Поиск по сайту: 
 

Архив
 март 
 2021 
пн вт ср чт пт сб вс
1234567
891011121314
15161718192021
22232425262728
293031    

 
 

 

Национальная тематика

«ТИЕМС СЕМБОТЬ, МЕЗСЬ АЩИ ЭЗДОНК»

—Светлана Никитовна, кода тядде Мордовия Республикаса кармайхть ётафневома эряфс «Культура» национальнай проектть вешфксонза? И конат эздост эрь шинь тевсонт лихтевихть васенце вастти?
—Республикаса «Культура» национальнай проектонь вешфксне-мероприятиятне тядде  сяда тов кармайхть ётафневома эряфс. Тяда ингольдень кафта кизоста кочкаф опытсь, койсон, тейнек максы оцю лезкс.
Лоткан инь оцю тефнень лангс, конат арьсекшневихть тиемс. Васенцесь эздост—тя Рузаевка ошса Ухтомскяень лемса Культурань центрать капитальнай ремонтта меле панжевомац. Сон арай культурань стама  вастокс, коса нолдавихть тевс клубнай работань од метоттне.
Лиякс мярьгомс, тоса панжевихть студият, коса ломаттнень кармайхть тонафтома тяниень пингонь щамбялень стама, дизайнеронь и инновационнай лия тефненди.
Тяфта жа   капитальнайста петеви Торбеевскяй райононь Культурань кудсь. А тяда меле тоза путови тяниень пингонь цифровой оборудования, конань вельде работась культурань тя учрежденияса лихтеви од уровеньц.
Республикаса строявихть культурань кафта од учрежденият. Нят—Зубово-Полянскяй, Краснослободскяй райононь Покровскяй Селищань и Рузонь  Маскино Культурань куттне. Тяка пингть, тиеви капитальнай ремонт Рузаевка ошень и Ромоданово посёлкань Искусствань школатнень эса.
Башка мяль тядде тяфта жа шарфтови   республикаса цифровой культурать касфтоманцты-виияфтоманцты. Цебярьгофтовихть культурань учреждениятнень сайтсна, сяда сидеста и келиста кармайхть няфневома театратнень, концертнай организациятнень, библиотекатнень и лия учреждениятнень мероприятиясна социальнай сетьтнень эса и «РФ-нь культура» лем ала интернетонь порталса.
Тяса нинге эряви азомс: цифровой культурань сатфкснень коряс Мордовия Республикась тяниень пингть ащи 5-це вастса Российскяй  Федерациянь 32 ся субъекттнень ёткса, коса эряй пцтай фкя миллион ломань. Сяс тейнек ули нинге коза касомс.
И, конешна, тядде арьсекшнетяма няевиста касфтомс ломанень лувксть, конат сашендыхть республикань культурань мероприятиятненди, конат ётафневихть театратнень, музейхнень, библиотекатнень, культурань центратнень и лия учреждениятнень эса.
—Ужяль, конешна, но коронавируснай пандемиясь нинге ашезь машфтов. Сяс культурань учреждениятненди сашендови латцемс работаснон, кирдемок мяльса ладяф ограничениятнень. Кодапт, койсот, кармайхть тяфтама работать эсь лацонь ширенза?
—Пандемиясь, конешна, кандсь лама прябалада культурань учреждениятненди. Синь миньцонк меля эсь зданиясост зрительхненди, лувихненди ашесть макссе услугат пцтай ниле кофт. Но тяда меле, кирдемок мяльса коронавирусть инкса ладяф ограничениятнень, культурань учреждениятне валом-валом ладязь эсь работаснон, кода тяни корхнихть, очнай форматса. И, конешна, вихонзафтозь работаснон интернетса онлайн, видеоконференциянь и лия форматса.
Ётай кизоть итогонза няфтезь: республикань культурань государственнай учреждениятне государственнай заказть пяшкодезь 70 процентс. И тя тейнек арась сатомшка цебярь сатфксокс. Тякоть, ужяленди, аш кода азомс культурань муниципальнай учреждениятнень работаснон колга. Государственнай заказть синь пяшкодезь аньцек 28 процентс.
Сяс республикань культурань сембе учреждениятнень инголе ащи фкя марстонь задача—лихтемс-кеподемс республикань культурать од уровеньц!
—А мезе азат сянь коряс, кода эряви ладямс-вятемс грантонь сатомать коряс работать республикань культурань учреждениятненди и аф коммерческяй общественнай организациятненди?
—Тяфтама учреждениянь и организациянь  эрь руководительти тячи эсь коллективонц марстонь арьсемас-ёньц эряви васендакиге лацкас пачфтемс грантонь сатомать коряс работать цебярьгофтоманц колга мяльть. Лиякс мярьгомс, эряви тонафнемс и маштомс аноклакшнемс культурань и общественнай мероприятиянь стама проектт, конатнень эряфс ётафтомаснонды странань грантонь фонттне и Государственнай учреждениятне фалу макссихть грантт.
Тевсь тяса ащи, конешна, аф аньцек ярмакть лангса. Проектонь анокламста культурань учреждениятне и аф коммерческяй организациятне профессиональнай ширде ушеткшнихть няевиста касома.  Тянди эсост кошарды сонць тевсь—лафча проектонди кодамовок фонд или государственнай организация грант аф максы.
Тяка пингть, койсон, эряви азомс: республикань ламоц культурань учреждениятне и аф коммерческяй организациятне грантонь сатомать коряс работать вятьсазь сатомшка маштозь. Кепотьксонди, 2019-2020 кизотнень синь сатсть 59 миллион цалковай, конатнень лангс республикаса ётафтовсь эряфс культурань и общественнай мероприятиянь 38 проект.
И тяни минь сембе цебярьста шарьхкодьсаськ: гранттнень вельде республикань культурань и общественнай тевонь  сферась тейнек тиеви ламода сяда няевиксокс и мялень салайкс.
—Кодама форматса  арьсекшневихть ётафтомс С.Д.Эрьзянь 145 кизонь юбилеенцты лемтьф  и  лия няевикс мероприятиятне?
—Республикань Культурань, национальнай политикань и архивнай тевонь министерствась аноклась юбилеень и событиянь календарь. Сембе ня мероприятиятнень марстонь цельсна фкя—тиемс республикань культурать нинге сяда содафокс кода странаса, стане и омба масторса. И тянь вельде тердемс республиказонк сяда лама зритель и  турист.
Конешна, васенце вастса сембе лия мероприятиятнень ёткса ащи  мероприятиянь циклась, кона лемтьф сембе мирса содаф скульпторть С.Д.Эрьзянь 145 кизонь юбилеенцты.  Февральста торжественнайста панжеви «С.Д.Эрьзянь кизоц» мероприятиясь, конань эзда ушеды торжествань циклась, а  тёкшекс тянди арай 8 ноябрсь—великай скульпторть шачема щиц.
—Светлана Никитовна, эсь ширдет, мезе нинге ёралеть пачфтемс лувиеньконди?
—Кда корхтамс республикань профессиональнай и народнай культурать колга, эста эряви азомс: мон марян инксост гордость.
Минь ули минцень операньке, балетоньке. Ули национальнай театраньке и эстраданьке, улихть «Акша келу», «Велень озкс», «Сабантуй», «Шумбрат» и национальнай лия  иланьке. Сяс, койсон, тейнек сембонди ули кода марямс гордость республикань  профессиональнай и народнай культураньконь инкса.
Сяс, ялгат, тердян эсонт якамс театрав, музеи, концертс, культурань лия мероприятияс. Сембе ня мероприятиятне  ётафневихть санитарно-эпидемиологическяй норматнень и вешфкснень коряс.
В.Нестеров.

11.02.2021 №5
 
 
 

 
НОВОСТИ
 
 

Республикаса коронавирусса сярядихнень лувкссна кири

Мордовиянь Оцюнять аф лама пингс тевонзон тиендисна Артём Здунов 18
февральста ётафтозе республикаса коронавируснай инфекциять инголдаманц и
келемоманц коряс оперативнай штабть заседаниянц. Ванондовсть уликс
эпидемиологическяй ситуациять, COVID-19 эзда вакцинациять, здравоохранениянь
региональнай системать тевонь мольфтеманц, санитарно-эпидемиологическяй
вешфкснень ванфтомаснон мельге контролень вятемать коряс кизефксне.
Примсеви мератнень инкса республикаса коронавирусса урмаськодыхнень лувкссна
кири. Тяниень пингть ковиднай госпитальхнень эса пчкси 1000-да кржа пациент
(стака пинкнень ульсь 2000 ломань), кири лувкссна и амбулаторнайста
пчксихнень. Пчкафтомань учреждениятне меки мртцихть работань плановай
режимти, латцевихть специализированнай медицинскяй лезксонь максомань
объемтне.
Но райоттнень эзга тефне ащихть лиякс. Коса урмаськодыхнень лувкссна кири, а
коса меколанкт—касы. МР-нь Оцюнять аф лама пингс тевонзон тиендисна шарфтсь
тянь лангс башка мяль и кошардсь ваномс ся райоттнень эса тефнень
мольфтемаснон, коса эпидемиологическяй обстановкась аф цебярьготкшни.
«Ардатовскяй, Ельниковскяй, Большеберезниковскяй, Большеигнатовскяй,
Старошайговскяй, Чамзинскяй, Рузаевскяй, Ковылкинскяй и Кадошкинскяй
райоттне—тиньцонт урмаськодыхнень лувкссна сяда оцю, кда сявомс целайнек
марнек республикать эзга,—кемоста азозе Артём Алексеевич муниципальнай
райононь оцюнятненди.—Эряви максомс анализ ситуацияти, ваномс, кодама мерат
примсевихть».
Нинге  фкя таколфты кизефкссь—сядонга лама урмаськодыхнень лувксса эряфкшу
ломаньда. Ня даннайхнень кемокснесыне Роспотребнадзорсь.
«Тиемок анализ тя недялять урмаськодыхнень лувксснонды, минь няйсаськ, што
коронавирусса сярядихнень лувксса 65 кизоса и сяда сире ломаньда арась сяда
лама—27,7 процент, а ётай недяляня ульсь 23 процент, лиякс азомс, моли
касома,—отмечазе МР-ть эзга главнай санитарнай врачсь Татьяна Харитонова.—
50-60 кизосотнень ёткса урмаськодомась лядсь сяка уровеньца».
«Урмаськодыхнень лувкссна кири, но эряфкшу ломаттнень заразиндавомань
талекасна касы, а Ардатовскяй районца тя показательсь и ёфсикс няфни 40
процент»,—мярьгсь Артём Здунов.
Тянкса оперативнай штабсь кирдезе 65 кизоса и сяда сире ломаттненди
самоизоляциянь режимть сяда тов кувалгофтомань пингонц коряс предложениять.
Нинге фкя важнай темась, кона ванфоль заседанияса,—коронавирусть эзда
вакцинациясь. Мордовияса сон ётай активнайста, региону пачфтьф 33 тёжяньда
лама вакцинань комплект, прививка тифтсь пцтай 26 тёжянь ломанць.
Ладявсь аптекатнень эса лекарстватнень улемаснон мархта тевсь. Кой-кона
позициятнень коряс, кода азфоль, республикань государственнай аптекатнень
эса тиф запас  аф колма ковонди, а нльне кафтошка кизонди.
Но улихть прябалат льготнай лекарстваса обеспечендамать мархта, мезть лангс
шарфтсь башка мяль МР-нь Оцюнять аф лама пингс тевонзон тиендисна, и кемоста
азозе республикань Здравоохранениянь министерствати курокста ладямс тянь
мархта сотф ситуациять и сяда тов кирдемс башка контроль ала.
Оперштабть заседаниянц песта республикань руководительсь мярьгсь: сембе
главнай кизефксне, конат сотфт здравоохранениянь системать работанц мархта
пандемиять пингста, ванфнесазь эсь эрявиксшиснон. Од коронавируснай
инфекцияса сярятькстыхнень лувксснон кирьфтаманкса и сяда тов ситуациять
цебярьгофтоманкса организациянь руководительхненди,      республикань
эряйхненди эряви и сяда тов кемоста ванфтомс эсь прянь араламань мератнень и
санитарнай врачнень вешфксснон.
25.02.2021  № 7
 
 

МР-нь Оцюнять аф лама пингс тевонзон тиендисна Артём Здунов Москуса васетькшнесь Россиянь культурань министрть Ольга Любимовать мархта

15 февральста Москуса ульсь РФ-нь культурань министрть Ольга Любимовать и
МР-нь Оцюнять аф лама пингс тевонзон тиендиснон Артём Здуновонь рабочай
васедемасна. Васедемаса главнай кизефксокс ульсть велень Культурань клубонь
строямась и уликснень петемасна, а стане жа региононь культурань
учреждениятнень эса кинозалхнень оборудованиясна.
«Велень Культурань клупне ломаттненди эрявихть. Минь фалу кирттяма соткст
региональнай власттнень мархта и ваттама ня объекттнень эса сяда тов тевонь
мольфтемать мельге. Тя тейнек эряви, сяс мес од площадкань панжемась и
уликснень петемасна панчсихть ки ломаттнень творческяй маштомошиснон
виияфтомаснонды и мушендомс асуфнень»,—мярьгсь Ольга Любимова.
Эсь ширденза Артём Здунов азсь благодарностень валхт Россиянь Культурань
министерствать лемс Культурань куттнень строямаса лезксонкса и отмечазе, што
Мордовияти велетнень эса Культурань кудонь строямась—тевонь вятемань важнай
направлениясь.
18.02.2021  № 6
 
 

Ванондовсь инвесторхнень мархта экотехнопаркть строяманц коряс кизефкссь

Мордовиянь Оцюнять аф лама пингс тевонзон тиендисна Артём Здунов 3 февральста васетькшнесь «Террикон» компаниянь, кона тиенди кархчнень-ляткснень обработкаснон коряс объектт,  группать руководстванц мархта. Компаниясь Мордовиянь руководительти макссь ваномс экотехнопарконь, конанди сувси единай межмуниципальнай полигон и кархчень сортировандамань комплекс, строямать коряс проект.
Лятфтасаськ, «Экология» национальнай проектть эряфс ётафтомань рамкаса путф задача кирьфтамс полиготтнень эса кархчнень калмамаснон лувксснон и кеподемс производственнай процесса вторичнай сырьять лувксонц тевс ноляманц. 2030 кизоти арьсекшневи пцтай сембе ляткснень кучсемс переработкас.
Артём Здунов педа-пес ванозе няфтьф проектть, конань эряфс ётафтомац арьсекшневи государственно-частнай партнерствань механизматнень вельде инвесторть эсь средстванзон лангс кредитнай ресурснень сувафтозь. Инвестициянь объёмсь лувондови 2,4 миллиард цалковайса, рабочай вастонь панжемась—250 ломаненди.
Артём Здунов шарфтсь башка мяль сянь лангс, штоба аф нолдамс тиф расчёттнень эса эльбятькст, проектть эряви няфтемс «Российский экологический оператор» компанияти, кона эряфс ётафнесы    ТКО-нень обработкаснон коряс государственнай программать.
11.02.2021  № 5
 

Тяфтама продукцияти ули вешфкс сембе вастова

Мордовия Республикань Оцюнять аф лама пингс тевонзон тиендисна Артём Здунов ульсь «Оптикэнерго» компаниятнень группаснон предприятиянзон эса, кона, 2020 кизонкса рейтинговай оценканзон результатонзон коряс, лувондови лидерхнень эзда фкясь республикань промышленнай предприятиятнень ёткса.
Сембоц компаниятнень группасост 22 предприятия, промышленнай направлениясь няфтьф «Сарансккабель-Оптика», «ЭМ-Кабель», «ЭМ-Кат», «ЭМ-Пласт», «Сармат» завоттнень мархта.
Мордовия Республикань Оцюнять аф лама пингс тевонзон тиендисна лац-ряц содафтсь предприятиятнень мощностьснон мархта, улемок компаниятнень группаснон производственнай сембе площадканзон лангса. Кода азондозе «Оптикэнерго»  ГК-ть директоронзон Советснон председателец Эвир Боксимер, предприятиятне обеспечендасазь потребительхненди кабельнай продукциять марнек производстванц комплексонц (катанка—пролоп—кабель—арматура подвесонди), тяка пингть 2020 кизоня инновационнай продукциять объёмоц ня предприятиятнень эса ульсь 80 процент ноляви изделиятнень марстонь объёмснон эзда. Холдингть кабельнай продукцияц пачфневи оцю госкорпорациятненди и ноляви тевс странань знаковай ламоц  объекттнень эса.
Республикать руководителенцты стане жа азондсь компаниятнень группаснон предприятиянзон эса корпоративнай культурать и работникненди дополнительнай социальнай гарантиятнень колга, конатненди сувафневихть работас и работаста служебнай транспортса питнефтома пачфнемась, пси ярхцамбяльса обеспечендамась, медосмотратне.
Сембоц компаниятнень группасост тяниень пингть работай 1700-та лама ломань, промышленнай направленностень предприятиятнень эса средняй заработнай платась 2020 кизоня ульсь 50 тёжянь цалковай.
Мордовия Республикань Оцюнять аф лама пингс тевонзон тиендисна стане жа ульсь «Оптикэнерго»  предприятиянь музейса, коса содафтсь компаниятнень группаснон историянц мархта и кадсь почётнай инжиень книгати тяштькс, арьсемок сяда тов лац-ряц работамс производственнай од платтнень ётафтомстост.
11.02.2021  № 5
 

Мордовияв рабочай визит мархта сашендсь Россиянь промышленностень и торговлянь министрсь Денис Мантуров

5 февральста Мордовияв рабочай поездка мархта сашендсь РФ-нь промышленностень и торговлянь министрсь Денис Мантуров. Ведомствань руководительсь, конань мархта сотрудничендамань сотксонь кирдемась пяк эряви республикати социально-экономическяй ширде виияфтоманкса, макссь питне республикать промышленнай потенциалонцты, панчсь од производственнай линия «Биохимик» заводса, содафтсь региононь инголи моли предприятиятнень продукцияснон мархта и ванозень МР-нь Оцюнять аф лама пингс тевонзон тиендиснон Артём Здуновонь мархта промышленностень и торговлянь сфераса марстонь  проекттнень эряфс ётафтомаснон коряс кизефкснень.
Мордовияса министрть рабочай программанц васенце пунктокс арась «ВКМ-Сталь» заводсь—Россиянь инголи моли металлургическяй комплексонзон  эзда фкясь, кона заняф машина кинь, автомобильнай и нефтегазовай отраслятненди, велень хозяйствати литьень нолдамаса. Предприятияса Денис Мантуров ванозень производственнай линиятнень.
Вагоннай литьянь производствать коряс «ВКМ-Стальсь» сувси Россияса инголи моли колмотнень ёткс. 2020 кизоня нолдаф 48 тёжянь тонна товарнай продукция, оцю вагоннай литьянь производствань объёмсь ульсь 10 тёжяньда лама вагонокомплект. Ноляви продукцияти лувкссь несколька кизоста кассь 30-ть эзда ушедомок 500-ти  молемс.
Холдингть Президентоц Константин Данилов азондсь литейнай производствать одкстоптомань васенце этапонц меля шумордаманц колга, нолдавсь тевс тяниень пингонь электродуговой сталеплавильнай пянакудсь, конань ёмкостец—16 тонна.
Азфоль, што модернизациянь программась сяда тов кармай мольфтевома мелкай и средняй литьянь нолямать коряс мощносттнень касфтоманкса. Тянь инкса  панжеви пцтай 500 рабочай од васта. Проектнай мощностьс лисемась арьсекшневи 2024 кизоня, инвестициянь объемсь—3,7 миллиард цалковай.
Тевс ноляви технологиятненди вийс коре цебярьгофтомс трудонь условиятнень, сяда касфтомс производствать экологическяй ширде  арукс улеманц. Кепотьксонди, 2020 кизоня путф 20 миллион питнеса кожфонь аруяфтомань системась аруяфнесы кожфть  тяфта лемневи «рдазу» металлургическяй производстваса.
Башка токсевсь производствать диверсификациянц и кадратнень коряс темась. Денис Мантуровонди азондозь, кле, профессиональнай металлургонь анокламань системась ладяф ни несколька киза и тяниень пингть вузса тонафнемать пингста кочксевихть асу цёратне  и аф аньцек минцень регионцтонк. 
«Ушеткшнеськ кадрань кочкамать несколька кизода инголе кафта профессиональнай металлургста, тяни ни анокламе 50 специалист, и нинге кемоттне аделасазь тонафнемаснон тядде»,—мярьгсь «ВКМ-Стальть» управляющай директороц Николай Чалов.
Предприятияса средняй зарплатась 42 тёжянь цалковай.  «ВКМ-Стальсь» сувси республиканскяй 10 предприятиятнень ёткс, коса пандови ломаттненди оцю зарплата.
11.02.2021  № 5
 

Евгений Алушкин: «ТЕЙНЕ АШ КОДА ЛЯДОМС ШИРЕСА»

Россияса коронавируснай инфекцияса васенце сярядись муфоль 2020 кизонь 31 январьста. Пцтай киза ни минь эрятама тя пелькс урмать мархта. Тяддень 20 январти ковидть мархта савсь васедемс Мордовиянь 15173 эряйти. Кода аф ужяль, 119 ломанць (стане жа 20 январти) ёткстост кулость урмать сюнеда.
Пандемиять пингста, шарьхкотьф, сембода стакаста сашендови медицинскяй работникненди. Ащемок, кода корхнихть, передовойса, синь шинек-венек эсь прянь аф ужяльдезь тюрихть урмать каршес. Сидеста врачне аф сатнихть, теест лездома сашендыхть    студенттне—сай пингонь докторхне. Фкясь синь ёткстост од цёрась, Н.П.Огаревонь лемса МГУ-нь Медицинскяй институтонь тонафнись Евгений Алушкин. Аф фкя ков ни сон работай 5№ Республиканскяй клиническяй больницяса, кона пандемиять ушетксста ётафтфоль ковиднай госпиталенди, лиякс мярьгомс, тяса тяни пчкафневихть коронавируснай инфекцияса сярядихне. Аф кунара Евгениень мархта удалась корхнемс минь корреспондентоньконди. Сон азондсь аф тёждя тевонц колга, кода ётни рабочай шиц, мезсь сембода стакась и кода вятьсазь пряснон сярядихне.
04.02.2021  № 4
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин