Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Тема дня

Мазы кяленьке, пяк мазы!

Эвфнихть эсот,
            мокшень кяльняй,
Корхтайхть: курок тон
                                        юмат.
Кда содалезь монь
                               мяльнень,
Кода седизон сувать!
          Н.Журавлёва.
Шачень Ковылкинскяй райононь Рыбкина велеса, кона пяк оцю, мазы и цебярьдонга цебярь. Лац маштан корхтама рузкс и мокшекс, но мокшень кяльсь сяда мялезон, сяс мес сон родной кялезе. Аф стак мокшень фкя валмуворксса корхтави, што родной валсь тядянь кяльбряста валгсь.
Мокшень кяльсь финно-угорскяй кяльхнень эзда фкясь. Мокшень кяльса корхтай лама ломань, конат эряйхть Мордовияса и лия вастса. Лувондан лама стихотворения и азкс, конатнень сёрмадозь мокшень и эрзянь поэттне и писательхне. Пяк тусть мялезон К.Г.Абрамовонь «Пургаз», И.М.Девинонь «Нардише» романцна. Пара мялезон, што Рыбкина велеса шачсь писательсь С.И.Родькин. Рыбкинать колга сёрмадсь и Т.И.Кидряшкин «Кели Мокша» романцонза.
Поэттне и писательхне тонафтсамазь мокшень кяльть кельгома и содама:
         Мазы кяленьке, пяк
                                 мазы
Тундань варьхмодема
                                   лаца,
Кода питни-питни
                                 казне,
Кода марлю панжи
                                 садса.
                    Е.Пятаев.
 
Народть сембе историяц, материальнай и духовнай козяшиц кемоста сотфт родной кяльть мархта. Сон няфнесыне сонь  мялензон-арьсеманзон,  коензон-обуцянзон, эряфонц,  культуранц.
Ламотне мес-бди виздихть мокшекс корхтамаснон, но, тейне-арам, эсь кялень юкстамась—тя бта эсь тядянь юкстамась. Аф эряви виздемс, а, мекпяли, содама эсь питнеце, сяс мес рузоннеда башка нинге кафта-колма или сяда лама кяль содат. Фкя учёнайсь мярьгсь: «Мзяра кяль содан, снярксть ломанян». Сонь улихть тяфтама валонзовок: «Мордватне—народсь поэтическяй. А поэтическяй народсь машты и мазыста корхтама, и стихонь-моронь латцема».
Оцю мяльса лувондсайне «Мокша» и «Якстерь тяштеня» журналхнень. Бта ёфси исяк васьфнеме поэттнень Р.Орловать, П.Алёшинать мархта. Синь сашендсть школазонк инжикс  и лама азонкшнесть мокшень кяльть прябаланзон колга. Корхтамаснон эса марянь оцю пичефкс кяльть инкса. Вов мезе тяшти Рая Орловась «Мокшень кяль» стихотворениянц эса.
Минь васень валоньке
                     ульсь «авай»,
Сон мокшень ляпе
                  кяльса азфоль.
Тя кяльста валда шись
                            уставай,
Сон масторть мархта
               марса казьфоль.
Минь шачем кяленьконь
                       юмафтоськ.
Сонь срафтоськ
       масторбевань ошка.
И потмаксфтома
          лотку прафтоськ,
Аф шарьхкодьса-мезь
                 келусь тошкай.
                    Р.Орлова.
Эрь ломанти нежедема вастокс улеза шачема масторсь, родной кяльсь, родной культурась и родной историясь. Мзярда кельгсайть синь, ваймосот эвондай лия кяленди, культуранди и историянди кельгома.
Пяк кельгса мокшень кяльть. Сон аф юмай, а, мекпяли, виияй и кармай эряма векста векс. Сон суваф мокшень эрь ломанть седис и ваймос.
Д.Шиндяйкина.
Ковылкинскяй райононь           
      Рыбкина велесь.

25.03.2021 №11
 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин