Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Национальная тематика

Ёмла ШАБАть мархта сотф кунардонь койхне, илатне

Кунардонь пинкнень шарфнесть мяль шабать касомста тяфтама тефненди: мзярда няфти пря васенце пеец, мзярда ушеды якама, васенцеда шяярень нарамати. И семботи тянди лемневсть обрятт, илат.
Инголи сяда оцю шабатне ванцть сяда ёмлатнень мельге. Эстонь койхнень коряс, кие васенцеда няйсы ёмланять лисьф пеенц, сянди—казне. Стирняти макссесть руцяня, а цёраняти—панар. Тя шиня пицесть танцти цюкорнят, а васенце пидефть макссезь пеень няити.
Мзярда шабась тиендезень васенце аськолксонзон, ётафнесть тярдень керома. Шабать стяфнезь шрать кучкас, пильгонзон вакска ётафнесть пеельса и корхнесть: «Керсайне тярдензон». Тяда меле шабати макссесть розень порькс—«нолнезь потмозонза Пакся авать», штоба сон ванфтолезе шабать, штоба максоль касомс вийхть. Тярдень керома лияста тернесть отькорь цёрокш. Тя койть вельде няфневсь, штоба шабась куроконе касоль, туль ласькондема.
Идькс пингонь мяляфтови обрядкс ульсь васенцеда прянь нарамась. Васенцеда шабать шяярензон нарсезь эста, мзярда теенза топотькшнесь фкя киза. Народнай приметатнень коряс, тяда инголе нарсемс прянц, керсемс кенжензон ашезь мярьгондев, кле, аф кармай касома. А кда синь оцюфтольхть, тядясь кенчнень сускондозень пейса. Васень нарамань илать тернезь крёснавать и крёсналять. Синь и нарсезь шабать. Церанять пряста сембе шяярьхнень нарсезень крёсналясь, а стирнянь нарайкс путневсь крёснавась. Сон ётафнесь суркскя пачк мзярошка шяярьня и керсезень синь, тяфта, кле, сяда курок кармайхть касома. Кой-кона велева нарамань тевть макссезь сяда оцю цёранятненди.
Шабань и шачфтыень шяярьхнень мархта ульсть сотфт башка койхть. Фкясь эздост тяфтама. Штоба шабась оцюста афолезе юксне тядянц, ёмланять бокононц сотнекшнезь сюреса, конанди пяльтьфоль тядянь мзярошка кувака шяярь. Шабатнень нараф шяярьснон козаповсь ашезь ёря. Синь пртцезь поталакть видес или плхнезь. Тяфта тиендсть вов мес. Приметас коре, кда нараф шабать шяяренза повихть нармоненди, и сон кандсыне синь пизонь тиемс—шабась касы ёньфтомнякс. Тяфтама шабать сидеста кармай сярятькшнема пряц. Кда шяярьхне повихть шеерхненди, и сят кандсазь эсь пизозост, эста шабать кармайхть сярятькшнема пиленза. Ульсь кой, конань вельде сотцезь, кувака кармай улема шабать эряфоц или аф. Крёсналясь ёрясь кстиндамань очконяти шта пакшкя, коза ичфоль мзярошка шяярьня шабать пряста. Кда штась мзярошка пинге уендсь, шабати ламос эряма, а кда эстокиге вайсесь, куроконь кулома. Тяфтама кой-ила  ётафнесть русневок.
Тяниень пингть шяярень нарамань койхне ламода юкстафт. Кда тядятне-алятне ёрайхть тердемс инжихть, ётафтыхть эсь лацонь обряд, но кодамовок магическяй, ритуальнай смузь эсонза ни аш.

25.03.2021 №11
 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин