Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  

 
 

 

В Правительстве РМ

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Марс пуроптф предложеният, конат токсесазь региоттнень финансовай кемошиснон кемокстамаснон, азсь Челябинскяй областень губернаторсь Алексей Текслер.  Васендакиге, синь токсесазь региоттнень коммерческяй кредитснон реструктуризацияснон, а стане жа странань субъектонь руководительхнень ответственностьснон ётафтови финансовай политикать инкса. Тя темать коряс вал максфоль и Мордовия Республикань Оцюнять аф лама пингс тевонзон тиендиснонды Артём Здуновонди, кона азондсь республикаса государственнай шумоть мархта сотф ситуациять колга.

 

«Минь республиканьконди шумонь канксть мархта прябалатне и ограничениятне, конат сотфт мархтонза, ащихть главнайкс. Ётай кизоть песта марса властень федеральнай оргаттнень мархта минь примаме социально-экономическяй ситуациять ладяманц-стабильнайкс тиеманц коряс мерат. Тейнек удалась касфтомс дохоттнень кизоть итогонзон коряс 4,1 процентта—24 миллиард цалковайста сявомок 25,1 миллиард цалковайс. Ётафтови рыночнай шумоть и процентонь пандоматнень кирьфтамаснон коряс работа. Минь путнетяма инголенк задача кирьфтамс тядде проценттнень и пандоматнень 30 процентта. Работатама Сбербанкть мархта коммерческяй шумоть марнек объёмонц рефинансированиянц лангса»,—мярьгсь Мордовиянь руководительсь. Отмечамок эсь выступлениясонза, што регионць тячи пяшкодезе государственнай шумоть коряс целевой показателенц, кона азф 2021 кизонди РФ-нь Финансонь министерствать соглашенияса. «Марса Россиянь Финансонь министерствать мархта минь примаме и эряфс ётафнетяма финансовай шумбралгофтомань программа, мезсь мярьгонди касфтомс пандоматнень административностьснон, бюджетть эсь доходонзон. Марса Сбербанкть мархта анокласаськ конкретнай инвестиционнай проекттнень мархта регионть инвестиционнай программанц. Торговлянь промышленностень  министерствать ширень кирдеманц вельде арьсеф-тиф тёжятть ломанень лувксса коллективонь предприятиятнень  кризисста лихтемаснон коряс план, кочксесаськ-пуропнесаськ минь предприятияньконь сбытовой стратегиянц и од производствань виияфтомань  программанц. Экономическяй виияфтомань министерствать мархта шуморясаськ республикать инвестиционнай декларациянц пуроптоманц, работатама территориять инголдазь  виияфтоманц коряс. Аноклатама преференцият оцю инвесторхненди. Стратегическяй инициативань агентствать мархта минь кепотькшнесаськ Мордовияти инвестициятнень нолямаснон лангс мялень шарфтомать. Тяни ни сувафнетяма территорияти оцю сумма мархта налогонь од пандыхть, штоба касфтомс эсь доходоньконь. Строительствань министерствать мархта ванондсаськ ЖКХ-ть и масштабнай строительствать сембе ширдень  ширень кирдемаснон, мезсь стане жа  арай экономикать виияфтоманцты толхмадемакс»,—азондсь Артём Здунов республикаса финанснень шумбралгофтомаса ётафтф работать колга.

 

Тяконди азозе прябалать: «Лангозонк люпштай бюджетнай принуждениянь мерась. Ламоц объекттне, васендакиге ЖКХ-нетне, эрявихть пачфтемс нормативнай состоянияс маластонь кизонь кофнень. Но республикать виияфтомань планонзон эряфс ётафтомасна аф кармайхть сатнема сатфкст, кда аф решандамс шумонь сталмоть прябаланц и капитальнай вложениятненди кардамать валхтоманц. Ня решениятне эрявихть примамс сяда курокста».

 

Штоба примсеви мератне афольхть уле нюрьхкяня пингоннекс, Артём Здунов эняльдсь кирдемс республикать ширенц Кемеровскяй областть примерса марса           РФ-нь Правительствать мархта социально-экономическяй виияфтомань башка программань арьсемаса-тиемаса. Корхтаманц шумордамста отмечазе: «Бюджетнай кредиттнень коряс регионть шумоц федеральнай бюджетть инголе ладяф и шарьхкодеви лама пингонь перспективаса. Бюджетнай шумоть обслуживаниянь питнец инь ёмлась, а основной суммать пандомань пингоц ладяф комфортнай пингс. Но регионть рыночнай шумоц нюрьхкяня пингонь и пяк питни».

 

Тянкса МР-нь Оцюнять аф лама пингс тевонзон тиендисна мярьгсь ваномс республикать коммерческяй шумонц бюджетнай кредиттнень вельде марнек рефинансированиянц возможностенц. «Тяконь мархта пяк важна прябалать тага весть аф нолдамац. Сяс сембе вийса кирдьса шумос сявондемань кеме ограничениятнень коряс мяльть ширенц ся региоттненди, конат сувайхть программать реструктуризацияс!»—тись итокт эсь выступлениянцты Артём Здунов.

 

Странань Президентсь кирдезе регионть руководителенц ширенц: «Марнек, конешна, мон мархтот согласнаян, ваномс эряви Финансонь министерствать мархта».

 

Сяда тов, темать ваномста, странань Президентсь мярьгсь, што Правительствась работай региональнай финанснень шумбралгофтомаснон лангса. «Фкя инь главнай этапсь тяса—коммерческяй шумоть реструктуризацияц, мезть колга минь тячи корхтатама. Тяфтама кредиттне, кода правила, пяк питнихть, макссевихть нюрьхкяня пингс. Тянь колга Мордовиянь губернаторсь корхтась. Синь и ащихть регионти пяк оцю сталмокс. Эряви шумордамс реструктуризациянь тяфтама параметратнень и тиемс сонь справедливайкс. Тиема тянь маластонь пингть, аф кадондомок сонь шири»,—мярьгсь государствань Оцюнясь.

 

Владимир Путин макссь поручения анокламс региоттнень коммерческяй шумоснон реструктуризацияснон и региональнай инфраструктурань виияфтомань программатнень нолдамаснон коряс конкретнай предложеният.

 


08.04.2021 №13
 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин