Лемоц лятфневи лямбе валса

Атерь велесь содаф трудонь кельги эсь ломанензон мархта. Тяфтамкс лувондови Великай Отечественнай войнань и трудонь ветеранць, мокшалясь Н.И.Сяткин. Кунара ни аш шиса, но цебярь славась, мялямсь колганза эряйхть. Пяле веле мокшалять радняц. Лядсь фкя брадоц, кафта стиренза. Улихть уноконза и уноконь иденза.
Тяддень 26 февральста Никифор Ильиченди топодель 95 киза.
Сонь родителенза, Илья Васильевич и Дарья Филипповна, одста работакшнесть козялятнень лангс. Революциять васьфтезь мяль вельде, но ульсь кодама-бди таколдома, аф верондама. Тоса ушедсь коллективизациясь, колхозонь пуроптомась. Илья Васильевич и Дарья Филипповна сувасть колхозу. Эряфсь петневсь, тёждялготкшнесь. Но аф куватьс ульсь тяфта. Ушедсь Великай Отечественнай войнась. Алянц, Илья Васильевичень, сявозь    фашисттнень каршес тюрема, странаньконь аралама. Эста Никифор Ильиченди ульсь аньцек кеветие киза. Тонафнесь школаса, оцюфнень мархта ряцок трудендась колхозса. А 1943 кизоня теензовок кандсть военкоматста повестка. Ульсь Дальняй Востокса, тюрсь Япониять каршес. Старшай сержантсь Сяткин служась Родинати сисем кизот. Войнада мелевок ульсь Дальняй Востокса, кеподсь странать эса. Куду мрдась аньцек 1950 кизоня.
Н.И.Сяткинонь войнада мельдень сембе эряфоц сотфоль Атюрьевскяй районть мархта. Войнада меле пуроптсь эстеенза семья. Рьвянди кочказе Атерень трудонь кельги стирть, тылонь труженицать Евдокия Даниловнать. Шачсть кафта стирьсна. Тяни кафцьке педагогическяй трудонь ветератт. А.Н.Фролова эряй Курташка велеса. 40 лама киза вятсь мокшень кялень и мокшэрзянь литературань урокт школаса. В.Н.Макарова работась Атерь велень 2№ средняй общеобразовательнай школаса рузонь кялень и литературань учителькс. Никифор Ильичень вете уноктонза, ветексне цёрат.
Лама вастса трудендакшнесь войнань и трудонь ветеранць Н.И.Сяткин.  Ушеткшнезе ДОСААФ-ста. Тоста ётафтозь инспекторкс Атерень сберкассав. Войнада меле мокшалять высшай образованияц ашель. Кучсезь киза тонафнема Куйбышевскяй плановай институту, усксь экономистонь диплом. Тяда меле ульсь райпланонь председателькс, райисполкомонь оцюнянь полафтыкс. Кучсезь Саранскяи тонафнема, коса ётась велень хозяйствань предприятиянь руководителень курст. Сяльде трудендась Атерень «Память Ильича» колхозса парторгокс, Перевесьянь Ждановонь лемса колхозса председателькс, райпланонь оцюнякс. Пингонь ётазь ётафтозь сберкассав заведующайкс. Тяста и тусь войнань ветеранць пенсияв.
—Тянемс алязе ащи сельминголен,—мярьгсь стирец В.Н.Макарова.—Сон тейнек сембоса ульсь примеркс, гордостекс и прянь шнафтома вастокс. Сон пяк трудонь кельгиель, вестевок ашезь пеняцякшне аф сизеф, аф заняфшинц лангс. А конашкава кельгозе  тядязень, эрявсь аньцек няемс.
Евдокия Даниловна кулось аф кунара. Уноконзонды, уноконь идензонды фалу азонкшнезе, кодама цебярь ломанькс ульсь щятясна, кода рьвяясть, эрясть войнада мельдень кизотнень, касфтозь-тонафнефтезь эсь кафта стирьснон.
Сяськомань шиста Н.И.Сяткинонь портретоц «Бессмертнай полкса». Колганза лятфнихть брадоц, стиренза, лия раднянза и мала ломаненза. А лятфтамс ули мезе. Никифор Ильич эрясь аф тёждя, но интереснай эряф. Лама боевой казнедонза. А мзяра оцю казнедонза лац покодеманкса. Коса ашезь трудендакшне, сембе вастса сафнезе.
И.ИВАНОВ.
Снимкаса: Н.И.Сяткин рьванц, Евдокия Даниловнань, стирензон, Аннать и Валентинать, мархта.