КАЗНЕТ И ЛЯМБЕ ВАЛХТ—КУЛЬТУРАНЬ РАБОТНИКНЕНЬ ЛЕМС

25 мартста профессиональнай эсь праздникснон Россияса отмечазь сят, кит эрь шинь тевснон мархта каннихть кенярдема, пара мяльхть, ваймонь лямбоши и эрьгя лиятненди—культурань работникне.

2007 кизонь 27 августста Российскяй Федерациянь Президентсь В.В.Путин путозе кяденц Культурань работниконь шить колга Указть алу. Корязонза профессиональнай тя праздниксь эрь кизоня отмечсеви 25 мартста. Тя корхтай сянь колга, што странасонк культурати шарфневи башка мяль, макссеви сатомшка питне тя ширдень сатфксненди. Культурати фалу венемсть асу, тевонь содай ломаттне.

Россиянь Культурань работниконь шись 25 мартста Саранскяйса пуропнезень Культурань республиканскяй Дворецу сятнень, кинь профессиясна сотфт творчествать мархта: культурань кудонь, музеень, библиотекань сотрудникнень, музыкальнай и художественнай школань педагокнень, театраса работайхнень, ансамблень руководительхнень и ламотнень лиятнень.

Республикань культурань работникнень профессиональнай праздникснон мархта поздравляндазень Мордовия Республикань Оцюнять аф лама пингс тевонзон тиендисна А.А.Здунов.

—Культурась—эряфоньконь аф явфтови пяльксоц. Главнайсь—сон кошарттанза арьсема. Тя минь основаньке, кона сатсь тейнек атянь-атяньконь эзда. Аф стак календарьса культурань работникнень шисна явфтф башка. И странань Президентсь эрь мезне шарфни мяль творческяй профессиянь, искусствань деятельхнень и культурнай наследиять содафокс тиенди ломаттнень башка вастонь занцемаснонды обществаньконь формировандамаста,—мярьгсь Артём Алексеевич.

Мордовия Республикань Оцюнять аф лама пингс тевонзон тиендисна китькстазе и сянь, што коронавирусть каршес тюремань условиятнень пингста культурань учреждениянь работникне курокста мусть лисема вастт и ашезь юмафта соткснень зрительхнень, кулхцондыхнень мархта. Синь тевс нолязь онлайн-форматть и лездсть тянь мархта ломаттненди самоизоляциять пингста.

А.А.Здунов азозе, што Мордовия Республикась сяда тов кармай шарфнема мяль культурань учреждениятнень материально-техническяй базаснон кемокстамаснон лангс. Тянь колга корхтави и федеральнай национальнай проектса.

—Тядде эряви достойнайста ётафтомс «Шумбрат, Мордовия!» XXV юбилейнай фестивальть и отмечамс святой праведнай воинть Феодор Ушаковонь канонизациянц 20 кизонь топодеманц,—шарфтсь мяль Артём Алексеевич.

Сяда тов А.А.Здунов Культурань республиканскяй Дворецть сценанц лангса казезень инь достойнайхнень.

Российскяй Федерациянь Президентть Почётнай грамотанц мархта казьф Ф.В.Сычковонь лемса Саранскяень художественнай училищань специальнай дисциплинатнень преподавательсна Л.М.Острась. Российскяй Федерациянь культурань министрть Благодарностец максф Мордовскяй государственнай филармониять—Культурань республиканскяй Дворецть Г.И.Сураевонь-Королёвонь лемса «Келу» фольклорнай ансамбльть артистканцты-вокалистканцты А.В.Масягинати. Мордовия Республикань культурань Заслуженнай работниконь почётнай лемть сатыензон ётксот «Торама» фольклорнай ансамбль» Мордовия Республикань   ГАУ-ть директороц А.А.Николаев, П.Ф.Рябовонь лемса 1№ идень художественнай школать живописнай отделениянц преподавателец В.Е.Толокина, лиятне. Мордовия Республикань Почётнай грамотаса казьф И.Д.Воронинонь лемса Мордовскяй республиканскяй объединеннай краеведческяй музейть тяниень пингонь историянь отделонц заведующаец Н.Н.Носарева. Тя шиня сценати терневсть и сят, кит лац работамаснон вельде сатозь «Мордовия Республикать касомас-вииямас личнай путксонкса» Мордовия Республикань Оцюнять Почётнай знаконц, Мордовия Республикань Оцюнять Благодарностенц.

Культурань ветераттненди казьфтольхть панчфт.

Меле ульсь оцю концерт, кона арась цебярь казнекс пуромфненди.

Т.АЛЬШИНА.