Мордовскяй книжнай издательствать генеральнай директороц, «Мордовия Республикань Народонь ялгаксшинь куд» общественнай организациять руководителец, филологическяй наукань кандидатсь Р.И.АКАШКИНА: «РАБОТАНЬКЕ ЛАТЦЕВИ ПИНГТЬ ВЕШФКСОНЗОН КОРЯС!»

Минь справканьке: Тядде 5 февральста Мордовскяй книжнай издательстваса полафтсь руководствась. Акционернай обществань генеральнай директоркс арась Раиса Ивановна Акашкина.

Сон шачсь 1975 кизонь 10 октябрьста Мордовиянь Инсарскяй райононь Мокшень Паёвка велеса. Аделазень Н.П.Огарёвонь лемса Мордовскяй государственнай университетонь филологическяй факультетть и аспирантурать. Специальностьс коре Р.И.Акашкина «Филолог», «РФ-нь народонь кялень (финно-угорскяй и самодийскяй кяльхне)» преподаватель, филологическяй наукань кандидат.

Р.И.Акашкина работась преподавателькс Н.П.Огарёвонь лемса Мордовскяй государственнай   университетонь        филологическяй факультетса, национальнай образовательнай политикань специалистокс МР-нь Образованиянь министерстваса. Сяльде вете кизот ульсь директоркс Финно-угорскяй народонь культурань Поволжскяй центраса, тяка пингть улемок «Финно-угорская газета» общероссийскяй изданияти главнай редакторкс. Тя пингс сон тяфта жа вятьсыне тефнень Мордовия Республикань Народонь Ялгаксшинь кудса.

2021 кизонь 5 февральста Р.И.Акашкинась путф Мордовскяй книжнай издательствав генеральнай директоркс.

Газетаньконь тячиень номерсонза сон азонды лувиеньконди эсь  планонзон колга.

—Кода содаф, Мордовскяй книжнай издательствась Мордовияса работай 1932 кизонь 19 апрельста сявомок. Сяс, койсон, ули кода азомс: сон Мордовия Республикать ровесникоц, кона эсь пара тевонзон вельде лездсь республикати и сонь народонзон письменнай культураснонды касомс и вииякшнемс.

Васенце вастса, конешна, издательствать тевса ащесть мокшень и эрзянь кяльхнень ванфтомасна и виияфтомасна. И тяфта жа—васенце произведениятнень, конат сёрматфтольхть мокшень и эрзянь кяльса, лувихненди башка книгань, альманахонь и коллективнай сборниконь форматса пачфтемасна. Тяка вешфксне-задачатне ащихть издательствать инголе тячивок. Но, синдедост башка, пингсь инголенк путни од вешфкст-задачат, конатнень эряфс ётафтомасна, койсон, лихтьсы издательствать работанц од уровеньц.

Лиякс мярьгомс, издательствать тяда ингольдень работаста минь сявсаськ инь цебярть, пяшкодьсаськ сонь од мяльса-ванфса и эрьгавста карматама тиемонза ся тевть, кона эряви вятемс-тиемс Мордовскяй книжнай издательствати.

—Раиса Ивановна, кодама од вешфкст-задачат путсь Мордовскяй книжнай издательствать инголе тячиень пингсь?

—Кода содаф, тячи пцтай сембе федеральнай книжнай издательстватне келиста ноляйхть художественнай и лия литература электроннай форматса. И тейнек, Мордовскяй книжнай издательствати, сась пинге маштозь кярьмодемс тя тевти.

Койсон, электроннай форматонь учебникнень вельде тейнек ламода сяда тёждя кармай пяшкодемс школатнень вешфксснон. Сембода пяк Россиянь лия региононь школатнень вешфксснон, коса тонафневихть мокшень и эрзянь кяльхне. Тяфта жа электроннай форматть вельде тейнек ламода сяда тёждя ули пачфтемс мокшень и эрзянь поэттнень, прозаикнень произведенияснон Россиянь сембе мокшэрзятненди.

Сембе ня электроннай книгатне кармайхть лихтьфт-путфт издательствать сайтс. И ёткстост эрь лувись мусы ся учебникть, тонафнемань пособиять, картинань или скульптурань альбомть, поэзиянь или прозань изданиять, кона теенза эрявкстсь.

—Раиса Ивановна, кода издательствась кармай латцема тевонзон од поэттнень и писательхнень мархта, конат сёрмадыхть мокшень или эрзянь кяльса?

—Кода минь шарьхкодьсаськ, Мордовскяй книжнай издательствась эсь продукциянц вельде ванфтсыне, касфтсыне и виияфтсыне мокшень и эрзянь кяльхнень. Сяс минь карматама вятема башка работа од поэттнень и прозаикнень мархта.

Тяда башка, арьсекшневи пуроптомс Мордовскяй книжнай издательствать перьф мокшэрзянь, рузонь и лия народонь творческяй содаф интеллигенциятьке. Тяфта тиемс, койсон, эсонк кошарды пингсь, кона няевиста тячи келептезе Мордовскяй книжнай издательствать инголе ащи задачань лувксть.

Синь пяшкодемаснон инкса издательстваса арьсекшневи панжемс «Васедема» лем ала литературно-культурнай гостинай. Ня васедематнень пингста мокшэрзянь, рузонь и лия народонь поэттне, писательхне, культурань, общественнай деятельхне кармайхть содафтома фкя-фкянь эсь произведенияснон и тевснон мархта, конатнень синь тисазь Мордовиянь культураса и общественнай эряфса.

Тя работати арьсекшневи сувафтомс Мордовия Республикань Народонь ялгаксшинь кудть, Сире Теризморгань и     республикань лия национально-культурнай центратнень работань опытснон и потенциалснон. И, тяда башка, «Васедема» литературно-культурнай гостинайть работанц итогонзон коряс, кизоти весть кармай нолявома литературно-художественнай альманах. Тоса максови сатомшка оцю васта мокшень и эрзянь од поэттнень и писательхнень произведенияснонды.

Тядде тяфта жа арьсекшнетяма Мордовскяй книжнай издательствать видеса панжемс книжнай лавка, коса,       «Масторава» фирменнай книжнай лавкада башка, кармай мишендевома издательствань продукциясь. И, конешна, эреклафтови и эрьгавста кармай вятевома грантонь сатомать коряс работась.

—Удаласт, Раиса Ивановна, сембе арьсеф тевонте.

—Сюкпря. Койсон, издательствань коллективти удалай вятемс-тиемс сембе тевонзон пингть вешфксонзон коряс!

В.НЕСТЕРОВ.