МОРДОВИЯНЬ СТУДЕНЧЕСКЯЙ ОТРЯТТНЕ—ФКЯ ИНЬ ЦЕБЯРЬХНЕ МАРНЕК СТРАНАСА

17 февральста—Российскяй студенческяй отряттнень шисна. Аф ваномок эсь пяле векта кувака историянц лангс, движениясь ингольцекс келиста содаф од ломаттнень ёткса. Тячи «Российскяй студенческяй отряттне» организациясь пуропни пцтай 240 тёжянь од стирь и цёра.

Эрь кодама пингста движениянь участникокс ульсть Россиянь Президентсь В.В.Путин, РФ-нь омба масторонь тевонь министрсь С.В.Лавров, Москувонь мэрсь С.С.Собянин, писательсь-сатириксь Михаил Задорнов, «Уральские пельмени» КВН-нь командань члеттне и лама лия содаф ломань.

Студенческяй отрядонь движениясь пуропнесыне марс стирьхнень-цёратнень, конатнень ули мяльсна работамс тонафнемать эзда ётка пингста. Отряттне работайхть эрь кодама направленияс коре. Улихть, кепотьксонди, велень хозяйствань, педагогическяй и нльне путиннай отрятт, конат заняфт калонь кунцемаса и теест переработкань тиемаса.

Россияса пуроптф 74 региональнай студенческяй отряд. Ули тя движениясь минь республикасонковок, и теенза тядде топодсь ни 55 киза. Ня шитнень корреспондентоньке васетькшнесь Мордовиянь студенческяй отряттнень командирснон Алексей Нагинонь мархта, кона пара мяльса азондсь организациять тевонзон колга.

—Алексей, эрь варжаксстама историяти и лятфтасаськ, мзярда регионцонк пуроптфоль васенце студенческяй отрядсь.

—Тя ульсь 1966 кизоня. Движенияти ушетксонь путыкс арась Мордовскяй госуниверситетсь. Сонь видесонза пуроптфоль васенце студенческяй отрядсь. 1966 кизонь 1 июльста целинав тусь республикань васенце студенческяй строительнай отрядсь, коза сувсесь 56 од ломань. Университетонь  студенттне эста прважафтольхть Северо-Казахстанскяй областень Пресновскяй району. Кафта ковста стирьхне-цёратне тисть отделка 12 квартирань кудти, строясть щитовой общежития, перень сёронь ванфтомань васта, ладясть 94 вайгяльбень кувалмоса связень линия, капитальнайста петезь траксонь кирдема вастть, тисть поталаконь перекрытия и куцеманят ресторанца-кафеса. Марнек Советскяй Союзста целинав пуромф отряттнень ёткста Мордовиянь стройотрядсь эста сатозе 5 вастть.

Н.П.Огарёвонь лемса МГУ-нь историянь музейса ванфтовсь отрядонь командирть Анатолий Кондратьевонь отчетоц—кядьса серматф кагод пакшкясь, коса азфт пяшкотьф сембе работатне. А нинге—газетаста объявлениясь, коса пачфневи васенце студотрядти од стирень-цёрань кочкамать колга. Тя объявленияса сёрматфоль и отрядть девизоц: «На молодости—главные дела!»

—Студенческяй отряттне тячи—кодамот синь? Мезьса заняфт, кит эзост сувсихть?

—Тяниень пингть республикаса лувондови 89 отряд, коза сувси 1900 стирь и цёра (стирьда сяда лама). Синь лемневихть  студотрядонь боецокс. Отряттне работайхть 7 направленияс коре. Нят строительнай, научно-производственнай, педагогическяй, медицинскяй, велень хозяйствань и механизированнай, сервисонь и гостеприимствань, проводниконь отряттне. Лувксс коре инь оцюфт педагогическяй отряттне. Сембоц Мордовияса 36 студенческяй педотряд, коза сувси тёжяньда лама ломань. Сембода «одсь»—медицинскяй отрядсь. Сон пуроптфоль аньцек кафта кизода инголе.

Шарьхкотьф, республикань студотряттне занцихть пря эрь кодама тевса аф аньцек Мордовияса, но и странань ламоц лия региоттнень эса—Пензенскяй, Московскяй, Ульяновскяй, Рязанскяй, Челябинскяй, Ростовскяй областтнень эса, Краснодарскяй крайса, Татарстан, Крым Республикатнень эса, а стане жа омба масторса—Турцияса, Болгарияса, Грецияса, Кипраса.

—Мярьктяма, фкя ковста мзяра ярмак ули кода добувамс студентти?

—Рузкс мярьгомс, сембода прибыльнай направлениясь—проводниконь отряттне. Фкя ковста проводникненди ули кода добувамс 30 тёжяньда лама цалковай. Уленди, колмоце трудовой семестраньберьф (кизонь каникулатнень пингста) студенттне-проводникне добувакшнихть 120-130 тёжянь цалковай. Тяка пингть, эряви азомс, ня ярмакне пандовихть теест аф стак, тевсна проводникнень аф теждяттнень эзда. Тяса Саранскяйста Москуву ардомста ни сизят, а теест апак ваймосек сашендови ётафнемс поездса аф фкя ков.

Инь кржась, улема, пандови педагогическяй отрядонь боецненди, лиякс мярьгомс, од ломаттненди, конат занцихть пря вожатаень тевса. Ковонь зар-платасна синь аф «минималкада» лама. А кда сменась лагерьса моли, мярьктяма, аф ков, а 21 ши, эста студентть-вожатайть добувафоц кармай аньцек 8-9 тежянь цалковай.

—Аф ваномок тянь лангс, сембода лама од ломаньда лувондови педагогическяй отряттнень эса. Лисенди, студенттне кочксесазь синь аф аньцек финансовай ширеть мяльса кирдезь.

—Студенческяй отряттне—тя эряфонь цебярь школа. Тяса получаф содамошитне, тя или тона тевса козя опытсь лезнихть од стирьхненди-цёратненди сяда тёждяста мумс эряфса эсь вастснон вузть шумордамдонза меле. Теест сяда тёждя мумс покодема васта, работамс коллективса, мушендомс марстонь кяль ломаттнень мархта.       Студотряттне макссихть козя опыт управленческяй тевса. Кепотьксонди, од ломанць сась ширезонк 18 кизоса, лац няфтезе прянц и 19 кизоса ни теенза ули кода арамс отрядонь командиркс и сонь подчинениясонза кармай 25-30 ломань. Тя фалу сявондеви мяльс работама примамста, башка, кда мяльце занямс руководителень васта.

—2020 кизось, кода содаф, эсь лацоннель, ламотненди савсь васьфтемс аф кржа прябала мархта. А кодамоль сон республикань студотряттненди?

—Пандемиясь минь инголенковок эвондафтсь аф кржа тапоркста. Васендакиге стакаста савсь строительхненди и педотрядонь вожатайхненди. Ограничительнай мератнень сюнеда марнек странать келес катфоль пяк кржа идень лагерьда. Аньцек кой-кона студенттненди удалась лисемс работама Моску алдонь, Краснодарскяй краень, Крымонь лагерьхненди. А вов «Олимпия» легендарнай строительнай отрядти, кона аф весть примсесь участия Всероссийскяй студенческяй стройкаса, молемс ашель коза. Сянкса медикненди тевда сатомшкаль, тяконь лувксса ковиднай госпитальхнень эса. Тяда башка, Медицинскяй институтонь студент-тне кенерсть работамс «Академия» Всероссийскяй студенческяй медицинскяй отрядть лувксса. «iMedic» отрядонь 5 боецне кизонда якасть Новосибирскяи, коса работасть областной клиническяй больницяса санитаркс и медсестракс.

Целайнек, мярьгомс, што 2020 кизось республикань     студотряттненди кальдяволь, аш кода. Лама вий и пинге максфоль проектнай тевти и аф шавос. Тяфта, кепотьксонди, «iВолга» форумса минь няфтеськ вете проектоньконь и ветецьке сатсть грантт. Марса водендаф 3 миллионда лама цалковай.

—Алексей, кода Мордовиянь студенческяй отряттне няевихть лия региононь        студотряттнень эшксса?

—Азолине тяфта: тейнек ули мезьса шнафтомс пря. Тяфта, 2020 кизонкса студенческяй отрядонь региональнай отделениятнень (сембоц эздост 74) рейтингсост Мордовскяй региональнай отделениясь занязе колмоце вастть. 2019 кизоня Саранскяй кооперативнай  институтонь «Единение» студенческяй отрядсь лиссь сяськикс «Россиянь инь цебярь студотрядсь» конкурсса. Мекольдень кота кизотнень минь най сувселеме вете инь цебярь студенческяй отряттнень лувксс и вов тяни минь васенцетне. Педагогическяй отряттнень еткса сембода престижнай пялькстомакс лувондови «Лига вожатых» конкурссь, кона етафневи «Образование» национальнай проектть мяльса кирдезь. Минь вожатаеньке эрь мезне сувсихть конкурсонь финалисттнень лувксс.

—Тяддесь юбилейнай киза Мордовиянь студотряттненди: кода арьсекшнетяда ётафтомс сонь?

—Тядде минь сатоме грантовай лезкс «Лес РСО» проектть эряфс етафтоманкса. Проектть мяльса кирдезь республикать территорияса озафтови 55 тёжянь шуфтоня. Касыкскятнень, конат кармайхть лятфнема юбилееньконь колга, арьсекшнетяма озафтомс аньцек сайхть тундань лямбе шинятне. Тяда башка, мяленьке пуроптомс тематическяй выставкат республикань музейхнень, вуснень эса. Тяни ни пуроптф фотовыставка Сити-паркса. Ули оцю мяленьке, штоба Саранскяйса одс строяви ульцятнень эзда фкяти максоволь студенческяй отряттнень лемсна, а стане жа ошса панжеволь памятнай доска. Улихть арьсемат сянь коряс, штоба кемокстамс ведомственнай казне студенческяй отряттнень виияфнемаснонды оцю путксонкса. Юбилейти лемтьф торжественнай мероприятиять арьсеви ётафтомс сёксенда, 3 сентябрьста.

Кода няеви, мяльдонк-арьсемадонк лама, пяшкодеви-аф сембось—няфтьсы пингсь.

—Спасиба, Алексей, корхнеманкса!

О.ЕВДОКИМОВА.