 

Илятькиге аноклада приголока. Сявость органь брускянять ветецекс пяльксонц, нолдасть лямбе ведьс, а оргатнень соламдост меле каяда тов пялешка стакан сахар почф и курмозь тозер почф. Лацкас шорямс тянь. Приголокась кеподи курок.

 

Илять тя приголокать каясть шуфтонь парняс или лия кядьгос и прибавада тов кафтошка кружка ламбама лофца, кафтошка килограмма суронь почф и килограммашка—тозеронь. Тя тиема сисемшка частста. Кядьготь путость шра лангс или лия аф пяк лямбе васту (лямбоса шапакссь курокста эжи и шапами).

 

Тяни сявость пси шонгарямть, каяда эзонза колмошка кружка ламбама лофца. Кеветиешка минутада меле, мзярда кельми, каяма курмозь тозер или розь почф, сембонь лацкас шорямс и вельхтямс. Тя шонгарямть кадомс кеветиешка минутас, мзярс сон аф ламбаськоды.

 

Шонгарямть пяленц илять каямс шапаксти и шорямс. Веньгучкать эряви тага каямс аф ламоня, штоба шапакссь пяк афоль шапама, и штоба улель паргана. Шобдава каямс лядыкс шонгарямть, шорямс и кадомс шапаксть лац кеподема. Тяда меле ушедомс пачань пицема. Пицема аф эряскодозь. Пси пачкалгть вадесть ваи нуланяса, штоба кецяль. Шуфтонь карьхкаса каяда пачкалгть кучкас шапакс. И тевсь тусь.

 

Заботада суронь пачатнень мархта лама. Но сянкса и ярхцамбяльсь лиси пяк танцти, цебярь.

 

 


28.01.2021 №3
 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин