Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Тема дня

Мокшэрзянь организациять Исполкомонц заседанияста

«ТЕЙНЕК МАРСТОНЬ ВИЙСА ЭРЯВИ ТИЕМС СЕМБОТЬ ЭСЬ МЕЛЬГАНК РОССИЯНЬ ФИННО-УГОРСКЯЙ ИНЬ ОЦЮ НАРОДОНЬ СТАТУСТЬ ВАНФТОМАНКСА!»
17 мартста Мордовиять столицаса ётафтовсь Мордовскяй (мокшень и эрзянь) народонь Межрегиональнай общественнай организациять Исполкомонц тя кизонь васенце заседанияц. Пингстонза Исполкомонь члеттне, конатнень эзда ламотне састь заседанияс Москуста, Санкт-Петербургста, Татарстан, Башкортостан Республикатнень эзда, Самарскяй, Пензенскяй областтнень и Российскяй Федерациянь лама лия субъектста, коса работайхть Межрегиональнай организациять отделениянза, ванозь инь няевикс кизефкснень, конат эрявихть пяшкодемс кизоть кувалмоста.
Заседанияса Исполкомонь члеттнень мархта тяфта жа работасть Мордовия Республикань Оцюнять аф лама пингс тевонзон тиендисна А.А.Здунов, республикань Оцюнять Администрациянц, Государственнай Собраниянь, Правительствань, Саранск ошень Администрациянь, высшай образованиянь учреждениянь, национальнай творческяй интеллигенциянь и печатнай изданиянь представительхне.
Мордовия Республикань Оцюнять аф лама пингс тевонзон тиендисна А.А.Здунов:
—Кельгома ялгат, теенть сембонди азондан сюкпря мокшэрзянь кунардонь и тяниень пингонь национальнай койхнень ванфтоманкса и виияфтоманкса!
Российскяй Федерациянь Президентсь В.В.Путин Государственнай национальнай политикать Стратегияса путсь инголенк стама задачат, конатнень пяшкодемасна няевиста виияфнесыне российскяй нациянь нароттнень национальнай культураснон и кяльснон. И тянь вельде нинге сяда пяк кемокставихть Россиянь лама национальностень народть ёткса межнациональнай, межкультурнай и лия лама ширдень сотксне.
Сембонди лац шарьхкодеви: любой народсь ванфтови эста, мзярда ванфтовихть сонь кялец и национальнай культурац. Тянь колга минь тяфта жа корхтаме республикань афкоммерческяй организациянь представительхнень мархта аф кунардонь васедемаса.
Тяка пингть, койсон, тейнек тячи ни эряви ушедомс аноклама эстейнек полафтыхть, конат мзярошка пингта меле кармайхть ванфтома, касфтома и виияфтома мокшень и эрзянь кяльхнень, мокшэрзянь национальнай культурать. Ня и сембе лия тефнень эса, конатнень минь карматама тиемост марса, сембось ащи эсь эздонк.
Кепотьксонди, тяддень сентябрьста странаса ётафтови Населениянь Всероссийскяй переписсь. Тейнек марстонь вийса эряви тиемс семботь мокшэрзянь народть Россиянь финно-угорскяй инь оцю народонь статусонц ванфтоманкса. Тя кизефксть коряс, арьсян, минь васеттяма мархтонт нинге аф весть.
Тяфта жа, койсон, минь марстонь работасонк сяда лама пинге и вий эряви максомс мокшень и эрзянь кяльхнень ванфтомаснонды и виияфтомаснонды. Ня кизефкснень пяшкодемста эряви сяда келиста нолямс тевс республикань вуснень научнай и школатнень тонафнемань потенциалснон, интернетонь и цифровой технологиянь лия ресурснень. Синь вельдест тейнек ули кода сяда курокста ладямс кеме соткст странань лия региоттнень эса школатнень мархта, коса тяфта жа тонафневихть мокшень и эрзянь кяльхне, мокшэрзянь национальнай культурась.
Оцю лезкс марстонь тевоньконь цебярьгофтомаснонды, койсон, тяфта жа максы «Монь Мордовиязе» кадровай конкурссь. Сонь вельденза минь пуроптсаськ Мордовияв сятнень, конатнень улихть руководителень оцю потенциалсна.
Нинге весть азондан оцю сюкпря тя мероприятиянь аноклайхненди, сонь кизефксонзон коряс тяса работайхненди. Кда ня сембе кизефксне тейнек малат и питнихть и аф ётнихть ваймоньконь вакска—эста синь марстонь вийса тейнек афкукс ётафтовихть эряфс!
Мордовскяй (мокшень и эрзянь) народонь Межрегиональнай общественнай организациять председателец, профессорсь Ю.А.Мишанин:
—Кельгома ялгат, Исполкомть тячиень заседанияса эрявихть ваномс кизефксне, конат ащихть Межрегиональнай организациять инголе и конатнень тейнек сави пяшкодемс кизоть кувалмоста.
Кда корхтамс мелянь работань итокнень колга, эряви азомс: коронавируснай пандемиясь сувафтсь работазонк тапоркст. Лама арьсеф мероприятия ладяф ограничениятнень инкса ашезь удала ётафтомс. Но тяка пингть эряви азомс: кой-мезе тиемс тейнек удалась.
Кепотьксонди, Пензенскяй областьса ётасть исполкомонь Президиумть выездной кафта заседаниянза. Васенцеса, кона ётафтовсь Белинскяй райононь Национальнай культурань центраса, вановсть этнокультураса    меценатствань коряс кизефксне. Омбоце заседанияса, кона ётафтовсь Пензань областной библиотекаса, марса Пензенскяй Правительствань и национальнай общественнай организациянь представительхнень мархта ванондовсь, кода нолявихть тевс Пензенскяй областьса мокшень и эрзянь кяльхне.
Тяфта жа лама цебярьда сувафтсть тевозонк «Волгась—ялгаксшинь ляй. Волжскяй народонь культуратнень диалогсна» Международнай этнокультурнай экспедициясь, «Морай шуфта» шуфтста керсиень Межрегиональнай конкурссь-фестивальсь, «Патриотизмань урокт», «Нациянь гордость», «Мордовия мастеровая» Межрегиональнай и республиканскяй образовательнай проекттне, конатнень тейнек удалась ётафтомс 2020 кизоня.
Меля оцю сатфксокс тейнек тяфта жа арась «Геройхнень колга мялямсь кулома аф содай» Всероссийскяй патриотическяй проектть эряфс ётафтомац, кона лемтьфоль легендарнай лётчикть М.П.Девятаевонь подвигонц 75 кизонь юбилеенцты.
Тя и лама лия проект Исполкомсь ётафтсь эряфс Президентскяй грантонь лангс. Аньцек мекольдень колма кизоста Межрегиональнай организациясь эсь проектонзон вельде сатсь 18000000 лама цалковай. И тя работать минь тяфта жа мольфтьсаськ тяддевок. Кепотьксонди, грантонь ярмак лангс Межрегиональнай организациясь нолдазе «Синь тюрсть Крымть и Севастопольть инкса» книгать, коса азондови Мордовиянь уроженецнень подвигснон колга, конатнень синь тиезь Великай Отечественнай войнать пингста.
Конешна, тяниень пингть Мордовия Республикась арась центракс аф аньцек мокшэрзянь народти, но и Россиянь финно-угорскяй сембе лия нароттнендивок. И тя статусть тейнек эряви ванфтомс и виияфнемс.
Исполкомть штаб-квартиразонза сашенды лама ломань, конатненди питнихть мокшень и эрзянь кяльхне, мокшэрзянь национальнай культурась. И синь таколфтсазь кяльхнень и культурать тячиень и вандыень шисна. Но тяка пингть эряви азомс: мокшень и эрзянь кяльхне тонафневихть кода Мордовиянь, стане и Россиянь лия региононь школатнень эса, коса компактнайста эряйхть мокшэрзят. Но аф сатнихть учебникне. И тя прябалать тейнек эряви машфтомс маластонь пингть!
Кда корхтамс культурать колга, эряви азомс: мекольдень пингть тефне тоса ламода цебярьгофтовсть. Сяс минь надиятама: мокшэрзянь национальнай культурась, минь народоньконь национальнай уликсшиц-козяшиц, кармай аф аньцек ванфневома-виияфневома, но и кеподеви од уровеньц!
Конешна, минь сембе шарьхкодьсаськ: национальнай культурань кизефксне фкя шиста аф пяшкодевихть. Национальнай кизефкссь тяфта жа аф пяшкодеви фкя шиста и сембе пингс. Синь мархтост эряви работамс эрь шиня. Сяс мес эздост ащи, кода кармай маряма духовнай  ширде эсь прянц народсь, и кода кармай маряма эсь прянц лама национальностень обществаньке!
И, мекпяли, кельгома Артём Алексеевич, минь няйсаськ и кирдьсаськ работать ширенц, конань тинь ётафнесасть Мордовиянь народть эряфонц цебярьгофтоманкса. Тячи тя залса пуромсь Россиянь мокшэрзянь национальнай активсь. И кой-мзярда заседанияса минь псиста спорятама фкя-фкянь мархта. Но сембонь минь, кит озафт тяса, пуропнесамазь марс тядянь-алянь койхненди, ёмла родинати, Мордовияти, и оцю родинати, Россияти, валда и пси кельгомась!
Мордовия Республикать эзга государственнай статистикань Федеральнай службань территориальнай органонь руководительсь И.В.ПАрамонова:
—Афкукс, Населениянь Всероссийскяй переписсь арай 2021 кизонь инь оцю событиякс. ООН-ть рекомендациянзон коряс, населениянь переписсь любой странаса ётафневи эрь кемонь кизода меле. Россияса сон арьсекшневсь ётафтомс ётай кизоня, но пандемиять инкса пингсь савсь шашфтомс. Сяс переписсь странасонк очнай и цифровой форматса ётафтови тяддень сентябрьста.
Населениянь Всероссийскяй переписть лац-ряц ётафтоманкса Мордовияса арьсефт-тифт республиканскяй и районнай комиссият, аноклафт-кочкафт населениянь сёрмадыхть и лия эрявикс специалистт. Любой ломанть национальностец кармай сёрматф-лувф сонь мяленц-валонц коряс. Шабатнень, кинди ашезь топоде 14 киза, национальностьсна сёрмадови-лувови тядяснон-аляснон мяльснон-валснон коряс.
2010 кизонь Населениянь Всероссийскяй переписть итогонзон коряс, республикань эряйхнень эзда 39,9% азозе эсь прянц мокшэрзякс, 53,2%—рузкс, 5,2%—татаркс.
Тяда ингольдень Населениянь Всероссийскяй переписть итогонзон коряс—мокшэрзятнень лувкссна республикаса кассь пцтай 5%! Тяфта лиссь мокшэрзянь народть национальнай самосознаниянц маштозь касфтоманкса.
Российскяй Федерацияса 2010 кизонь переписень даннайхнень коряс эрясь 744000 лама мокшэрзя. Тя лувксть коряс мокшэрзятне ащесть 9-це вастса странань сембе нароттнень и 1-це вастса Россиянь финно-угорскяй лия нароттнень ёткса.
Н.П.Огарёвонь лемса Мордовскяй государственнай национальнай исследовательскяй университетонь ректорсь, профессорсь С.М.Вдовин:
—Информационно-коммуникационнай технологиятне тячи сувафтфт эряфонь эрь сферати. Цифровой технологиятне тяфта жа келиста нолявихть тевс мокшэрзянь национальнай культурать, мокшень и эрзянь кяльхнень ванфнеманкса-виияфтоманкса и синь тонафнемстост.
Тяниень пингонь технологиятнень-ресурснень вельде, конат цебярьста содафт од ломаттненди, ламода сяда лац и курокста национальнай культурать, мокшень и эрзянь кяльхнень колга од содамошитне пачфневихть школаса и вузса тонафнихненди. И, тяда башка, синь вельдест ламода сяда тёждя вятемс межкультурнай диалог.
Мокшень и эрзянь кяльхнень, национальнай культурать ванфтомасна и виияфтомасна Мордовскяй госуниверситетти ульсь инь эрявикс и башка миссиякс. Сяс тячи тейне ули кода азомс: келиста нолдамок тевс цифровой технологиятнень тонафнемань эрь сфераса, университетсь эсь башка миссиянц ётафнесы эряфс тяниень пингонь од уровеньца.
Кепотьксонди, тячи университетса работай «Финно-угорскяй народонь наследиясь» информационно-ресурснай центрась, коса Россиянь и омба масторонь учёнайхне, аспиранттне и студенттне ётафнихть научнай марстонь семинархт, культурань форупт и лия эрявикс мероприятият. Аньцек 2020 кизоня информационно-ресурснай центрань мероприятияса миронь 126 странаста ульсь 351000 лама участник. Сяс ули кода азомс: мокшень и эрзянь кяльхнень, мокшэрзянь национальнай культурать мазышиснон университетсь пачфнесыне сембе мирти.
Тякоть ули кода азомс Россиянь финно-угорскяй лия народонь кяльхнень и национальнай культуратнень колга.
В.НЕСТЕРОВ.

25.03.2021 №11
 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин