Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Наши мокшанские сыновья и дочери

МАЗЫШИСЬ ТИЕВИ АВАНЬ МАШТЫЕНЬ КЯДЬСА

Мзярда ушедонь тя материалть аноклама,  мялезон  эсьотям састь землякозень, мокшэрзянь содаф писательть, журналистть Юрий Фёдорович Кузнецовонь Москувонь «Современник» издательстваса нолдаф «Полдень» книгастонза героензон эзда фкять валонза сянь колга, што велеть инь оцю козяшиц—ломаненза, конат виень аф ужяльдезь работайхть ёмла родинасост. Виде, ламоц велетне тяни валомне шамондыхть, эряфкшу ломаттне тушендыхть эряфста, а оттне, касомок и кочкамок вийхть, вешендихть сяда цебярь эряф ошнень эса. Но улихть и стапт, кит меле сембе сяка мртцихть шачема шири. Тяфта тись и писательть Ю.Ф.Кузнецовонь землячкац—Рузаевскяй райононь Мокшень Пишля велень зрнянь кядь мокшавась Т.М.Савельева. Колганза азонттама газетаньконь тячиень номерсонза.

 

Шачсь Татьяна Матвеевна Мокшень Пишляса Табакофнень лама идень оцю семьяса. Сисем акат-сазорхт и кафта братт касфтсть Анна Алексеевна и Матвей Семёнович Табакофне. Мокшень ня ломаттне тиендезь семботь, штоба шабасна аральхть трудонь кельги, стакада-сталмода аф пели ломанькс. Сяс Табакофнень стирьсна и цёрасна мзярдовок ашесть пеле кодамовок тевда. Анна Алексеевна тонафтозень сембе акатнень-сазорхнень авань кядьтефненди: кодама и сюреса сёрмадома. Эста синь ашесть арьсе, што лама кизода меле тя арай теест эряфонь кельгома тевкс.

 

 Акатнень-сазорхнень эзда фкять, Татьяна Матвеевнань,  эряфсь пачфнезе ичкоздень северу. Мирденц, Николаень,  мархта Мирный ошса эрясть комсь киза. Савельефнень колма цёрасна: Дмитрий, Евгений, Николай. Несколька кизода инголе мирдсь и рьвясь мрдасть ёмла родиназост—Мокшень Пишляв.

 

Оцю цёрасна лядсь северу, а кафттне работайхть Москуса. Профессияс коре синь лётчикт.

 

Ёмла родинаса Татьяна Матвеевна лятфтась и кядьтефнень колга. Валонзон коряс, крёскакс сюреса сёрмадома сонь тонафтозе акац. Северса эрямста ни ушедсь ноляма тевс ёмла ожнанятнень—бисерть. Кой-коста сюреса, бисерса сёрмадсь шинек-венек, сяс мес тя тевсь пяк мялезонза. Т.М.Савельева мярьгсь, што тя сонь сетьмофтьсы, максси вийхть-эрьгат лия тевонь тиемс. Кядьтевса заняф эрь авась содасы, што ётка пингсь питнефтома, сяс мес фалу аф сатомшка. Афкукс, мзярда эрь шинь тефне сявондьсазь сембе пингть, стака мумс хуш пяле част сюреса сёрмадоманди, кодаманди.

 

    Мокшавась сюреса и ёмла ожнаняса сёрмады картинатка. Сашендови ламос работамс лангсост, но анок картинать лангс ванондолеть и ванондолеть. Татьяна Матвеевна надияй, што авань кядьтефнень лангс кармай шарфнема мяль уноконяц Надянясь.

 

Т.М.Савельева, кода ни азфоль сяда вяре, тяни эряй Мокшень Пишляса. Кизонда мирденц мархта заняф перень тефнень мархта, а тялонда сюреса и ёмла ожнаняса сёрмады, кодай. Пуромкшнихть акатне-сазорхне, морсихть мокшэрзянь морот. Эрямок лама киза северса, синь ашезь юкста мокшень кяльть, коеньконь-обуцяньконь, культураньконь.

 

Мекольдень кизотнень эряфозонк сувась интернетсь, соньфтемонза аш кода ни. Вов и Татьяна Матвеевна вешенди эрявикс информация: сюреса, ёмла ожнаняса сёрмадомань схемат-месть. Аф кунара сон мяль шарфтсь декупажти—тиенди мазыдонга мазы вазат, конат кенерсть ни арамс теенза эсь лацонь «визитнай карточкакс».

 

Т.М.Савельева кельгома тевкс эстеенза кочказе декоративно-прикладной искусствать. И мзярдовок аф юкснесы, што васенце аськолкснень сон тиезень инь мала ломаненц—тядянц, Анна Алексеевна Табаковать, вельде.

 

  Тячиень героиняньке оцю мяльса казендьсыне эсь работанзон раднянзонды, ялганзонды. Валонзон коряс, мзярда ломанць муй эстеенза кельгома тев, эста эряфське арай сяда мялень салайкс.

 

Т.АЛЬШИНА.

 


01.04.2021 №12
 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин