Артём Здунов: «Президентть Посланияц пяк важнай Мордовияти»

МР-нь Оцюнять аф лама пингс тевонзон тиендисна Артём Здунов 21 апрельста примась участия Россиянь Президентть Владимир Путинонь Федеральнай Собранияти Посланиянц лувомань церемонияса, кона ётафтовсь Москуса «Манеж» Центральнай выставочнай залса. Церемонияв сярьгятьфнень лувксса ульсть Федерациянь Советонь члеттне, Государственнай Думань депутаттне, Правительствань члеттне, Конституционнай и Верховнай судонь руководительхне, губернаторскяй корпуссь, Федерациянь субъектонь законодательнай собраниянь председательхне, традиционнай конфессиянь  главатне, общественнай  деятельхне, тяконь лувксса региононь общественнай  палатань оцюнятне, оцю массовай информациянь средствань руководительхне. Президентсь азозень маластонь пингть странать социально-экономическяй виияфтомаса главнай направлениятнень.

Артём Здунов, корхтамок Посланиять колга, отмечазе, што задачатне, конат путфт государствань Оцюнять мархта, васендакиге,  водендафт ломаттнень эряфснон цебярьгофтоманцты. Лятфтасаськ, Президентсь  мярьгсь  Правительствати  анокламс идь мархта семьятненди ширень кирдемань программа. Августста россияттне получайхть эрь идти, школаса тонафнити 10 тёжянень цалковай фкя пингонь пандома. Президентсь мярьгсь максомс ярмак и сай пингонь васенце классу молихненди, конат школав туйхть 2021 кизонь сёксенда.

1 июльста сявомок 8 кизоса иттнень эзда сявомок 16 кизосотненди молемс, конат эряйхть аф полнай семьяса, кармайхть пандома средняйста 5650 цалковай ковти. Тяда башка, Президентсь мярьгсь максомс 6 тёжяньда лама цалковай ковти фкя пингонь пандома пеки аватненди, конат арасть ранняй срокса учётс и, конат повсть стака эряфонь балас. Нинге фкя предложениясь—штоба сисем кизосотненди молемс иттнень мельге якамань больничнайсь пандоволь зарплатать лаца 100 процентс.

Пяк важнай и региоттнень ширень кирдемасна. Президентсь азозе: «Странась вииякшни, моли инголи. Но тя  лисенди  аньцек эста, мзярда вииякшнихть региоттне. Минь кирдьсаськ сятнень ширеснон, кит сявондихть лангозост ответственность и ноляйхть созиданиянь проектт. Содаса, што Россиянь эрь регионть ули оцю  потенциалоц. Штоба лездомс сатфкс мархта сонь  панжемс—васендакиге, эряви кирьфтамс инголест ащи шумотнень эзда обязательстватнень». Президентсь путсь странань Правительствать инголе задача—1 июнти анокламс региональнай и муниципальнай финанснень лама пингонди кемешиснон обеспечендамаснон, региоттнень самостоятельнайшиснон касфтомаснон коряс предложеният. Синь вановихть лац-ряц кизонь кофнень Госсоветть заседанияса. Тяконь мархта, корхтамась мольфтеви бюджеттнень  коммерческяй шумоснон коряс ширень кирдемать колга. Коммерческяй  шумонь марнек объемсь, кона сяда оцю регионть эсь доходонзон 25 процентснон коряс, Президентсь  мярьгсь полафтомс государственнай кредит лангс, пандомок 2029 кизоти  молемс. Стане жа тиеви реструктуризация бюджетнай кредиттненди, конат максфтольхть меля эпидемиять каршес тевонь мольфтемста. Пандомань пингсна лиси кафта ковда меле. Синь стане жа кувалгофтовихть 2029 кизоти молемс. Тяда башка, федерациянь субъекттне получайхть виияфтомань од инструмент—кизоти аф 3 процентта лама ставкас коре инфраструктурнай бюджетнай кредитт 15 кизос. «Ня и лия решениятне, конат азфтольхть В.В.Путинонь Посланияса, пяк эрявихть-вайжнайхть сембе  региоттненди, но Мордовияти, сявомок мяльс минь государственнай шумоньконь лувксонц, ащихть башка вастса,—мярьгсь Артём Здунов.—Кода минь и учсеськ, Владимир Путин шарфтсь башка оцю мяль региоттнень шумонь, васендакиге, коммерческяй, стакатнень-сталмотнень  лафчептомаснон лангс. Тейнек тя ащи пяк таколфты кизефксокс. Ся решениятне, конат тячи  азфтольхть—сотнемс  тянь эсь доходоньконди, ладямс бюджетнай кредиттнень получамаснон вельде—синь тейнек пяк важнайхть. Ня средстватнень минь карматама водендакшнема рабочай од вастонь тиеманди и социальнай кизефксонь решандаманди. А тяниень пингть тейнек сашендови ня шумотнень обслуживандамс и паннемс. Пяк цебярь, што тя темась кепотьфоль Посланияса, тяда инголе совещаниятнень эзда фкаса Владимир Путинонь ширде лац-ряц ваномда меле. Минь карматама работама, штоба ётафтомс эряфс  сембе предложениятнень маластонь пингть».