Тундась аф аньцек кельгомань, но и колаф мялень-арьсемань пинге

Моли тундать омбоце ковоц. И, аф ваномок сянь лангс, што тядде сон кеняртьфтемазь лямбоса аф сяшкава рана, апрельть омбоце пялестонза термометрать столбаняц кой-коста куцендсь комсь градусти. Но аф фалу тундась кеняртьфти. Кой-кона ломаттнень кизонь тя пингть  колафт мяльсна, синь сизефт, тунда кочксихть вийхть хроническяй урматне. Кизоть саманцты тяфтама прянь марямась ётни и ломанць меки арси эсь лацонза. Мес тяфта уленди?
Ванцаськ тянь алува. Сидеста тевсь тундань депрессиять эса. Аф ваномок сянь лангс, што депрессиясь ушеткшни прянц няфнема тунда, эвондакшни сон  тялонда или нинге сёксенда. Самай эста ушеткшни кирема шись, аф сатнихть валдсь и лямбось. Тяда башка, тяфта прянь марямати туфталкс кой-коста арсихть вельф сиземась (мяльса кирдевихть кода физическяйсь, стане и моральнайсь). Сёксенда и тялонда организмаса машнихть кизонда кочкаф ламоц витамиттне, а кда синь и улихть, то аф сатнихть. Тя вятни  авитаминозти и вийхнень лафчемомаснонды, колаф мяльхненди-арьсематненди. Нинге ломанць кой-коста марясы прянц кальдявста  атмосфернай давлениять, температурать курокста полафнемаснон инкса. Тялонда организмась карьхцясыне уликс запаснень, и тундати эздост пцтай мезевок аф ляткшни.
Кода содамс депрессиять? Специалисттнень валснон коряс, шарфтома мяль вов мезть лангс: ломанть фалу сай удомац, сон марясы прянц вийфтомокс, лафчекс, кальдявста мяляфты, кда мезеньге колга арьси, эста стакаста пуропнесы тянь семботь марс, сидеста колсевихть мяленза-арьсеманза, кальдявста уды веть, а кда и уды, то шобдава сембе сяка аф марясы прянц ваймафокс, курокста кяжиякшни и «крьвязькшни» (мяльса кирдевихть нерватне).
Кой-кит арьсихть, што депрессият аф улендихть и тяфта прянь марямать сотнекшнесазь колаф мяльхнень-арьсематнень мархта. Но депрессиять, тяконь лувксса и тунданнеть, мархта тюремс эряви. Сяс сатомшка мяль шарфтома эряфонь шумбра койхненди. «Шумбра ронгса-пондса ваймоське шумбра»—ня валхне пяк видет. Макссемок организмати  кирдевомшка, аф оцю сталмот, календамок сонь, ломанць кемокстай аф аньцек физическяй ширде, но и кемокстасы нервнай системанц. Тевс нолямат эрявикс витамиттнень, лац-ряц ярхцсема. тунда витаминфтома аш кода синь аф сатнемаснон пингста. Но эрявикснень теенть кочкасыне и азсыне врачсь-специалистсь. Нинге специалисттне мярьгондихть сувафтомс эряфозонт кодамовок полафткст. Кепотьксонди, аф ламос полафтомс эряма вастть—молемс козовок ваймама, инжикс, несколька шинь экскурсияс. Или, кепотьксонди, эсь эряма вастсонт мезевок полафтомс, мумс мяльс туф тев. Сяда лама пинге макссема ваймаманди и удоманди. Кда стак шитнень работать сюнеда тя аф удалси тиемс, удомс ули кода и ваймама шитнень. Удомати вийс коре арамс лекарствакс ламоц урматнень эзда, ёткозост сувси депрессияське. Сиденяста рахседа, пеетькшнеда, морафнеда мялень кеподи книгат, анекдотт, ванондода фильмат-комедият. Тевс сидеста аф нолямат туста чайть и кофеть, алкогольнай вии симомбяльхнень. Эрь шиня аф ярхцсема стака, куя, ваи ярхцамбяльда. Но улихть и стапт, конатнень аф ламонь сивондемат эрь шиня. Кепотьксонди, свежай зеленць,      пяшттне, равжа шоколадсь, фруктатне (сембода пяк цитрусовайхне), восточнай пряносттне. Тяфтама ярхцамбяльхнень ёткс сувсихть и сятне, конат козят белокса. Белокне тюрихть депрессиять мархта и лездыхть лац работафтомс пря уйть. Эрь шинь менюти пара ули сувафтомс саразонь фкя ал, стакан йогурт или мичке.
Но, кда тя сембось аф лезды или лезды кальдявста, пшкядеда специалистонди. Сон азсы кода улемс и тунда лездомс сёксень и тялонь пингть сизеф организмати.
Материалть аноклазе
Т.Альшина.