ВАНФТОСТЬ ПРЯНТЕНЬ ТУНДАНЬ КЕЛЬМОФТЕВОМАДА

Сась тундась. Ульцяса коль сяда сидеста няфнесы прянц шинясь, арась сяда лямбе. Тя пингть минь мяленьке сяда курокста каямс лангстонк стака ороньконь и дублёнканьконь, щамс сяда тёждяста. Но тянь эшксса и кяшф тундань пингть пельксоц. Тундань лямбось, кода корхнихть, «кяльготни», тейнек-арам, кожфсь сатомшка эжсь ни, штоба карентьфнемс, прдамс шкафу тялонь щамоньконь. Но афкукс тя аф тяфта. Сяс тунда пяк тёждя кельмофтевомс. Кода приметазь учёнайхне, тунда кельмофтевомань урмаса сярятьксни эрь колмоце ломанць. Мес тяфта лисенди?

Тя пингть пяк тёждя «фатямс» ОРВИ, сяс мес тунда минь организманьке уленди лафчемф. Кда таргозсть лимфоузелхне, сярятькстсь кргась, марясасть прянтень вийфтомокс, эста ули кода корхтамс, што инфекциясь повсь ни верозонт.

Сидеста тундань кельмофтевомась эвондакшни кожфса адено- или риновируснень вихонзаманкса. Синь повондыхть ломанть организмас воздушно-капельнай киге, лиякс мярьгомс, сярядить эзда кожфть эзга. Сяс тунда, васендакиге старандада аф якамс ся   васттненди, коза пуромкшни лама ломаньда, кепотьксонди, оцю лавкатненди и супермаркеттненди, кафетненди и рестораттненди, кинотеатрав и стак тов.

Тунда башка мяль шарфтома ярхцамбяльхнень лангс, конатнень минь сивондьсаськ. Шра лангсонт най улест ся продуктатне, конат козят витаминца и микроэлементса, штоба максомс тялода меле ламфчемф организмантенди вийхть. Пяк ладяйхть С витаминца козя ярхцамбяльхне—цитрусовайхне, офтоньбокорькссь (шиповник), капстась. Цитрусовайхнень ёткста, кода корхтайхть специалисттне, сембода цебярсь лимонць. Тунда сяда сиденяста симондеда лимон мархта чайда.

Иммунитетть кемокстаманкса обязательна сувафтость рационозонт морянь калть. Эсонза улихть тянкса эрявикс селенць и белоксь. А нинге сон козя Омега-3 кислотаса, аминокислотаса и цинкса. Сембода лама тя веществада форельть, лосость и тунецть эса.

Ярхцседа медьта. Сон ладяй аф оцю лувкссовок. Шиньберьф сивф фкя столовай куцюсь ни лезды кемокстамс иммунитетть. Медть пара шоворямс пяште, лимон, марь и сухофрукта мархта.

И конешна тяда юксне чеснокть и шурьхкять колга. Кельмофтевомань урматнень каршес ня ярхцамбяльхнень вийснон колга содаф кунара ни.

А вов сивольти тунда, меколанкт, пяк тяда прафта. Тяда башка, тя пингть сяда кржа ярхцседа рястаф, коптиндаф ярхцамбяльда, фастфудта, а стане жа ся продуктатнень эзда, коса лама пищевой добавкада и консервантта.

Мяляфтость, щашендомс эряви аньцек погодас коре. Тунда температурась ульцяса уленди аф фкя лацонне: шобдава и илять нинге кельмаза, а шиньгучкать—лямбе. Работама, тонафнема срхкамста наряжада сяда лямбоста, а шитемба, кда псилготтада, вярьгак щамть можна каямс.

Кргазонт ашкоткшнеда шарф. Кргать эса лама рецепторда, конат марьсесазь кельмоть. Сяс, кда кргати лямбе, лямбе марнек организмати (и меколанкт).

Пильгс щамат тунданди сяда пара кочкамс эчке алкс мархта, штоба пилькне афольхть начка.

Тяда яка галош прят. Кельме погодаста пряс щамафтома якамста ули кода кельмофтемс ваймонь тарксема китнень.

Материалть аноклазе

О.ЕВДОКИМОВА.