Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Тема дня

Корхтамась ульсь оцю и эрявикс

Заметкат республиканскяй СМИ-нь главнай редакторхнень мархта васедемаста
17 февральста Республикань Кудса Мордовиянь Оцюнять аф лама пингс тевонзон
тиендисна А.А.Здунов васетькшнесь республиканскяй  ведущай СМИ-нь главнай
редакторхнень и федеральнай изданиятнень—ТАСС-ть, «Российскяй газетать» и
«Комсомольскяй правдать» представительснон мархта. Корхтамась ульсь панжада,
деловой. Кепсевсть республикать эряфста тячиень инь эрявикс, инь таколфты
кизефксне.
Васенцекс кепотьфоль регионца ёмла зарплатать колга оржа темась. И
пуромфнень мяльсноль содамс: кода кармай решандакшневома тя проблемась.
—Минь аф весть ванондоськ тя таколфты кизефксть, и курокста, эзкиге сонь аф
решандасак,—мярьгсь Артём Алексеевич.—Эрявксты пинге семботь лац-ряц ваномс,
арьсемс, лама ширдень решениянь примамс. Аф случайна тяни арнян республикань
райоттнень эзга, ванондсайне предприятиятнень работаснон, корхнян
собственникнень мархта, сотцеса кода вятеви бизнессна.
Ся предприятиятнень эса, коса ёмлат зарплататне и ули пелькс синь аф
пандомаснонды, тяни мольфтихть работа баланснай комиссиятне. Бюджетнай
сфераса стане жа тянь ширде тонафневи-сотцеви ситуациясь. И государственнай
службасовок. Тясовок ули мезень лангса арьсемс.
Оцюволь интерессь кадрань од конкурсти, кона ётафтови республикаса. Кодама
стадияса тя проектсь ащи? Мезьса сон лия тяда ингольдень конкурснень коряс?
А.А.Здунов пачфтезе, што кадрань од конкурссь ётафтови «Россиянь лидерхне»
конкурсть правиланзон коряс, и тя тевса тейнек максови лезкс Россиянь
Президентть Администрациянц ширде. Конкурссь ащи несколька этапста. И пяк
важна, штоба сонь колганза сяда келиста азондоволь республикань СМИ-тнень
эса. Васенце этапсь—заочнай, заявкань примамась. Сон курок ушедови. Учсеви
тёжятть заявка, тяконь лувксса ся земляконьконь эзда, конат эряйхть Москуса,
странань лия региоттнень  эса. Сяльде кармай омбоце этапсь—очнай. Сон
ётафтови Мордовияса. Тя конкурссь эсь лацонне и  сянь мархта, што аноклаф ни
должностень списка, конатненди кармайхть терневома сембода лац эсь прянь
няфти конкурсанттне, инь достойнай кадратне.
Васедемаса стане жа корхтавсь оцю объекттнень строямаснон шумордамаснон,
историческяй памятникнень ванфтомаснон, туризмать виияфтоманц колга.
Кепотьксонди, ламотнень мяльсноль содамс, арьсекшневи ли тиемс реконструкция
Саранск ошень инь кунардонь, инь ташта церькавти—Иоанно-Богословскяень лемса
храмти. Тя кизефксть лангс ответонь максомда инголе Артём Алексеевич пара
мяльса азозе, што тя храмсь теенза мала, тяса сон кстиндафоль. А сяльде
поладозе: кле, тя храмть, православнай значениянь культурнай наследиять,
ванфтоманц колга корхтамась кармай мольфтевома миньцонк Владыкать мархта
васьфтемать пингста. Арьсекшневи тя кизефксть кеподемс федеральнай
уровеньца. Кода курокста тя лиси—няфтьсы пингсь.
Апак юкстаколь пуромксса и спортсь. Журналисттне кизефнесть, мрдафтови ли
меки Мордовияв спидвейсь, кодама кармай сяда товолдонь судьбац «Мордовия
Арена» стадионть и стак тов.
Республиканьконь вятиец азозе, што ётафтовихть показательнай  мероприятият,
штоба лацкас содамс, конашкава ломаттне учихть спидвейть мрдаманц эса. Сяда
стакаста ащи кизефкссь профессиональнай футболть мархта. Профессиональнай
команда тейнек эряви. Но тячи тя аф ащи васень очередень задачакс, а вов
стадионть мархта, конешна, ащи.
Национальнай и районнай изданиянь представительхне корхтасть эсь таколфты
кизефксснон колга.
СМИ-тнень мархта васенце васьфтемать песта республикань Оцюнять аф лама
пингс тевонзон тиендисна А.А.Здунов азозе:
—Тейне оцю честь и кафтонь-крдань оцю ответственность работамс Мордовияса.
Вдь мон сань эсь ширезон. Тястоннет  тядязень мархта алязе. Тяза калмафт
атяне-бабане. Нят монь родной вастоне…
И ёфси меколи сон азсь предложения: журналист-тнень мархта тяконь лаца
васьфтемат ётафнемс сяда товга.

25.02.2021 №7
 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин