Поиск по сайту:

Архив

Мокшане о мокшанах

Ёмла родинась вайме эжни фалу

Велеса шачф-касф эрь ломанць, арьсян, оцю кельгомаса фалу лятфни ёмла

родинанц колга, кона лихтезе сонь эряфонь кити, конанди сон фалу лажаткшни

и, кда ули ётка пингоц, эряскоды вели—раднянзонды или ялганзонды инжикс,

престольнай праздникс, а кой-коста и ёфси туфталфтома, сяс мес шачема ширесь

уски фалу.
Рузаевскяй районца ули Мокшень Пишля веле. Ащи сон Пишля ляйть лангса.

«Пишля» валсь мзярда-бди эвондась пяше и ляй кафта валхнень эзда. Эста ляйть

трваванза кассь лама пяшеда.
Кда варжакстомс историяти, содави, Пензенскяй губерниянь населённай пунктонь

спискатнень эса 1869 кизоня Мокшень Пишлясь казённай велель, эсонза

лувондовсь 170 малава куд. Архивнай документтнень эса Мокшень Пишлясь

лятфневи 1640 кизоня ни. Тястонь ломаттне касфнесть жуватат, витцесть сёра,

заняфтольхть торгавамань-мишендемань и ремесленнай тефнень мархта.
Мокшень тя велесь кармась сяда виияма и касома эсонза поташнай заводть

строямдонза меле. Заводса оцюфтольхть пянакуттне. Эсост плхневсть шужярь,

пенгат и палы лия ляткст. Тяфта получсевсь кальциень поташ. Меле эздонза

тиендевсь сапонь, сон нолявсь тевс клянцеконь нолямаса. Ламоц велеряйхне

работасть поташнай заводса и получсесть заработнай плата.
Мокшень Пишляса пцтай сембе куттне шуфтоннетольхть, вельхтяфтольхть

шужярьса. Крепостной крестьятт и помещикт ашельхть мзярдовок. Ульсть козя

оцю семьят, кой-конатнень эса эрясь 20-30 ломань и сембе—оцюнек-ёмланек

покодсть варьхмодемста сявомок шоподемс. Кой-коста козятне сивотькшнесть и

работникт.
Улема, эрь велеса, тяконь лувксса, и Мокшень Пишляса, оцю сембе тефне

ванондовсть марса. Ломаттне пуромкшнесть, мзярда эряви, и примсесть решеният

эрявикс кизефкснень коряс. Кой-коста марстонь тяфтама схоттнень эса тиендсть

эсь лацонь суд салайхнень, кальдяв ломаттнень лангса. Но целайнек велеса

эряфсь сетьмоль.
Коллективизациянь пингть велень колхозсь кармась каннема «Рузаевкань

Республикать» Президентонц А.П.Байкузовонь лемонц. Меле сон арась

совхозкс.
Мзярда аеркс врагсь апак учсек врьгятсь странаньконь лангс и ушедсь Великай

Отечественнай войнась, Родинаньконь аралама Мокшень Пишляста тусь кота

сядода лама ломань, а Сяськомань шида меле ашесть мрда пялесновок. Тюремань

паксятнень лангса шавфнень лемсна тяштьфт памятникти, кона ащи Мокшень

Пишляса.
Мекольдень кизотнень массовай информациянь средстватне аф весть пачфнесть

Мокшень Пишляса тястонь церькавть, конань лемоц храм Рождества Пресвятой

Богородицы, одукс панжеманц колга. Кой-кит тянь лемдезь афкуксонь чудакс.
Ужяль, но тяни Мокшень Пишляса аш школа, иттне тонафнема усксевихть Пайгарма

шабрань вели.
Тя велень эрь эряйсь содасы и маряй гордость Мокшень Пишляса учителень

семьяса шачфть-касфть, мокшэрзянь содаф писательть, журналистть Юрий

Фёдорович Кузнецовонь инкса. Лувсайть произведениянзон и сельминголет

эвондайхть ёмла родиназень ульцянза—Кячказ курнясь, Оцю велесь… Содасайть ся

ломаттнень, конатнень колга мялень салайста пачфни классиксь. Юрий Фёдорович

ванфтозень синь лемснон, прозвищаснон: Жобон, Бдой атя, Аблай и ламотне

лиятне. Ю.Ф.Кузнецовонь ламоц произведениянза улихть Мокшень Пишля велень

библиотекаса и лувихне сидеста сявондьсазь синь куду лувомс.
Мокшень Пишляса ули клуб, конань видеса лама кизода инголе пуроптфоль

«Лихтибряня» фольклорнай коллективсь и вов ни кафта кизот работай «Мастера и

рукодельницы» творческяй мастерскойсь, коса эрти ули кода варжамс виензон

кодамаса, стамаса, лия кядьтевса. Ужяль, коронавирусть сюнеда ламоц

платтнень савсь полафтомс, арьсеф пуромкснень ётафтомс онлайн-форматса или

кадомс лия пингонди. Машты кядь аватне и стирьхне сяда лама работайхть

кудса, но ванат фотографиятнень вельде няфтьф работаснон лангс и седице

кеняртькшни. Ваттака, конашкава асу ломатть эряйхть Мокшень Пишляса! Мяль

салси и клубть видеса уликс музейсь.
Мелянь сёксеть мокшень тя велеса строяфоль кинь од участка—сембоц 235 метра.

Кись поладозень Молодёжнай и Байкузовонь ульцятнень. Тяда башка, асфальтса

ацафоль седсь ся кить лангса, кона вяти велень церькавти.
Кода удалась содамс, ёфси курок Мокшень Пишляса панжеви модульнай ФАП, кона

пцтай анок ни.
Сембе тефнень мельге ваны Мокшень Пишля велень поселениянь оцюнясь,

мокшавась Н.Я.Панюшкина, кона лама кизода инголе сась тяза Зубово-Полянскяй

райононь Мордовская Поляна велеста и арась эсь ломанькс.
Вов тяфта и эряй ёмла родиназе—Рузаевскяй райононь Мокшень Пишля велесь.

Конешна, фкя материалса сембось пяк келиста аф азови, аф фатяви. Вдь эрь

велеть козя историяц, ули мезе азондомс и тячиень шинц колга. Сяс

журналистонь блокнотсон Мокшень Пишлять колга тяштьф аф кржа. Тя и арай

ушетксокс лия материалненди.
Т.Альшина.

25.02.2021 №7

НОВОСТИ

Артём ЗДУНОВ: «ВАКЦИНАЦИЯНЬ ТЕМПНЕ ЭРЯВИХТЬ КАСФТОМС!»

МР-нь Оцюнять аф лама пингс тевонзон тиендисна Артём Здунов 9 апрельста ВКС-нь режимса ётафтозе коронавируснай инфекциять инголдаманц и келемоманцты кить персеманц коряс оперативнай штабть заседаниянц. Ванондовсть эпидемиологическяй уликс ситуациять, COVID-19-ть эзда вакцинациять ётафтоманц, здравоохранениянь региональнай системать работань вятеманц, санитарно-эпидемиологическяй вешфкснень мельге контролень мольфтемать коряс кизефксне.

15.04.2021 № 14

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

15.04.2021 № 14

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

7 апрельста республикать столицаса С.Д.Эрьзянь лемса изобразительнай искусствань республиканскяй музейса ётафтовсь «Мокшэрзянь мифология» энциклопедиять презентацияц.

Тя академическяй трудть пцтай 20 кизоста аноклазь Мордовия Республикань Правительствать видеса гуманитарнай наукань НИИ-нь и республикань лия инь содаф учёнайхне, а тяфта жа художникне, редакторхне и техническяй сотрудникне. Энциклопедияти сувась мокшэрзянь народонь национальнай мифологиясь, кона эвондась аф фкя тёжянь кизода инголе и кона эряй модать лангса лама-лама тёжянь киза.

«Мокшэрзянь мифология» энциклопедиясь нолдаф 300 экземплярса, конатнень эзда 280 экземплярсь максф Российскяй Федерациянь государственнай, образовательнай организациянь и научнай учреждениянь библиотекатнень фондс.

15.04.2021 № 14

МОРДОВИЯСА СЯСЬКОМАНЬ ШИТИ 10 ТЁЖЯНЕНЬ ЦАЛКОВАЙ ПОЛУЧАЙХТЬ ВОЙНАНЬ УЧАСТНИКНЕ И ИНВАЛИТТНЕ

РФ-нь Президентть 2019 кизонь 24 апрелень 186№ Указонц коряс, Сяськомань шити 10 тёжятть цалковай эрь кизонь пандома получайхть Великай Отечественнай войнань участникне и инвалиттне. Мордовияса ня средстватне пандовихть апрельста ни пенсиять мархта графикс коре.

Пенсионнай фонду специальна пшкятькшнемс тя пандомать коряс аф эряви, ярмакне максовихть документтнень коряс, конат улихть ПФР-са.

Мордовияса Победать 76 кизонь топодеманцты тя пандомать получасы 120 ветеранць—тя Великай Отечественнай войнань 29 инвалид и 99 участник.

Тячиень шити пандоматне ни ушедовсть.

15.04.2021 № 14

УШЕДСЬ "ВЕСНА-2021" ПРИЗЫВНОЙ КАМПАНИЯСЬ

2 апрельста Саранскяйса Мордовия Республикань Пресс-центраса ётафтовсь пресс-конференция, коса Мордовиянь военнай комиссарсь—полковниксь И.В.Тихомиров, граждаттнень военнай службав тердемаснон коряс отделонь начальниксь—подполковниксь А.В.Антонов и военнай службав контрактс коре кочкамань отделонь начальниксь—майорсь А.Ф.Валиуллов азондсть журналисттненди «Весна-2021» призывной кампаниять республикаса ётафтоманц колга.

08.04.2021 № 13

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

08.04.2021 № 13

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

08.04.2021 № 13

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

«Федерациянь субъекттнень финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

08.04.2021 № 13

ПАССАЖИРОНЬ УСКСЕМАНЬ МАРШРУТТНЕНЬ ЛАДЯМСТА СЯВОНДЕМАТ МЯЛЬС ЛОМАТТНЕНЬ ВЕШФКССНА

МР-нь Оцюнять аф лама пингс тевонзон тиендисна Артём Здунов 27 мартста ётафтсь республикань райоттнень эса автобуснай маршруттнень эзга пассажирскяй перевозкатнень виияфтомаснон коряс совещания. Тяда инголе республикань руководительсь мярьгондсь МР-нь Строительствань, транспортонь и дорожнай хозяйствань министерствати тиемс анализ межмуниципальнай и муниципальнай маршруттнень эзга перевозкатнень ладямаснон коряс уликс системати и азомс синь цебярьгофтомаснон коряс предложения.

01.04.2021 № 12

КАЗНЕТ И ЛЯМБЕ ВАЛХТ—КУЛЬТУРАНЬ РАБОТНИКНЕНЬ ЛЕМС

25 мартста профессиональнай эсь праздникснон Россияса отмечазь сят, кит эрь шинь тевснон мархта каннихть кенярдема, пара мяльхть, ваймонь лямбоши и эрьгя лиятненди—культурань работникне.

01.04.2021 № 12

Учредительхие:

Мордовия Республикань Государственнай Собраниясь и Правительствась;

Главнай редакторсь: И. С. Лушкин

Сайт разработан в студии web-дизайна
Филиал в Республике Мордовия ОАО "ВолгаТелеком".