ОТЕЧЕСТВАНЬКОНЬ ИСТОРИЯЦ КАСФТСЬ И КАСФТЫ ПАТРИОТТ!

23 мартста Саранск ошень Военнай и трудовой подвигонь Мемориальнай музейса Мордовия Республикань Общественнай палатась ётафтозе «Од ломаттнень патриотокс касфтомаса работань од форматне» форсайт-сессиять васенце заседаниянц.

 

Пингстонза республикань Общественнай палатань, волонтёронь, патриотическяй и общественнай лия организациянь представительхне азондсть Саранск ошень школаса тонафнихненди, мес эряви содамс Отечествань историять и ванфтомс сонь арушиса.

 

Форсайт-сессиять рамкаса пуромфне тяфта жа ванозь «Сурскяй оборона. Меки—фкявок аськолкс» фильмать и азозь сонь колганза эсь мяльснон.

 

 

Мордовия Республикань Общественнай палатань председательть заместителец Н.В.Долматова:

 

—Кельгома ялгат, тя пяк пара, мес минь васедеманьке ётафтови  Саранск ошень Военнай и трудовой подвигонь Мемориальнай музейса. Тяса ванфневи Мордовиять военнай и трудовой историяц, кона няевикс васта занци Россиять историяса. Сяс Мордовия Республикань Общественнай палатась «Од ломаттнень патриотокс касфтомаса работань од форматне» форсайт-сессиянц, кона сяда тов келиста ётафтови республикань вуснень, колледшнень, лицейхнень и школатнень эса, ушедозе именна тя музейса.

 

Кельгома од ломатть, тячи минь, эряфкшу ломаттне, панжадонь седихть карматама корхтама мархтонт историческяй мялямть арушиса ванфтоманц колга. И корхтаманьке кармай вятевома диалогонь форматса. Сяс мес республикань и странань эрь семьять ули сонцень военнай и трудовой историяц, конатнень эзда кочксеви-пуропневи Россиять историяц.

 

Тейнек тяфта жа ули пара кулемс ширдент, кодама форматса или кодама ресурсонь вельде тячиень од ломаттненди сяда тёждя и цебярь корхнемс эсь ётковант и минь, эряфкшу ломаттнень, мархта родинаньконь историянц и сонь арушинц ванфтоманц колга. Тяфта жа тячи тейнек марса шарьхкодема: кодама работа эряви вятемс, кепотьксонди, «ВКонтакте»,     «Одноклассники» и лия социальнай сетьтнень эса ся кяльготнематнень каршес, конат тоса кой-мзярда сёрматкшневихть, няфневихть-азонкшневихть родинаньконь историянц колга.

 

Койсон, тя работаньконь эряви вятемс, пачфнемок од ломаттненди Мордовия Республикать историяста инь няевикс событиятнень-тефнень и сатфкснень колга. Тяфта жа сяда келиста азондомс республикань уроженецнень военнай и трудовой подвигснон колга, конатнень синь тиезь Великай Отечественнай войнать пингста и сяда мельдень кизотнень.

 

Саранск ошень Военнай и трудовой подвигонь Мемориальнай музейть директороц Н.А.Кручинкин:

 

—Монь алязе 1942 кизоста сявомок тюрсь фашисттнень каршес. А тядязе строясь ялганзон мархта «Сурскяй рубежть» эса. И мзярда минь  касоме, синь кой-мезе азонкшнесть тейнек сянь колга, мезть теест эряфсост савсь няемс и кирдемс.

 

Сембода пяк, конешна, таколфнемазь тядязень азксонза «Сурскяй рубежть» строяманц колга. Эста теенза мольсь 17 кизось. И сон фкя кизонь ялганзон мархта тялонда, мзярда 40 градуста вельф якшамсь  ковандазе модать, киркаса, ломса и каймоса шувсть-кеподсть «Сурскяй рубежть» эса.

 

«Сурскяй рубежть» кувалмоц, кона таргавсь Мордовиять эзга, ульсь 80 вайгяльбе. Строясть эсонза республикань пцтай 60000 од и эряфкшу ломань 1941 кизонь октябрьста сявомок и 1942 кизонь январть аделавомс. И ня строительхне, койсон, тисть трудовой и военнай афкуксонь подвиг, конань колга эряви содамс тяниень пингонь од ломаттненди.

 

Тя подвигть колга лац-ряц азондови «Сурскяй оборона. Меки—фкявок аськолкс» документальнай фильмаса, конань минь марса ванцаськ. А тяда меле азсаськ сонь колганза и историяньконь арушиса ванфтоманц колга эсь мяленьконь.

 

Мордовия Республикань Общественнай палатать представителец И.Н.Удельнова:

 

—Монь бабазе тяфта жа строясь «Сурскяй рубежть» эса. Сяс фильмать ваномста лядьсть мялезон сонь азксонза ся стакадонга стака пингть колга, коса теенза савсь эрямс и работамс. А теенза эста ульсь аньцек 17 киза—монь тячиень кизонень коряс ламода сяда кржа.

 

Сяс, ялгат, тейне стака корхтамс тинь инголент тя фильмать ваномда меле. Минь эсь сельмосонк няеськ, кодама стака условияса ся пингонь од ломаттненди савсь тиемс тя трудовой и военнай подвигть! Тя фильмать арьсиензонды и   тииензонды азондан оцюдонга оцю сюкпря.

 

Кода содаф, курок «Сурскяй рубежса» 80 кизонь юбилеенц лемс ётафтови нинге фкя реконструкция. И монь оцю мялезе примамс участия тя реконструкцияса: сявомс кядезон кирка или кайме и шарьхкодемс, кодама стака тев тисть, улемок ёфси од ломанькс, монь бабазе и сонь ялганза. И тянь мархта синь сувафтозь эсь путксснон Великай Победати, конань инкса тейнек сембонди эсь предканьконди фалу эряви азондомс оцюдонга оцю сюкпря!

 

Саранск ошень 4№ лицейса тонафнись Роман Лукачёв:

 

—Койсон, тяниень пингонь од ломаттненди стака шарьхкодемс, кода, шумбрашинь аф ужяльдезь, работамс кельмоса-начкса тяфтама оборонительнай рубежень строямста. Сяс тяфтама кинофильматнень эряви лихнемс интернетонь аф фкя лацонь ресурсс, коса тячи сидеста «нюрьксихть» од ломаттне.

 

Монцьке тя кинофильмать ваномда меле ушедонь од ванфса ванома ся пингонь сембе событиятнень лангс. Арьсян, монь ялганеньге ваймоснон вакска аф ётай тя кинофильмась, коса азондови «Сурскяй рубежть» строяманц колга. Вдь эсонза строясть тяфтама жа од ломатть, кодаптама тячи минь.

 

Саранск ошень 12№ гимназияса тонафнись Константин Ситников:

 

—Историяньконь сяда цебярьста содаманкса, койсон, тейнек эряви ладямс эсь ётксонк интернетть вельде сяда кеме соткст. Кепотьксонди, фкя школаса ётафтовсь историческяй или кодамовок лия цебярь мероприятия. Но сонь колганза видеонь, фотоснимкань или лия кодама форматса пара улель пачфтемс лия школань тонафнихнендивок.

 

Кепотьксонди, ётай кизоня минь, 12№ гимназияса тонафнихне, саме мяльс Великай Победать 75 кизонь юбилеенц лемс одкстоптомс школань музееньконь. Ётафтоме оцю работа архивса, коса  мувсь лама од материал, эсост азондовсь школать историянц и сонь содаф выпускниконзон колга. И тя рабочай опытть интернетонь ресурснень вельде минь пачфтеськ Саранск ошень и республикань лия школатненди.

 

«Победань волонтёрхт» Всероссийскяй движениянь Мордовскяй региональнай отделениять председателенц заместителец Алёна Ильичёва:

 

—Кда корхтамс оцю и ёмла мероприятиятнень колга, конат аф фкя лацонь форматса ётафневихть историяньконь арушинц ванфтоманкса, эряви азомс: сембе синь эрявихть. Сяс мес, аф ваномок коса и кодама форматса синь ётафневихть, марса синь тиихть фкя и оцюдонга оцю тев.

 

Лиякс мярьгомс, од поколениянь ломаттненди синь пачфнесазь историяньконь стамкс, кодамкс сон ульсь. И тейнек, ялгат, марстонь вийса эряви келепнемс ня мероприятиятнень аудиторияснон. И тиемс тянь курокста и келиста ули кода интернетонь ресурснень вельде.

 

Сяс, ялгат, тя мероприятияда меле васеттяма мархтонт интернетса. Тейнек ули мезе фкя-фкянди азомс!

 

В.НЕСТЕРОВ.