Евгений Алушкин: «ТЕЙНЕ АШ КОДА ЛЯДОМС ШИРЕСА»

—Евгений, улель пара, кда васендакиге азондолеть аф лама эсь колгат, костоннят тон?
—Шачемас-касомас коре мон шабрань регионцта—Нижегородскяй областьста. Ёмла родиназе тостонь Сергач ошсь. Саранскяйть эзда сон ащи кафта сятт вайгяльбень вастса. Н.П.Огарёвонь лемса Мордовскяй госуниверситетса тонафнесь аказе, моньге тердемань тяза.
—Мес кочкайть врачень профессиять, шять, тядятне-алятне врачт?
—Аф, синь заняфт ёфси лия тевса, тядязе—бухгалтер, алязе—инженер. Да и монцьке шабакс ашень арьсекшне арамс врачекс, тя мяльсь сась оцю класса тонафнемста. Телевизорса фильмань ваномста кармань шарфнема мяль профессиять эрявиксшинц лангс, вдь врачнень эзда ащи ломаттнень аф аньцек шумбрашисна, но и эряфсна. Вов и поступань медицинскяи. Тяниень пингть тонафнян 1 курсса ординатураса  «Онкология» специальностьс коре.
—Мзярда ушедоть работама ковиднай госпитальса?
—5№ больницяв работама лисень мелянь ноябрь ковста, лисенди, пцтай колма кофт покодян тяса. Тяда инголе мон варчсине ни тевса профессиять коряс получаф содамошинень—пцтай киза работань Перинатальнай центрань реанимацияса, коса ащесть аньцек шачф иднятне.
—Кода сафневи и тонафнемс, и работамс?
—Сембось уленди, сашендови и ветемба тонафнемс, кда шить работань и ашень пов занятиятненди. Тонафнемаса вешфкссь эздон стама жа, кода и аф работай студенттнень эзда. Тя и шарьхкотьф. Вдь, кда тячи тон мезе-бди нолдать ётави тематнень эзда, эста кода кармат пчкафнемост ломаттнень?
—Кода ётни рабочай шице больницяса, мезсь сувси тонь обязанносттненди?
—Работазе ладяф тяфта: сутка работан, кафта, сяда шуроста колма суткат ваймосян. Самок больницяв, кода и сембе медицинскяй персоналсь, васендакиге сувсян тяфта лемневи «ару зонати». Тяса минь получсесаськ сембе эрявикс инвентарть—специальнай костюмть и араламань лия средстватнень. Наряжамок, ётнян «якстерь зонав». Тяфта лемневи ся вастсь, коса пчкафневихть коронавирусса сярядихне. Больницяса тя инь пелькс участкась, сяс мес тяса ули кода тёждяста сярятькстомс эстееньковок. Обходта меле, мзярда врачсь сёрмадсыне назначениятнень, мон кярьмотькшнян синь пяшкодемаснонды: кинди капельник путома, кинди укол тиема, кинди кодама таблеткат явомат. Тяда башка, медбраттнень и медсестратнень обязанностьснонды сувси сярядихнень мельге якамась: кие васта лангста кеподема, кие андома, кие   КТ-с вятема, а кие, кда арась кальдяв, реанимацияв ётафтома. «Якстерь зонаса» медработниксь средняйста ётафни 12 част сменати. 6 частт работаме, меле лисенттяма «ару зонав», коса работатама документациять мархта, а сяльде тага 6 частс сувсетяма «якстерь зонав».
—Мезсь инь стакась тевсот?
—Сембода стака работамс реанимацияса, тяса сидеста сашендови васетькшнемс куломать мархта и тонадомс тянди аф тёждя.
—Кода марясак пряцень араламань костюмть эса?
—Ламотне арьсихть, бта ня щапне пяк стакат. Тя аф виде, сталмосна ефси аф оцю. Но ули лия прябала—сельмованоматне. Мзярда ащат мархтост лама пинге, синь ливоськоткшнихть и пачкаст ушеткшнят  кальдявста няема. А нинге фалу ванома перчаткатнень мельге, штоба афольхть сязев. Сязьф вастть эзга тёждяста ётни вируссь.
—Кодама симптом мархта сяда сидеста пачфнесазь больницяв сярядихнень?
—Васенцесь—ломанть аф сатни ваймоц и сонь 38 градуста оцю температурац. Кой-кит, но аф сембе, лотксихть марямда шинеть и таньфть. Ламотнень эвондакшни коз, но тага жа аф сембонь. КТ-са сембонь мушендови пневмония—тевлавонь воспаления.
—Кода вятьсазь пряснон сярядихне?
—Кие кода, сяда сидеста ломаттне пачфневихть больницяв пяк эвотьфста. Арьсихть, кда повсть стационару, лисенди, тевсна ёфси кальдяв, цють ни аф кулома лангсот. Тя аф тяфта. Практикасон лама случайда, мзярда инь стака сярядихне, конатненди савсь мянь кафтошка ков ащемс реанимацияса, тушендсть куду эсь пильгснон лангса. Сяс аф эряви макссемс пря эводемати.
—Мезе мала ломаттне арьсихть работацень колга?
—Пичедихть, конешна, инксон. Но мон кочкайне тя профессиять, а сяс любой пингть эряви улемс анококс пчкафнемс ломаттнень. Сембе минь няйсаськ, кодама ситуациясь марнек мирса. Сярядида пяк лама, врачне аф сатнихть, сяс аш кода лядондомс ширеса, кда эряви лезксоньке.
О.КОЛЕДИНОВА.