Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Наши мокшанские сыновья и дочери

ШАЧЕМА КРАЙТЬ МАЗЫШИНЦ МОРАЕЦ

Мокшень поэтть Г.А.Пьянзинонь 110 кизонь топодеманцты

 

Мазы вастоц Сарга мокшень велеть. Сон ащи аф ичкозе райцентрать—Сире Шайгавть и Саранск—Краснослободск шоссейнай кить эзда.

 

«Аф веле. Курорт!»—мярьги васенцеда сай ломанць, ваномок Саргать лангс ширде, пандоня пряста.

 

Самай тяса 1911 кизонь 3 апрельста сокаень-видиень семьяса шачсь мокшень поэтсь и переводчиксь Георгий Абрамович Пьянзин. Идькс пингстокиге теенза савсь варжамс ашушить и пялес вачедонь эряфть таньфснон, сяс мес сонь тядянза-алянза кулость рана и пцтай фкя пингоня. Цёраняти-уроскяти, штоба аф куломс вачеда, савсь щамс постуфонь орня, сявомс кядезонза кувака локша и шинь-шинь кялендемс лугань, паксянь и вирень расатнень ланга оцю стадать мельге. Аф ваномок постуфонь стака эряфть лангс, Георгий лямбе седиса кельгондезе родной краень природать, оцю мяльса кулхцонкшнезень цёфксонь седиень токай моротнень, тонафнезе эряфть. А пингонь ётазь велеса панчсть школа, партатнень ваксс озасть ашувонь цёранят и стирнят. Синь ётксост и Георгий Пьянзин. Сон кизонда работась, а тялонда тонафнесь. Аф стак 1928 кизоня тевонь кельги и тевонь содай цёранять Сарга велень Советсь кучезе тонафнема Саранскяи педагогическяй техникуму. Тяса Г.Пьянзин васьфтсь писательхнень, книгань ноляйхнень мархта. Сонцьке ушедсь стихонь тяштема, стака одкс пингонц колга азондома, шачема краенц морама.

 

Васенце стихонза печатлакшневсть «Мокшень правда» и «Комсомолонь вайгяль» газетатнень эса, «Колхозонь эряф» журналса. 1933 кизоня нолдась башка книга—«Эряфть мораса».

 

Ётась нинге киза-кафта и эвондась «Эряфть инкса» поэмац.

 

Г.А.Пьянзинонь марнек эряфоц кемоста сотф мокшэрзянь литературать мархта. Сон техникумть аделамда меле аф фкя киза работась мокшень газетатнень  и журналхнень эса. А мзярда ушедсь Великай Отечественнай войнась, Георгий Абрамович оржа перанц полафтозе штык лангс, тусь кельгома Родинанц аралама. Войнань кизотнень работась «За Родину» дивизионнай газетаса, эряфонь аф ужяльдезь тюрсь фашисттнень каршес. Тянкса казьф «За оборону Москвы», «За победу над Германией» и лия медальса.

 

Армияста Г.А.Пьянзин Саранскяи мрдась 1947 кизоня. Работась «Красный Октябрь» республиканскяй типографияса, Мордовскяй книжнай издательстваса, а 1949 кизоста сявомок заняфоль аньцек литературнай тевса.

 

Поэтть военнай  творчестваса оцю васта занци  «Кафксть герой» поэмац, кона нолдафоль башка книгаса. А «Чивгоксть ала» мекольдень сборникозонза сувасть инь цебярь стихонза и книгать лемса поэмац. Тя сборниксь пачк суваф эряфти кельгомаса и вандыень шити верондамаса.

 

Георгий Абрамович лама тись кода переводчик. Мокшекс ётафтозень А.Пушкинонь, М.Лермонтовонь, Н.Некрасовонь, И.Никитинонь, А.Кольцовонь, Т.Шевченконь и лиятнень кой-кона произведенияснон.

 

Г.А.Пьянзин кулось 1962 кизонь 20 августста, теенза сембоц ульсь 51 киза.

 


01.04.2021 №12
 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин