Поиск по сайту: 
 

Архив
 март 
 2021 
пн вт ср чт пт сб вс
1234567
891011121314
15161718192021
22232425262728
293031    

 
 

 

Тема дня

«КАТК МАРНЕК МИРСЬ НЯЙСЫ МОРДОВИЯТЬ ПРОДУКЦИЯНЦ!»

Артём Здуновонь Ардатовскяй районца улеманц колга
Мордовия Республикань Оцюнять аф лама пингс тевонзон тиендисна Артём Здунов
13 февральста рабочай поездка мархта ульсь Ардатовскяй районца. Республикать
руководителенц рабочай программац ушедсь «МАПО «Ардатов» ООО-ть—районца
велень хозяйствань инь оцю предприятиятнень эзда фкять ваноманц эзда.
Хозяйствась сатни сатфкст касыксонь: зерновой и зернобобовай культуратнень,
сахарнай якстеряпсонь касфнемаса. Тяда башка, «Ардатов» МАПО-сь заняф и
траксонь кирдемаса.
Артём Здунов ванозе молочно-товарнай фермать Пиксяси велеса, корхнесь
предприятиять директоронц Юрий Евдокимовонь и Ардатовскяй райононь оцюнять
Александр Антиповонь мархта велень хозяйствань производствать сяда тов
виияфтоманц колга.
Мордовиянь руководительсь Артём Здунов ульсь и Ардатовскяй светотехническяй
заводса. Предприятиясь ноляй валдоптомань лама приборда, конат нолявихть
тевс промышленнай, велень хозяйствань, административно-общественнай, бытовой
помещениятнень, а стане жа ульцянь и садонь-парконь светильникнень
валдоптомс. Тячиень шити изделиятнень номенклатурасна 3 тёжяньда лама
наименования. 2020 кизоня предприятиясь арьсесь и нолдась тевс 554 од
изделия.
2019 кизоста сявомок «АСТЗ» ОАО-сь—«Производительность труда и поддержка
занятости» национальнай проектонь участник.
Артём Здунов ванозень производственнай инь оцю площадкатнень, корхнесь
предприятиять руководстванц мархта од инвестпроекттнень эряфс ётафтомаснон и
производствать загрузканц коряс предприятиять планонзон колга.
Артём Здунов Ардатовав рабочай поездканц пингста ванозе ошть центральнай
пяльксонц, тяконь лувксса, макссь оценка Базарнай площадть благоустройстванц
проектонцты. Лятфтасаськ, 2020 кизонь сентябрьста Ардатовась арась сяськикс
ошень комфортнай средать тиеманц инь цебярь проектонь Всероссийскяй
конкурсть IV этапсонза «Малые города с численностью населения до 20 тысяч
человек» категорияса. Проектть коряс арьсекшневи ётафтомс центральнай
площадть благоустройстванц, ванфтомок ошть историко-архитектурнай питнишинц,
и эреклафтомс ётай кизонь койхнень-обуцятнень тяниень пингонь форматса.
Артём Здунов ульсь Ардатовскяй Культурань кудса, коса содафтсь од зданиять
функционалонц мархта и ванозе ремеслань выставкать. Республикать
руководителенцты азондозь: Культурань кудсь Ардатоваса строяфоль 2017
кизоня, тя искусствань афкуксонь храм, коса ули сембось ётка пингть
культурнайста ётафтоманц инкса.
Мордовия Республикань Оцюнять аф лама пингс тевонзон тиендисна оцю мяльса
содафтсь выставкать мархта, конань эса няфтьфтольхть народнай промыслань
изделиятне. Ардатовскяй районць содаф машты кядь ломанензон мархта,
кепотьксонди, урусовскяй мастерхнень—синь валенцяснон каннесазь странать
пцтай сембе региононзон эряенза!
«Народнай промыслатне—тя историяньке, козяшиньке и достоянияньке,—шарфтсь
мяль Артём Здунов.—Тейнек ванфтомат народоньконь традициянзон, ванфтомат
синь и максомат иденьконди и уноконьконди».
«Тинь работада народнай умелецнень мархта—ётафтоде вебинар электроннай
площадкатнень лангса торговляти синь тонафтомаснон коряс?—кизефтезе Артём
Здунов МР-нь экономикань, торговлянь и предпринимательствань министрть
тевонзон тиендиснон Алексей Грибановонь.—Тя тинь ответственностентень зонац.
Народнай мастерхненди эряви лезнемс синь изделияснон реализацияса. Катк
марнек мирсь няйсы Мордовиять продукциянц!»
Мордовия Республикань Оцюнять аф лама пингс тевонзон тиендисна Артём Здунов
ульсь 250 вастонди идень од садса Ардатоваса. Идень садсь строяф
«Демография» национальнай проектть коряс. Республикать руководителец макссь
оцю питне шабатненди тиф условиятненди, од зданияса ули сембось синь
гармоничнайста касомаснонды.
Артём Здунов корхнесь воспитательхнень мархта и шарфтсь мяль, што идень од
садсь—пяк цебярь, республикаса инь цебярьхнень эзда фкясь. «Ит-тненди тяса
улемстост комфортнай условиятне—тя пяк эряви!»—мярьгсь Мордовия Республикань
Оцюнять аф лама пингс тевонзон тиендисна.

18.02.2021 №6
 
 
 

 
НОВОСТИ
 
 

Республикаса коронавирусса сярядихнень лувкссна кири

Мордовиянь Оцюнять аф лама пингс тевонзон тиендисна Артём Здунов 18
февральста ётафтозе республикаса коронавируснай инфекциять инголдаманц и
келемоманц коряс оперативнай штабть заседаниянц. Ванондовсть уликс
эпидемиологическяй ситуациять, COVID-19 эзда вакцинациять, здравоохранениянь
региональнай системать тевонь мольфтеманц, санитарно-эпидемиологическяй
вешфкснень ванфтомаснон мельге контролень вятемать коряс кизефксне.
Примсеви мератнень инкса республикаса коронавирусса урмаськодыхнень лувкссна
кири. Тяниень пингть ковиднай госпитальхнень эса пчкси 1000-да кржа пациент
(стака пинкнень ульсь 2000 ломань), кири лувкссна и амбулаторнайста
пчксихнень. Пчкафтомань учреждениятне меки мртцихть работань плановай
режимти, латцевихть специализированнай медицинскяй лезксонь максомань
объемтне.
Но райоттнень эзга тефне ащихть лиякс. Коса урмаськодыхнень лувкссна кири, а
коса меколанкт—касы. МР-нь Оцюнять аф лама пингс тевонзон тиендисна шарфтсь
тянь лангс башка мяль и кошардсь ваномс ся райоттнень эса тефнень
мольфтемаснон, коса эпидемиологическяй обстановкась аф цебярьготкшни.
«Ардатовскяй, Ельниковскяй, Большеберезниковскяй, Большеигнатовскяй,
Старошайговскяй, Чамзинскяй, Рузаевскяй, Ковылкинскяй и Кадошкинскяй
райоттне—тиньцонт урмаськодыхнень лувкссна сяда оцю, кда сявомс целайнек
марнек республикать эзга,—кемоста азозе Артём Алексеевич муниципальнай
райононь оцюнятненди.—Эряви максомс анализ ситуацияти, ваномс, кодама мерат
примсевихть».
Нинге  фкя таколфты кизефкссь—сядонга лама урмаськодыхнень лувксса эряфкшу
ломаньда. Ня даннайхнень кемокснесыне Роспотребнадзорсь.
«Тиемок анализ тя недялять урмаськодыхнень лувксснонды, минь няйсаськ, што
коронавирусса сярядихнень лувксса 65 кизоса и сяда сире ломаньда арась сяда
лама—27,7 процент, а ётай недяляня ульсь 23 процент, лиякс азомс, моли
касома,—отмечазе МР-ть эзга главнай санитарнай врачсь Татьяна Харитонова.—
50-60 кизосотнень ёткса урмаськодомась лядсь сяка уровеньца».
«Урмаськодыхнень лувкссна кири, но эряфкшу ломаттнень заразиндавомань
талекасна касы, а Ардатовскяй районца тя показательсь и ёфсикс няфни 40
процент»,—мярьгсь Артём Здунов.
Тянкса оперативнай штабсь кирдезе 65 кизоса и сяда сире ломаттненди
самоизоляциянь режимть сяда тов кувалгофтомань пингонц коряс предложениять.
Нинге фкя важнай темась, кона ванфоль заседанияса,—коронавирусть эзда
вакцинациясь. Мордовияса сон ётай активнайста, региону пачфтьф 33 тёжяньда
лама вакцинань комплект, прививка тифтсь пцтай 26 тёжянь ломанць.
Ладявсь аптекатнень эса лекарстватнень улемаснон мархта тевсь. Кой-кона
позициятнень коряс, кода азфоль, республикань государственнай аптекатнень
эса тиф запас  аф колма ковонди, а нльне кафтошка кизонди.
Но улихть прябалат льготнай лекарстваса обеспечендамать мархта, мезть лангс
шарфтсь башка мяль МР-нь Оцюнять аф лама пингс тевонзон тиендисна, и кемоста
азозе республикань Здравоохранениянь министерствати курокста ладямс тянь
мархта сотф ситуациять и сяда тов кирдемс башка контроль ала.
Оперштабть заседаниянц песта республикань руководительсь мярьгсь: сембе
главнай кизефксне, конат сотфт здравоохранениянь системать работанц мархта
пандемиять пингста, ванфнесазь эсь эрявиксшиснон. Од коронавируснай
инфекцияса сярятькстыхнень лувксснон кирьфтаманкса и сяда тов ситуациять
цебярьгофтоманкса организациянь руководительхненди,      республикань
эряйхненди эряви и сяда тов кемоста ванфтомс эсь прянь араламань мератнень и
санитарнай врачнень вешфксснон.
25.02.2021  № 7
 
 

МР-нь Оцюнять аф лама пингс тевонзон тиендисна Артём Здунов Москуса васетькшнесь Россиянь культурань министрть Ольга Любимовать мархта

15 февральста Москуса ульсь РФ-нь культурань министрть Ольга Любимовать и
МР-нь Оцюнять аф лама пингс тевонзон тиендиснон Артём Здуновонь рабочай
васедемасна. Васедемаса главнай кизефксокс ульсть велень Культурань клубонь
строямась и уликснень петемасна, а стане жа региононь культурань
учреждениятнень эса кинозалхнень оборудованиясна.
«Велень Культурань клупне ломаттненди эрявихть. Минь фалу кирттяма соткст
региональнай власттнень мархта и ваттама ня объекттнень эса сяда тов тевонь
мольфтемать мельге. Тя тейнек эряви, сяс мес од площадкань панжемась и
уликснень петемасна панчсихть ки ломаттнень творческяй маштомошиснон
виияфтомаснонды и мушендомс асуфнень»,—мярьгсь Ольга Любимова.
Эсь ширденза Артём Здунов азсь благодарностень валхт Россиянь Культурань
министерствать лемс Культурань куттнень строямаса лезксонкса и отмечазе, што
Мордовияти велетнень эса Культурань кудонь строямась—тевонь вятемань важнай
направлениясь.
18.02.2021  № 6
 
 

Ванондовсь инвесторхнень мархта экотехнопаркть строяманц коряс кизефкссь

Мордовиянь Оцюнять аф лама пингс тевонзон тиендисна Артём Здунов 3 февральста васетькшнесь «Террикон» компаниянь, кона тиенди кархчнень-ляткснень обработкаснон коряс объектт,  группать руководстванц мархта. Компаниясь Мордовиянь руководительти макссь ваномс экотехнопарконь, конанди сувси единай межмуниципальнай полигон и кархчень сортировандамань комплекс, строямать коряс проект.
Лятфтасаськ, «Экология» национальнай проектть эряфс ётафтомань рамкаса путф задача кирьфтамс полиготтнень эса кархчнень калмамаснон лувксснон и кеподемс производственнай процесса вторичнай сырьять лувксонц тевс ноляманц. 2030 кизоти арьсекшневи пцтай сембе ляткснень кучсемс переработкас.
Артём Здунов педа-пес ванозе няфтьф проектть, конань эряфс ётафтомац арьсекшневи государственно-частнай партнерствань механизматнень вельде инвесторть эсь средстванзон лангс кредитнай ресурснень сувафтозь. Инвестициянь объёмсь лувондови 2,4 миллиард цалковайса, рабочай вастонь панжемась—250 ломаненди.
Артём Здунов шарфтсь башка мяль сянь лангс, штоба аф нолдамс тиф расчёттнень эса эльбятькст, проектть эряви няфтемс «Российский экологический оператор» компанияти, кона эряфс ётафнесы    ТКО-нень обработкаснон коряс государственнай программать.
11.02.2021  № 5
 

Тяфтама продукцияти ули вешфкс сембе вастова

Мордовия Республикань Оцюнять аф лама пингс тевонзон тиендисна Артём Здунов ульсь «Оптикэнерго» компаниятнень группаснон предприятиянзон эса, кона, 2020 кизонкса рейтинговай оценканзон результатонзон коряс, лувондови лидерхнень эзда фкясь республикань промышленнай предприятиятнень ёткса.
Сембоц компаниятнень группасост 22 предприятия, промышленнай направлениясь няфтьф «Сарансккабель-Оптика», «ЭМ-Кабель», «ЭМ-Кат», «ЭМ-Пласт», «Сармат» завоттнень мархта.
Мордовия Республикань Оцюнять аф лама пингс тевонзон тиендисна лац-ряц содафтсь предприятиятнень мощностьснон мархта, улемок компаниятнень группаснон производственнай сембе площадканзон лангса. Кода азондозе «Оптикэнерго»  ГК-ть директоронзон Советснон председателец Эвир Боксимер, предприятиятне обеспечендасазь потребительхненди кабельнай продукциять марнек производстванц комплексонц (катанка—пролоп—кабель—арматура подвесонди), тяка пингть 2020 кизоня инновационнай продукциять объёмоц ня предприятиятнень эса ульсь 80 процент ноляви изделиятнень марстонь объёмснон эзда. Холдингть кабельнай продукцияц пачфневи оцю госкорпорациятненди и ноляви тевс странань знаковай ламоц  объекттнень эса.
Республикать руководителенцты стане жа азондсь компаниятнень группаснон предприятиянзон эса корпоративнай культурать и работникненди дополнительнай социальнай гарантиятнень колга, конатненди сувафневихть работас и работаста служебнай транспортса питнефтома пачфнемась, пси ярхцамбяльса обеспечендамась, медосмотратне.
Сембоц компаниятнень группасост тяниень пингть работай 1700-та лама ломань, промышленнай направленностень предприятиятнень эса средняй заработнай платась 2020 кизоня ульсь 50 тёжянь цалковай.
Мордовия Республикань Оцюнять аф лама пингс тевонзон тиендисна стане жа ульсь «Оптикэнерго»  предприятиянь музейса, коса содафтсь компаниятнень группаснон историянц мархта и кадсь почётнай инжиень книгати тяштькс, арьсемок сяда тов лац-ряц работамс производственнай од платтнень ётафтомстост.
11.02.2021  № 5
 

Мордовияв рабочай визит мархта сашендсь Россиянь промышленностень и торговлянь министрсь Денис Мантуров

5 февральста Мордовияв рабочай поездка мархта сашендсь РФ-нь промышленностень и торговлянь министрсь Денис Мантуров. Ведомствань руководительсь, конань мархта сотрудничендамань сотксонь кирдемась пяк эряви республикати социально-экономическяй ширде виияфтоманкса, макссь питне республикать промышленнай потенциалонцты, панчсь од производственнай линия «Биохимик» заводса, содафтсь региононь инголи моли предприятиятнень продукцияснон мархта и ванозень МР-нь Оцюнять аф лама пингс тевонзон тиендиснон Артём Здуновонь мархта промышленностень и торговлянь сфераса марстонь  проекттнень эряфс ётафтомаснон коряс кизефкснень.
Мордовияса министрть рабочай программанц васенце пунктокс арась «ВКМ-Сталь» заводсь—Россиянь инголи моли металлургическяй комплексонзон  эзда фкясь, кона заняф машина кинь, автомобильнай и нефтегазовай отраслятненди, велень хозяйствати литьень нолдамаса. Предприятияса Денис Мантуров ванозень производственнай линиятнень.
Вагоннай литьянь производствать коряс «ВКМ-Стальсь» сувси Россияса инголи моли колмотнень ёткс. 2020 кизоня нолдаф 48 тёжянь тонна товарнай продукция, оцю вагоннай литьянь производствань объёмсь ульсь 10 тёжяньда лама вагонокомплект. Ноляви продукцияти лувкссь несколька кизоста кассь 30-ть эзда ушедомок 500-ти  молемс.
Холдингть Президентоц Константин Данилов азондсь литейнай производствать одкстоптомань васенце этапонц меля шумордаманц колга, нолдавсь тевс тяниень пингонь электродуговой сталеплавильнай пянакудсь, конань ёмкостец—16 тонна.
Азфоль, што модернизациянь программась сяда тов кармай мольфтевома мелкай и средняй литьянь нолямать коряс мощносттнень касфтоманкса. Тянь инкса  панжеви пцтай 500 рабочай од васта. Проектнай мощностьс лисемась арьсекшневи 2024 кизоня, инвестициянь объемсь—3,7 миллиард цалковай.
Тевс ноляви технологиятненди вийс коре цебярьгофтомс трудонь условиятнень, сяда касфтомс производствать экологическяй ширде  арукс улеманц. Кепотьксонди, 2020 кизоня путф 20 миллион питнеса кожфонь аруяфтомань системась аруяфнесы кожфть  тяфта лемневи «рдазу» металлургическяй производстваса.
Башка токсевсь производствать диверсификациянц и кадратнень коряс темась. Денис Мантуровонди азондозь, кле, профессиональнай металлургонь анокламань системась ладяф ни несколька киза и тяниень пингть вузса тонафнемать пингста кочксевихть асу цёратне  и аф аньцек минцень регионцтонк. 
«Ушеткшнеськ кадрань кочкамать несколька кизода инголе кафта профессиональнай металлургста, тяни ни анокламе 50 специалист, и нинге кемоттне аделасазь тонафнемаснон тядде»,—мярьгсь «ВКМ-Стальть» управляющай директороц Николай Чалов.
Предприятияса средняй зарплатась 42 тёжянь цалковай.  «ВКМ-Стальсь» сувси республиканскяй 10 предприятиятнень ёткс, коса пандови ломаттненди оцю зарплата.
11.02.2021  № 5
 

Евгений Алушкин: «ТЕЙНЕ АШ КОДА ЛЯДОМС ШИРЕСА»

Россияса коронавируснай инфекцияса васенце сярядись муфоль 2020 кизонь 31 январьста. Пцтай киза ни минь эрятама тя пелькс урмать мархта. Тяддень 20 январти ковидть мархта савсь васедемс Мордовиянь 15173 эряйти. Кода аф ужяль, 119 ломанць (стане жа 20 январти) ёткстост кулость урмать сюнеда.
Пандемиять пингста, шарьхкотьф, сембода стакаста сашендови медицинскяй работникненди. Ащемок, кода корхнихть, передовойса, синь шинек-венек эсь прянь аф ужяльдезь тюрихть урмать каршес. Сидеста врачне аф сатнихть, теест лездома сашендыхть    студенттне—сай пингонь докторхне. Фкясь синь ёткстост од цёрась, Н.П.Огаревонь лемса МГУ-нь Медицинскяй институтонь тонафнись Евгений Алушкин. Аф фкя ков ни сон работай 5№ Республиканскяй клиническяй больницяса, кона пандемиять ушетксста ётафтфоль ковиднай госпиталенди, лиякс мярьгомс, тяса тяни пчкафневихть коронавируснай инфекцияса сярядихне. Аф кунара Евгениень мархта удалась корхнемс минь корреспондентоньконди. Сон азондсь аф тёждя тевонц колга, кода ётни рабочай шиц, мезсь сембода стакась и кода вятьсазь пряснон сярядихне.
04.02.2021  № 4
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин